大家樂 @ 九龍灣 ( 31-AUG-2013 )

( 31-AUG-2013  SAT )

今朝 8 點 15 分先起身   里奧大人仲以為我唔番工添 ~

早餐勁想食熱嘢   所以就食雪菜肉絲餐肉米粉   今次要食得快呀   因為已經遲到呢 ~

番到菇場   個人都係溫溫燉燉   都無心機上網同 Skype   之後 8 卦又同我講話邊個邊個同事唔嚟飲   我咪話囉   根本你就唔應該請人添啦   人哋做咗 2 個月都唔夠   我真係覺得你好肉酸囉   之後佢又講點點點   我都無理佢喇   因為真係勁攰   唔想諗嘢 ~

放工即走啦   今日里奧大人又陪佢姐夫去買電腦   我唔去喇   買完點心番屋企   食完又瞓咗半個鐘   差唔多 3 點   里奧大人同佢姐夫都番嚟 lu ~  

佢哋買咗麥記   勁想食啲薯條呀   不過都無可能食到   里奧大人昅到實 ~

之後佢有佢哋整   我就喺梳化睇雜誌   睇睇下瞓着   之後索性入房瞓喇 ~

瞓到 6 點幾就醒喇   其實仲好攰   不過唔瞓啦   因為有啲餓呀 ~

想飲冬瓜盅   所以叫里奧大人陪我去大家樂呢 ~

食完又番屋企   抖陣就沖涼就抖下   差唔多 11 點半先瞓 ~

豉椒炒蜆肉 + 菜心 + 冬蔭功麵 ( 30-AUG-2013 )

( 30-AUG-2013  FRI )

又星期五喇   真係最開心呢 ~

喉嚨痛呀   應該係前兩晚食咗薯片   同埋尋晚又食鹹水角   所以先咁呢   之前晚晚食薯片都唔會喉嚨痛   唔通食完中藥我變咗熱底   哈哈 ~

菇場靜呀   老友又番咗 Ipoh   無得 Skype   好在 8 卦喺度   唔係都幾悶   因為今日唔想上網呀   好攰咁 ~

同 8 卦出去食 Lunch   想食酸辣米線   不過佢又唔想   所以又去食五寶飯喇   明明叫咗少飯   居然無少到   飽鬼到呢   所以我叫 8 卦自己番菇場先   我要兜個圈先得呀   估唔到行咗 15 分鐘   真係舒服啲咁㗎 ~

Yahoo Blog 終於摺埋   佢哋情願收購另一個平台都唔好好管理個 Blog   真係傷透人心啦   不過其實寫 Blog 咁耐   佢哋真係做得越嚟越衰   Upgrade 之後真係唔覺得有咩改善   我個人覺得仲衰過舊時   好多 Blogger 話唔見好多篇 Blog 同相添呀   不過我無留意有無唔見嘢呀   因為咁耐嘅嘢真係唔記得囉   我覺得寫 Blog 對我嚟講係一個回憶   基本上都會繼續寫嘅   同埋應該轉去比較多啲人用嘅 Blogspot   講真   去到嗰邊見番啲熟口熟面嘅 Blogger  都幾有親切感   嘜頭都用番隻貓貓   我真係好鍾意佢   肥嘟嘟好得意呢 ~

沾寒沾凍   個身又滾   但其實又非常之凍   都似發燒喇   勁想快啲放工番屋企 ~

落車經過美心   見到好多件 Cheese Cake 切餅   今次真係忍唔住買番件喇 ~

番到屋企居然唔駛開冷氣   都心知不妙啦   所以浸埋菜就即探熱   真係有啲燒   諗住食 Panadol   不過里奧大人係都要我睇醫生   咁我即掛號啦   好在 6 點 45 分有得睇 ~

去到診所探熱都係 37.9 度   醫生問有無周身骨痛喉嚨痛   我話有   之後佢又摸我條頸   輕輕掂已經好痛啦   咁我都知應該係扁桃腺發炎   不過我攰到傻咗   無問醫生我係咪又扁桃腺發炎添 ~ 

 

抖陣就煮飯喇   里奧大人 7 點半先放工   咁我都自己食先喇   因為想快啲食藥同沖涼呢 ~

是日懶餐 - 豉椒炒蜆肉 + 菜心 + 冬蔭功麵

豉椒炒蜆肉 - 煮咗勁少蜆肉咋   我簡直覺得煮嗰少少   真係嘥煤氣呀   哈哈 ~ 

菜心 - 尋晚食剩   今晚食埋去   真係好在有菜剩   唔駛射登又去買嘛 ~  

冬蔭功麵 - 泰國啲麵好細包   所以煮 2 個比里奧大人   咁見啲蜆肉實在太少   又加啲蝦同西刀魚丸咁囉 ~

里奧大人知我鍾意 Line 公仔   所以特登買個月餅比我   搞笑 ~

之前扭蛋   不過想要嗰啲就扭唔到   但我覺得已經好夠   因為依家扭蛋要 $15 一隻好貴囉

椒鹽豬扒 + 菜心 ( 29-AUG-2013 )

( 29-AUG-2013  THU )

