韓式排骨湯拉麵 + 雲吞辛辣麵 + 自家制麵包 ( 20-OCT-2021 )

( 20-OCT-2021  WED )

今朝好似無咁涼   因為我徑步都有出汗 ~

好餓呀   所以早餐食腿蛋治 ~

菇場忙呀   但食飯前就搞掂哂喇 ~

Lunch Time 出去行陣   買埋菜就番菇場 ~

今日食 Flakes + 乳酪   好耐無食   覺得勁好味   脆卜卜好似食齋燒鵝咁   哈哈 ~

仍然忙呀   不過放工都即走 ~

番到屋企可以抖下先煮   今晚只係煮麵好簡單 ~

里奧大人今晚約咗姑奶拎嘢   佢整咗冬瓜支竹燜火腩比我哋   咁就好喇   聽晚唔駛煮餸 ~

估唔到大塞車呀   所以接近 8 點先開餐 ~

是日懶餐 - 韓式排骨湯拉麵 +  雲吞辛辣麵 + 自家制麵包

韓式排骨湯拉麵 - 兩樣都過哂期   所以快快食埋去喇 ~

雲吞辛辣麵 - 星期日買嘅新鮮雲吞   今晚都煮喇   雖然擺喺冰格   不過都唔想留咁耐 ~

自家制麵包 - 食唔落呀   留番聽晚食 ~

洗埋碗抖陣就去徑步   里奧大人話太飽唔去喇 ~

沖埋涼就食生果   投票完成先睇文森佐 ~

今晚睇到 11 點都開始眼瞓   勁驚睇到唔想瞓呀   哈哈 ~