滷水雞翼 + 菜心 + 白果腐竹薏米豬肚豬骨湯 ( 19-MAR-2013 )

( 19-MAR-2013  TUE )

真係好驚呢 d 天氣   潮濕又無風   搞到個人瞓得唔好   無咩精神咁呀 ~

早餐食奶油多   離譜呀   1 個月之內加咗 $4   由 $14 加到 $18   唔怪得我入去時小咗咁多人啦   如果同區咁嘅價錢   可以有好多選擇嘛 ~

( 我初初以為佢比咗鮮油多呀   咁我即刻睇張單個價錢係 $18   之前係 $16 嘛   咁鮮油多比普通多士又貴 d   所以再睇埋餐牌   先知又加 $2 )  

喉嚨有 d 唔舒服又頭痛   即飲杯 Hot Lemon   如果可以沖埋熱水涼之後瞓覺   幾咁好呢 ~

今日有 lunch box   食完已經 1 點幾   無得落去行 lu ~

朋友 msn 我話稍後有狂風雷暴大驟雨   3 點幾無啦啦行雷   之後個天黑哂同勁大雨呀   雖然我知呢個星期係會落雨   但無諗過會咁勁囉 ~

放工即走啦   約咗媽咪工人拎嘢呀   其實好感恩   今晚我真係好唔想煮   好想休息   點知媽咪煲咗湯   又順便幫我買埋餸   咁我都可以舒服 d   唔駛行去買餸   唔駛買有得食喎   幾咁嘆呀 ~

是日懶餐 - 滷水雞翼 + 菜心 + 白果腐竹薏米豬肚豬骨湯

滷水雞翼 - 媽咪喺酒樓買架   我之前食過覺得好好食   所以媽咪又買比我喇 ~

菜心 - 媽咪幫我切埋   我就咁浸下就得   我懶到就咁淥就算喇   薑都懶得拍 ~

白果腐竹薏米豬肚豬骨湯 - 呢期媽咪好鍾意用豬肚同粉腸煲湯   我開始飲到驚喇   最搞笑係里奧大人以為係白果腐竹糖水   又真係幾似嘅 ~

里奧大人 7 點 45 分放工   咁就好喇   咁我搞掂哂嘢   沖埋涼都未到 9 點   起碼有 2 個鐘頭私人時間   佢又唔駛做公司嘢   咁一齊睇下電視   不過里奧大人好衰架   成日睇無線 d 電視劇集就會駁三駁四   我話做戲係咁架啦   駛咩咁認真   最大問題係影響到我嘛   所以佢即刻睇用 Ipad 睇其他嘢 ~   

11 點即瞓喇   今晚要開冷氣   無風真係好難頂 ~