米桶越南餐廳 @ 官塘鱷魚裇中心 ( 9-MAR-2012 )

越南春卷


越南蒸粉包 / 馬拉盞炒通菜 / 招牌牛油雞翼 / 烤豬肉湯粉

( 9-MAR-2012  FRI )

Happy Friday 喇   完全感受到人咃聽日 Off 嘅開心振奮   雖然我無份   但星期尾都係令人開心嘅 ~

今朝又食出前一丁麵   加埋杯拉茶   真係好鬼飽 ~

菇場仲係忙啦   忙到 Lunch Time 都未餓   所以出去行咗半個鐘先番菇場開餐   又係 Special k + 朱古力奶喇   下星期應該都係 K   不過可能轉乳酪   無咁悶嘛 ~

里奧大人今日上大陸   我就約 cc 一齊去官塘鱷魚裇中心嘅米桶越南餐廳食飯喇 ~

今晚搭地鐵   一開門見到有個男仔着成女仔咁   窿窿線衫外套 + 熱牛 + 厚身灰色暗花絲襪 + 靴   但見到佢粒大喉核同啲剃唔乾淨嘅鬚鬚就覺得好恐怖啦   有班學生見到佢入嚟   我聽見佢哋問男定女   總之啲人一見佢就會望住佢   佢啲手指都好幼   其實喺後面睇   佢真係似一個女仔囉   佢係睇日文書   唔知佢真係日本人定係鍾意睇日文嘅人呢   我覺得女扮男都接受   其實好易睇到   因為嗰啲個個打扮都一樣   但男扮女我就真係接受唔到喇   唔知點解 ~

APM 唔知有咩韓國歌星嚟表演   超多學生妹睇呀 ~

Book 咗 6 點半   不過我 6 點 15 分就到咗   CC 就 6 點 20 分到   時間啱啱好 ~

一坐得點嘢食   一路食一路傾   傾呀傾   之後再點碗湯河   又一路食一路傾   傾呀傾   傾到燙衫問題   我話我會熨埋底衫 底底同襪   手巾都會熨   總知洗咗咩就熨咩   佢話好少聽人話熨底衫喎   但我覺得熨咗之後真係舒服啲喎   叫佢試又唔試 ~  

之後職員話 Last Order   我哋都無睇幾點   又繼續傾   最後職員比張單嚟   我哋先知原來已經 10 點半   我仲以為 9 點幾咋   真係唔係職員叫埋單   我哋會繼續傾囉 ~

今餐 CC 話請我生日飯㗎   不過其實佢上年生日飯我都未請   所以今餐我一定要請喇 ~

番到屋企無耐   里奧大人都番嚟 lu   咁都好   唔駛等佢咁耐   我可以沖完涼即瞓呢 ~