CHUBBY'S PIZZA (外賣) @ 屋企 ( 28-SEP-2020 )

星期一套餐 ($165) - 環球世界薄批 (普通批) & 招牌肉醬意粉 & 炸雞 2 件 & 飲品 2 罐   里奧大人幫我再加多 2 件炸雞   今晚食剩 2 件 pizza & 2 件炸雞 & 肉醬意粉   聽晚又唔駛煮   發達喇

( 28-SEP-2020  MON )

感恩一覺瞓天光呀   之後里奧大人都起咗身話同我食早餐   佢話佢都一覺瞓天光   感恩感恩 ~

我沖埋涼就食得早餐   勁似 WFH 咁   哈哈 ~

菇場唔太忙   但個肚成日搞搞下咁   好鬼煩 ~

今日又派口罩   Admin 話以為拎錯粉紅色比我   但其實佢無拎錯   之後問我好唔好用 ?!   我話好用但質地厚咗啲   所以用哂藍色再用粉紅色   佢話老闆要求口罩要 Level 3 保障員工安全   但其實派比我哋所有口罩都係 Level 3   所以真係好感動 ~

之後收到公司群組訊息   星期六全公司放假   真係又感恩又開心呢 ~

里奧大人去咗姑奶屋企拎嘢   之後就陪我食 Lunch   勁開心呀   哈哈 ~

黑椒牛肉飯 ($59) - 好耐無食喇   覺得好味道

菇場唔忙   又係咁同 8 卦傾偈   依家多數係咁   但今日成日打錯字   明明想打 TKS 但打錯 KTS   8 卦話係咩 ?!   佢話諗咗好耐都諗唔到係咩   哈哈   傾得太多偈   完全無為意自己打錯 ~

4 點幾食月餅   其實都幾好㗎   食下嘢啲時間好易過嘛   哈哈哈哈 ~

用紙巾包住件月餅   係咪勁似垃圾 ?!

雖然我之前食咗奇華白蓮蓉月餅   但可能大同迷你都有分別嘛   咁我一切開   我同 8 卦一齊扁哂咀   因為美心一切就聞到好香   但呢個無

放工即走   里奧大人話外賣 Pizza   咁好呀   我可以唔駛煮   哈哈 ~

番到屋企即開機洗衫   之後沖埋涼就等食   但等咗個半鐘覺得唔對路   我同里奧大人講話凍哂好難食呀   之後里奧大人打去追啦   佢地話出咗車好耐   里奧大人叫佢地幫手跟跟   凍哂好難食㗎 ~

我覺得好搞笑   里奧大人會講凍哂好難食   佢話因為個老婆咁講佢咪咁講囉   哈哈 ~

   

終於等咗 2 個鐘先到   真係好離譜 ~

7 點半開餐   仲遲過平時開餐時間    哈哈 ~

食完唔駛洗嘅感覺真係十分之好   抖陣就食提子   依家要好積極食生果   因為樣樣都要趕住食   好驚壞呀 ~

睇多陣電視   我 10 點半都瞓喇   其實 10 點睇睇下電視都好想瞓   今日其實都無咩點郁   反而咁快眼瞓 ~