yoho 難得每月一次嘅 off 真係超級無敵振奮架 ~
當然要自然醒啦 同里奧大人差唔多 10 點半先起身 梳洗之後就去食早餐 食完就去照腰骨 x-ray $320 搞掂 照完就番屋企沖涼 再出發去長洲呢 ~
搭 619 再轉 603 再坐船 好感恩車程船程都唔駛等 咁慳番唔小時間架 ~
今日好好天呀 超感恩 藍天白雲可以影下相嘛~
( 其實呢日係陽光普照 不過我影成咁 )
( 我發覺好多時都會影到鷹 但影果時又見唔到架噃 )
( 呢張算陽光普照喇啩 ^^ )
差唔多 2 點幾入到長洲 超熱呀 行咗陣再去食午餐 今次又去番蘇波記 ( $198 - 四餸 ) 其實唔係唔想試另一間 之前試咗一間唔好食 真係唔想再試 因為長洲唔係成日黎 唔同喺屋企附近嘛 ~
藍妹啤酒 - 太熱喇 又唔想飲汽水 所以問里奧大人飲唔飲啤酒 佢 O 哂咀呀 咁早飲啤酒 仲要係我話飲添 不過唔凍嘅 所以要加冰
香辣蝦 - 原來係麻辣 好在唔太麻咋 花生送啤酒超正呀 d 蝦又挑埋腸 感覺乾淨好多囉
里奧大人問紅色果 d 係咩 ( 我覺得佢以為係紅棗囉 ) 我話係泡椒啩 笑笑口話應該唔辣 叫佢試下 佢話我笑得衰呀 唔方好嘢 所以幾大都唔試 哈哈
鐵板煎蠔仔蛋 - 鐵板果然唔同 熱辣辣超正 同埋有唔小蠔呀 我點埋魚露一齊食 但 d 魚露超鹹呀
清蒸海上鮮 ( 黃立鯧 ) - 有兩樣魚 不過我揀黃立倉 因為媽咪成日蒸嘛 知道條魚款係點嘛 最怕脹卜卜又大條嘅魚
豉椒炒蟶子 - d 汁唔得惹味呀
最鍾意 226 ^^
食完周圍行 不過真係好熱囉 之後又食豆腐花 再周圍行影下相 ~
( 遮人合一 勁呀 )
芝麻糊豆腐花 ( 凍 ) - 無味嘅 不過勝在夠凍囉
大菜糕涼粉 ( 凍 ) - 呢個糖水又太甜 咁樣中和番無味嘅芝麻糊豆腐花
呢粒大菜糕好似松花皮蛋咁樣好靚呀 我覺得
但太陽實在太猛烈 出咗汗個人好攰 同埋好想入冷氣地方坐 所以又食棉花冰喇 上年食好似 $20 今年已經 $25 lu ~
( 又係 load 相先見到隻鷹 )
鷹呀
橫樑一點點黑色 其實係燕子巢黎架 不過我影唔到 ^^
成個海灘都佈滿垃圾 好恐怖
蕃石榴雪花冰 @ 花園雅座 ( $25 )
食完雪花冰反而有 d 眼瞓 可能飲咗啤酒 所以都係出去行下 本來我特登黎影下相架 不過突然有 d 頭痛 所以無咩 mood 再影 行多幾個圈買埋芝麻糕就走喇 ~
里奧大人家姐今日搬屋 所以約佢地食飯 原來佢地又約埋表哥同其他朋友一齊食 因為佢地幫手搬屋 食完就上佢屋企坐陣 佢又比咗豉油蠔油同按摩墊同其他嘢比我 加埋成 2 大袋嘢 所以我地坐到 10 點半就搭的士番屋企喇 ~
沒有留言:
發佈留言