尖椒釀魚肉 + 蕃茄薯仔肉片湯 ( 12-MAR-2013 )

( 12-MAR-2013  TUE )

今朝又潮濕   真係唔好喇啩   濕重個人會好攰架 ~

早餐食扒芝腿治   我好鍾意食芝士   鹹鹹香香好鬼正 ~

嘩   番到菇場第一件事拎 lunch box 出黎   漏哂汁呀   膠袋同食物袋都有汁呀   第一次咁咋   好在唔係擺喺手袋   唔係咩都無架喇 ~

hea 住等到 lunch time   食完 lunch box 又 hea 過到放工 ~ 

今晚去街市買餸   買埋聽晚餸   雖然街市唔係遠   不過真係唔想晚晚做同一樣嘢呀 ~

番到屋企就即刻醃魚肉同浸蕃茄   抖陣又要預備晚餐喇   今晚里奧大人 8 點半先放工   又係我自己食先 lu ~

是日晚餐 - 尖椒釀魚肉 + 蕃茄薯仔肉片湯

尖椒釀魚肉 - 前日見到 2 pack 尖椒 $12 好似好抵   因為好靚仔   單買 1 隻唔平架   最後番轉頭買   尋晚用幾隻黎做配菜   都幾辣   所以今晚就釀尖椒   好想食辣嘅尖椒呀   今次用蒜頭豆豉加磨豉醬做茨汁   香好多呀   里奧大人食咗 1 啖就話好好食   好難得佢話青椒好食架   不過就話辣囉   要食埋雪糕解辣 ~

蕃茄薯仔肉片湯 - 前日買咗 10 隻細蕃茄 + 2 個大薯仔   咁今晚就買多 $20 梅頭用黎滾湯   我買嘅時候叫埋豬肉佬斬細件   佢問我點食   我話用黎滾湯之後再炒   佢聽完好愕然呀   個咀形係講滾湯之後再炒   咁又幾離奇嘅   因為滾完湯嘅肉已經好 "鞋"   再用黎炒   又真係無咩人會咁嘅   但我唔想嘥嘛   留黎聽晚炒麵   同埋最估唔到係落埋水加埋材料   成煲滿哂   要分 2 餐飲呢 ~

食完拖地   再等埋里奧大人番屋企就開機洗珊瑚絨毯同枕頭   枕頭重得滯呀   所以架機好嘈   後尾里奧大人話以為洗好輕果 d 枕頭   丫   希望部機無問題啦 ~