上海菜肉雲吞 + 韭菜餃子 ( 外賣 ) ( 9-MAR-2013 )

一隻碟都放唔哂所有嘅餃子同雲吞 @.@

( 9-MAR-2012  SAT )

終於 off 喇   瞓到 10 點半自然醒   食完早餐就番屋企梳洗喇 ~  

我次次 off 嘅前一個星期   里奧大人就會成日問星期六去邊去邊去邊   真係講親咩呢   最後果句實問星期六去邊架喎 ~

其實我想去流浮山食蠔   不過好似要坐好耐車之餘   又要轉車咁   我就唔係咁想啦   好似好頻樸咁   呢排好鬼攰   都係想他他條條咁過囉 ~

咁睇到上星期飲食男女介紹深水埗   我就話去深水埗啦   難得諗 ~ 

今日好熱咁呀   里奧大人原本着線衫 + 厚外套   不過我話唔駛厚外套啦   之後佢話換衫   換件無咁熱   但就換件抓毛有帽衛衣   我話痴啦   咁熱着抓毛   之後佢再換   又係換件厚身棉衛衣   越換越厚嘅   人家唔知以為你有病添呀   最後叫佢帶厚外套放 backpack   驚冷氣地方凍嘛   最緊要係費事佢冷親又賴我呀 ~

佢喺屋企整 d 嘢   咁我都唔嘥時間喇   去超市幫菇場買嘢   之後先 join 埋佢去埋銀行搞嘢   搞掂哂都成 1 點 lu ~

去完 MCL 買飛就搭地鐵去深水埗   周圍行下先   不過里奧大人第一件事係搵買電話保護貼嘅舖頭   其實真係好感動   佢對我 d 嘢真係好上心   因為我之前甩咗保護貼   同佢講咗一聲   之後我話去深水埗   佢第一句就話好呀   可以去買埋保護貼 ~ 

呢檔買保護貼嘅檔口   服務非常非常之好啦   買個 $20 保護貼   幫我貼埋   仲好有心機貼添呀

呢張好有偷拍 feel  哈

買完保護貼都 2 點   行去維記食豬潤麵   但超過 50 人排隊   即調頭走喇   餓暈都未排到入去食呢 ~

咁我即轉去食印尼菜   都要等   不過等 15 分鐘左右就有位   算快架喇 ~

間餐廳好多印尼人架   起碼 9 成係印尼人   有 d 貌似香港人   皮膚白白架   但一開口就係講印尼話   我同里奧大人好似外星人咁 ~

加多加多飯團 ( Gado-gado Lontong ) - 勁想食加多加多好耐啦   呢間應該正宗啩   唔係唔會咁多印尼人食呢   哈   不過我要小辣   但唔辣嘅   下次要大辣   惹味 d 嘛   因為我覺得 d 沙爹醬越食越甜咁呢 @.@

黃薑飯 - 巴東牛肉 / 青瓜 / 花生 / 魚乾仔 / 茄子 ( Nasi Kuning - rendang / acar / kac / ikan teri / terong ) - 里奧大人幾鍾意食噃   咁我可以買黃薑粉   用黎炒飯真係唔錯架 

綠豆冰 - 都 ok 啦   因為無咩要求嘛

食完又周圍行   不過其實無咩好行   因為好鬼熱呀   所以買埋水餃雲吞   再買埋紅豆糕芝麻糕就坐 van 仔番屋企喇 ~

3 層高嘅好似係戰前樓宇   好有特色   同埋肯定好實用呀   哈

好曬 @.@

番到屋企附近   途經商場   見到同事   唔係佢打招呼   我都唔會叫佢   無咩嘢好講嘛   所以同呢間公司 d 同事真係無咩緣份咁呢 ~

番到屋企即沖涼呀   之後里奧大人話瞓晏覺   咁我都瞓啦   4 點半瞓到 6 點半   咁都好   今晚夠精神睇戲 ~

買咗餃子雲吞   所以煮多 1 個辛辣麵 share 食   咁就一定夠飽喇 ~

是日懶餐 - 上海菜肉雲吞 + 韭菜餃子

上海菜肉雲吞 + 韭菜餃子 - $20有一打   每樣買咗一打   食得好滿足呀   不過唔記得喺邊間買添 ~

食飽飽洗埋碗   又唔駛做家務   真係有 d 眼瞓咁呀   今晚睇 9 點半 " 林肯 "   9 點出門口   慢慢行去戲院   買埋爆谷   時間啱啱好 ~

估唔到都有差唔多 40 個人睇   我買飛嘅時候得 6 個人睇咋   不過歷史片可能比較冷門   我睇到最後 20 分鐘都瞓着咗呀 ~

終於 12 點散場   即番屋企沖涼喇   但沖完涼又醒哂   所以又 1 點幾先瞓   好唔健康呀 ~