煎蘿蔔糕 + 臘肉糯米飯 ( 12-FEB-2024 年初三 )

( 12-FEB-2024  MON )

今朝 8 點 20 分都醒咗   但難得假期   所以繼續瞓   不過都只係瞓到 9 點半 ~

同里奧大人去食早餐   連續 3 餐都係大家樂呀   但地方都闊落   所以都 OK 嘅 ~

食完都番屋企 lu   之前諗住假期會去行山   但我每月一到呀   街都唔想去   更何況行山   哈哈哈哈 ~

1 點幾出去搵食   諗住食米線   估唔到初五先開   我仲同里奧大人講話連鎖店一定開添 ~

茶餐廳好多都加一服務費   仲要排長龍   咁我話去食越南嘢喇   反正大家都加一    但新年假期關係   所以無套餐 ~

路邊烤雞肉串撈檬 ($65) - 估唔到雞肉串係熱辣辣   仲有黃薑味   又唔錯喎

越北生牛肉牛腩片湯粉 ($68) - 里奧大人一定食湯粉

食完再兜個超大圈先番屋企   見有時間就開機洗衫   咁夜晚就做少一樣嘢   呵呵 ~

里奧大人好鍾意食朱古力冬甩   $18/3 個都抵   同埋最緊要細細個呢

家姐喺八珍買嘅蘿蔔糕

里奧大人仍然睇 "繁花"   不過我無咩點睇呀   因為個人好攰   其實都係睇下瞓下咁 ~

今晚 6 點半預備晚餐   但 7 點半先開餐   始終開鑊煎嘢要多啲時間   哈哈 ~

是日晚餐 - 煎蘿蔔糕 + 臘肉糯米飯 

煎蘿蔔糕 - 一如往年   完全好似無煎過咁   但好感激里奧大人嘅包容   次次都話好味道   好怕我唔開心   因為我次次都會好激氣話都唔似煎過嘅   哈哈 ~

臘肉糯米飯 - 食咗少少咋   都唔知點解蒸咁多糯米飯   唉 ~

大清潔廚房之後就即沖涼   之後即同晴晴視像通話   一傾就傾半個鐘   佢嗰邊都夜喇   所以唔阻佢喇   因為佢話仲有嘢要做 ~

咁繼續睇 "繁花"   睇睇下手機響   原來係嬸嬸嘅視像通話   好開心見到嬸嬸叔叔   始終幾年無見   我又懶搵佢哋   所以嬸嬸打嚟搵我   我好開心㗎 ~

叔叔嬸嬸 5 點幾起身去游水   會游個幾鐘   之後就番屋企湊孫   依家佢湊緊 4 個孫呀   嚟緊都未必有時間番香港   所以佢成日叫我哋去探佢   但我話加拿大真係好遠呀 ~

佢哋依家 -3 度   但佢話唔凍   之後再比我哋睇下間屋出面   全部都係雪   我話睇見都凍呀   哈哈 ~

傾咗 20 分鐘左右都要收線喇   因為嬸嬸要整早餐比孫女食呢 ~

之後我睇到 11 點 15 分都瞓喇   以前覺得假期要夜瞓   但依家唔會喇   年紀大雖要多啲時間休息   哈哈 ~