豆豉鯪魚炒油麥菜 + 蜜糖焗墨魚丸紅腸 ( 20-MAR-2013 )

( 20-MAR-2013  WED )

尋晚開冷氣瞓真係舒服好多   真係好怕半夜熱醒嘅感覺 ~  

今朝去拎報紙時   聽到 730 阿姐話比呀婆打呀   咁有一個女人攬住 730 阿姐   係咁安慰佢   好堅呀   阿婆打人   阿姐仲話 1 份報紙秤起值幾多錢呀   駛唔駛打人   不過喺九龍灣拎報紙 d 阿婆同呀伯真係顛架   衰 d 講係蠻人   係咁衝住黎搶報紙架   我間唔中就聽到 d 人話駛唔駛撞人呀   我就親眼見個一個呀阿伯   阿姐一解開報紙咋   都未開始派   佢已經碌大對眼   係咁好大力扯份報紙出黎   呀姐都驚咗佢呀   比佢拎呀   真係好驚阿伯心臟病   拎咪拎囉   但要排隊嘛   同埋唔好來回拎幾大十次啦   好多檔報紙阿姐都唔會再比佢地   阿姐話比人睇啦   唔好咁貪心   之後阿婆就會大聲鬧番人轉頭   呢 d 真係恃老賣老   超級黑人憎呀 ~

好餓呀   早餐食五香肉丁腸仔公仔麵   個麵有 d 林   口感唔得   食完好驚 ~

菇場好多人上咗大陸   所以超級靜   之後聽到同事話   會計部同事肺炎   唉   菇場又中央冷氣   個個又 ke ke kam kam   我喉嚨又唔多舒服   但番到屋企又無咩嘢架喎   所以我覺得菇場好多菌咁呀 ~

晏晝未餓   所以出去行   行到 1 點就買包番菇場食   因為天黑黑   想落雨咁呀 ~  

放工去街市買餸   買完即番屋企   諗住快 d 煮快 d 食   差唔多 7 點半想炒菜嘅時候   里奧大人打黎話電腦壞咗   可以放工   咁我都等埋佢一齊食啦   無咩幾何咁早嘛 ~  

是日懶餐 - 豆豉鯪魚炒油麥菜 + 蜜糖焗墨魚丸紅腸

豆豉鯪魚炒油麥菜 - 好似好耐無煮   同埋想清哂 d 罐頭   不過豆豉鯪魚係清得好慢   因為唔會成日煮   太 heavy 喇   所以已經比咗 d 媽咪同家姐   唔係有排食 ~

蜜糖焗墨魚丸紅腸 - 用光波爐焗架   紅腸真係要煎先好味   條邊要脆先好味嘛   但焗就唔脆囉   里奧大人問我係咪烚添呀   可想而知口感幾咁正呢 ~

搞掂哂就沖涼   呢排真係好攰咁樣   10 點半眼皮已經跌落黎   所以今晚 10 點 45 分要即瞓喇 ~