蜜汁叉燒 ( 外賣 ) + 粟米蛋花湯 + 蝦子麵 ( 26-mar-2012 )

( 26-mar-2012 mon )

雖然今日係星期一   但今日非常之好天呀   有太陽有風   心情都好好呢   呢 d 天氣真係好想出街   如果留喺屋企呢   就一定狂洗衫   我最鍾意 d 衫比陽光曬乾架   最自然嘅殺菌消毒呢 ~

早餐食腿蛋漢堡包 + 拉茶   呢間無普遍奶茶咖啡   只得拉茶同印尼咖啡   我未試過印尼咖啡   因為我驚係三合一   會好甜咁囉 ~ 

忙咗陣就 hea 啦   媽咪打黎又話可以出院   超開心呀   咁啱老友 cc 又超勁得閒   所以又可以一齊 m   佢之前日日忙到爆   但呢幾日就非常之得閒   佢得閒就會記得我架喇   因為佢無咩老友好似我咁   成日都咁得閒嘛 ~ 

lunch 又食 k + 藍莓乳酪   好想快 d 清哂   食完哂呢   呢幾年都未必會再食 k 呀 ~   

唔知點解個胃有 d 唔舒服   同埋有 d 頭暈   其實一早已經諗好咗煮咩   不過都係唔好搞咁多嘢   諗住去大家樂買隻雞   點知原來 25/3 係 last   唉   唯有去明星買叉燒囉 ~

6 點番到屋企   6 點半自己開餐   食完即熨 2 機衫   再洗 2 機衫   難得咁好風   之後又好似潮濕   早洗早着呀   熨完衫又忍唔住抹柜抹書房   再抹洗手間   本來諗住拖埋地   但都係聽晚先   大佬   真係有 d 攰呀 ~

是日懶餐 -蜜汁叉燒 ( 外賣 ) + 粟米蛋花湯 + 蝦子麵

蜜汁叉燒 ( 外賣 ) - 喺明星買架   $40/半斤   食唔哂架   食剩就留番聽晚炒麵 ~

粟米蛋花湯 - 超勁想飲呀   我朋友話佢鍾意飲架   因為佢媽咪煲粟米湯會加瘦肉碎同魚肚   嘩   咁多料   我唔會整架   極其量只會加蘑菇同素翅   放工番黎真係好鬼攰架   唔會搞咁多嘢 ~

蝦子麵 - 余均益辣椒醬配蝦子麵真係絕配   不過我覺得食一個蝦子麵其實唔飽   但兩個又太飽   但今晚自己開餐先嘛   唔係就會淥 3 個麵同里奧大人 share 食   咁就啱啱好呢 ~

里奧大人 9 點幾番到屋企   話想食出前一丁多 d   麻煩到暈   不過見佢做嘢咁辛苦   佢鍾意食咩就咩啦   但如果餐餐出前一丁又唔得喎   實在太唔健康嘛 ~