腸食長有 / 無肉無求 / 麵面俱圓 / 黃金滿屋
( 12-FEB-2021 FRI )
今朝瞓到 9 點半自然醒 咁里奧大人去買早餐 我就沖涼喇 ~
連續 4 日都可以同里奧大人一齊 真係勁開心 ~
今日大年初一 但就唔會去婆婆屋企拜年喇 始終唔想一大堆人圍埋一齊 一諗起可能除口罩傾偈就驚 我寧願遲少少同婆婆拜年算喇 ~
咁我打比家姐祝佢新年快樂 但突然間情緒又嚟 所以祝福完就快快收線 之後爆喊 喊完舒服好多 里奧大人沖完涼出嚟問咩事 ?! 我話好掛住媽咪 ~
今日大家狀態都好好 所以決定抖多陣就去郊遊喇 ~
仍然去大潭水塘 因為坐車非常方便 ~
感恩去巴士站就有車 本身諗住今次反方向由大潭去鰂魚涌 但里奧大人最後話唔好 始終上次無認真留意點行呢 ~
好多麵包舖都無開 咁去惠康買蛋糕喇 ~
今日唔拎行山杖 因為真係唔需要 ~
12 點開始行 前段流得最多汗 之後就會越上越涼快 所以好鍾意行去大潭 哈哈 ~
今次真係好輕鬆行山喇 但里奧大人背囊就一樣咁重囉
出發喇
今日好好天氣 感恩感恩
聽到啲人話有野豬 我先停低睇睇 佢哋咁早就出嚟搵食 咁肯定好餓啦 慘
同樹幹一樣顏色
雖然上斜 但我都唔覺辛苦 哈哈
行到呢度 有唔少人都會抖下 地方夠大嘛 哈哈
坐低抖抖 順便去洗手間
望呢個景
日日係藍天白雲就好喇
我唔記得呢啲係咩嘢名 新年一定有的
有個女人居然成串扯走 真係不知所謂
今日郊區火警訊號係高
1 點左右就補充體力 順便抖下 ~
榭蔭下面有張櫈 咁都唔錯 起碼唔曬嘛 哈哈
N 年無食忌廉賓 細細個食都已經覺得唔好食 咁幾十年後又想試下 點知一樣咁難食 可能個包唔係甜 加埋又甜又漏嘅忌廉 食完勁想反胃 不過可能係我覺得唔好食 始終口味好個人嘛
我同里奧大人講話個包好熟面口 佢話係魚柳包嘅麵包喎 係咪咁搞笑呀 一個唔食魚柳包嘅人話係魚柳包嘅麵包 反而鍾意食嗰個就唔知 哈哈
行到呢度就最舒服
Zoom 過去影啲大廈
我同里奧大人講富士山都係咁 哈哈哈哈
上到粒珍珠位置 唔知要行幾耐呢 ?!
我唔會比里奧大人企上去
聽到啲人話係吊鐘花
又去涼亭休息一下
真係好鍾意行大潭水塘
今日唔太多人行山
冷氣走廊 咁確實係涼涼哋嘅 因為有樹遮蔭 但我話本身個人熱都唔覺涼囉 里奧大人話改個好聽啲嘅名啫
打橫嘅樹幹 其實係成棵樹塌咗落嚟
交叉路 我地當然係去大潭水塘方向啦 哈哈
好多魚呀 影嘅時候好驚 因為驚跌咗部手機落去呀
向左邊行
自己垃圾自己帶走 我好勞氣同里奧大人講 話呢啲唔駛講都知啦 唉
山山山
我可以慢慢行 哈哈
呢位 Daddy 肯定辛苦過我好多
2 點 40 分行完 今次好快 因為唔駛影相 ~
其實仲可以快啲 不過里奧大人成日叫我唔駛咁快啦 遊山玩水嘛 慢慢行啦 ~
差唔多到巴士站
我好驚啲蝴蝶昆蟲 大佬呀 巨強都識飛喎 所以一律識飛嘅任何生物都會好驚 哈哈
靠站立休息
整起衫袖 佢都唔肯走
里奧大人話呢隻蝴蝶嘅翅膀斷咗 我問隻蝶會唔會復原 ?! 佢答話隻蝴蝶壽命係好短 阿 mi 又話隻蝶生存率唔高 聽完好唔開心 雖然只望咗佢一陣 嗚嗚嗚嗚
3 點左右到筲箕灣地鐵站 所以順便拎埋張新嘅八達通喇 ~
坐小巴望到呢個地方 我見到有屋添㗎
新年期間去食店 我會睇下加幾多服務費先㗎 好記得之前翠河係加三呀 仲要入咗去先知 咁無理由咁核突走番出去嘛 雖然真係勁想 哈哈哈哈 ~
金記都加一服務費 我哋覺得都 OK 呀 希望將啲加一小費比員工啦 哈哈 ~
差唔多等咗 15 分鐘先有位 我哋坐卡位呀 勁舒服 ~
炸雞肶配沙律 ($39) - 好奇怪 隻雞肶係無咗後半部份 好耐無食沙律 覺得好好味
星州炒米 ($45) - 呢個好味呀
以商業角度 二人一定坐卡位呢
食完就去 Sogo 買個斜揹袋 感恩有 8 折 原來再送多一個腰包 咁真係超級抵呀 哈哈 ~
去超市買杏仁奶同薯片 但 Cashier 條隊勁長呀 每人又一車嘢 肯定排半個鐘以上 所以唔買喇 ~
搭車番屋企 沖埋涼就開機洗衫 ~
里奧大人成日想食部隊鍋 咁其實屋企有午餐肉同腸仔 咁整過餐腸麵佢食啦 等佢開心下 ~
今晚 7 點 45 分開餐 我同里奧大人講話呢個餐好有意思㗎 係腸食長有 無肉無求 麵面俱圓 黃金滿屋 哈哈 ~
洗埋碗就再沖涼 之後同里奧大人睇戲 ~
今晚有啲攰 差唔多 11 點幾都要瞓喇 ~
沒有留言:
發佈留言