梅菜蒸鯇魚 + 蜜芽糖雞膇 + 菠菜 + 淮山當參水鴨湯( 10-MAR-2013 )

( 10-MAR-2013  SUN )

同里奧大人一齊 9 點半起身   梳洗之後就去金姆指食早餐喇 ~

今朝有鐘點黎打掃   真係幫輕好多好多   加上呢排又好鬼攰   真係無咩點做家務咁呢 ~

好耐無番教會喇   里奧大人仲以為我去買嘢   唔會番教會添   除非時間唔許可啫   否則一定番教會   我唔想靈命無增長呀 ~

今次又有感動   " 神眼目看顧困苦的人   聽到人無言的呼喚   給人解決困境的出路 "   所以我地要打開信心嘅眼睛   順服神嘅帶領   因為神嘅恩典足夠我用呢 ~

崇拜完畢就番屋企喇   去貢茶買嘢飲   里奧大人之前狂飲百香果寒天   終於比佢飲到 10 杯   依家齊哂 coupon   買 1 送 1 杯啦 ~

珍珠奶茶加咗彩色蒟蒻   味道完全唔夾   只怪自己貪心 @.@

2 點半出去食 tea   食完 tea   我就去買餸   里奧大人就番屋企瞓一陣   我其實都有小小眼瞓   但又瞓唔到   所以沖過熱水涼醒一醒 ~  

想早 d 食飯早 d 休息   6 點準備煮飯   6 點 45 分有得食   不過我又食唔落   食小小菜同魚算喇 ~

是日懶餐 - 梅菜蒸鯇魚 + 蜜芽糖雞膇 + 菠菜 + 淮山當參水鴨湯

梅菜蒸鯇魚 - 里奧大人無咩食魚   所以蒸比佢食   要佢食起碼 2/3 呢 ~

蜜芽糖雞膇 - 今次焗得都唔錯   不過唔夠入味   如果唔係更加好 ~ 

菠菜 - $5 / 扎咋   所以買 2 扎   留番 1 扎聽晚食 ~

淮山當參水鴨湯 - 媽咪星期五煲比我架   話水鴨好滋陰好補呢 ~

搞掂哂都係 8 點咋   即刻沖涼又 hea 過   里奧大人就做公司嘢   做到 10 點半就睇電視   我又陪下佢啦   所以又 11 點半先瞓 ~