里奧大人今朝 10 點半見客   佢話陪我食早餐   所以我可以 7 點 50 分起身   超開心呀 ~

菇場忙咗陣   上下網又 Skype   好快又到 Lunch Time 喇 ~

今日有 Lunch Box   食飯真係飽飽滯滯咁   但我又唔鍾意飲茶   如果唔係咁樣可能會好啲   無咁滯呢 ~

放工即走   去街市買菜   再去鴻星買鹹水角同豆沙角就番屋企喇 ~

醃好豬扒再浸好哂菜就食鹹水角喇   熱辣辣超好味呀   豆沙角又係好好味   不過食完都幾飽下 ~

7 點開始煮   差唔多 8 點先有得食   今晚我都無食飯   食啲餸同飲湯已經好夠飽 lu ~

搞掂哂就沖涼   差唔多 9 點就打比里奧大人  其實我已經好攰   隻手又痛   所以都猛猛哋   因為我好想快啲休息嘛   佢食完又要幫佢洗   好鬼煩   所以我話叫佢食杯麵   我唔想煮米粉   唔想對住火爐熱辣辣呀   其實佢食杯麵都無所謂   仲唔知幾開心添   不過我講完又覺得自己好衰咁   之後打番比佢   我話煮米粉啦   今朝又食咗麵   唔好食咁多麵囉 ~

是日懶餐 - 椒鹽豬扒 + 菜心

椒鹽豬扒 - 買咗 2 隻紅尖椒   切嘅時候都覺得辣   估唔到真係辣   都唔錯呢   最開心里奧大人都話呢個豬扒好味   不過佢就無食到啲紅尖椒   如果唔係佢又會呱呱嘈又話辣又依樣嗰樣 ~ 

菜心 - $12/斤   其實都唔知貴唔貴   依家啲價錢日日都唔同   我見多人買先買咋   今晚好在浸咗半斤   份量啱啱好呢 ~

住家飯 @ 媽咪屋企 ( 28-AUG-2013 )

茄汁海蝦


羅漢齋煲 - 媽咪仲包咗 d 腐竹卷   餡係一條條嘅紅蘿蔔絲   好好味呀 ~ 

蒸龍躉仔 - 我食緊魚嘅時候   家姐望住我   我問佢望咩呀   佢話以為我咁大膽食魚眼呀   其實我係食緊臉珠 dum 嘅肉之嘛   咁又係嘅   夾嘅位置又真係幾似夾魚眼嘅   哈 ~  

三色椒炒帶子

皮蛋酸薑

牛蒡紅蘿蔔白果豬橫脷湯

( 28-AUG-2013  WED )

天氣又係爆熱   我覺得行樓梯上上落落先最熱   好在我特登早啲起身   早啲出門口就唔駛咁趕頭趕命呢 ~

早餐又食奶油豬   睇下報紙打下機   好快又要番工咁   哈哈 ~

菇場忙咗陣又 Hea 過   呢排隻手掌又勁痛   今次仲慘   連拎袋上膊頭都痛呀   擰杯蓋又痛   上網成日用 Mouse   唔痛先奇 ~

今日又係食完 Lunch Box 就出去行陣   呢排夜晚無徑步   咁唯有晏晝行下   當運動下咁啦 ~

諗住 Hea 過   但又忙咗陣   咁都好   半個鐘頭話咁快就過咗 ~

里奧大人上咗大陸   所以我就去媽咪屋企食飯   本來家姐唔去㗎   因為佢尋晚已經去咗媽咪屋企   不過應該媽咪係咁叫佢去   佢先再去呢   哈哈 ~

家姐今晚 6 點 45 分番到屋企   又可以早啲食飯   爽呀 ~

食完飯同家姐一齊食咗一筒薯片   即時鼻哥窿慶合合呀   不過真係好難忍口囉   呵呵 ~

家姐要去我屋企拎番支 BB Cream   所以同家姐一齊 8 點 15 分走喇 ~

坐巴士嘅時候   家姐同我講   媽咪勁想煲湯比我飲   話番屋企一定要有湯飲   咁 9 點幾打比家姐   家姐話諗下番唔番先   媽咪就話佢睇埋 "走過浮華大地"    11 點先瞓   咁 11 點打嚟都得   聽到咁講   我個心好實   媽咪真係好錫我   因為平時佢話 10 點已經瞓   為咗想我飲湯竟然話 11 點瞓   所以家姐 9 點幾都打番比媽咪話番嚟食飯   我成日都講   食飯簡簡單單得啦   聚下之嘛   唔駛刻意諗住咩煲啲咩   我食咩都無所謂嘅   因為我真係唔想媽咪咁辛苦囉 ~

上到屋企   家姐即打機   之後叫我開電視   仲以為佢睇   點知仍都係打機無睇   咁做咩要開喎   真係呢 ~

佢坐到 9 點幾就走   我飲埋碗中藥就沖涼喇   里奧大人差唔多 10 點就番到屋企   又一齊睇下電視   11 點幾就瞓喇   呢排仲係好攰咁呢 ~   

三色椒炒黑椒牛丸 + 油麥菜 + 叉燒炒飯 ( 27-AUG-2013 )

( 27-AUG-2013  TUE )

尋晚 4 點幾去廁所   見到里奧大人喺廳睇電視   佢話諗公司嘢諗到瞓唔着   真係好大壓力咁噃   真陰功 ~

今朝起身都有少少攰   不過沖咗涼就精神啲呢 ~   

早餐食腿蛋治烘底   依家佢哋都知我烘底要大火   因為我真係唔鍾意食烘底啲麵包好似無烘過咁囉 ~

菇場唔忙   又做下自己嘢都唔錯 ~

食完 Lunch Box 就出去行下   買咗 2 盒冬蔭功百力滋就走喇   因為條街真係好鬼熱囉 ~

里奧大人 5 點見客   所以可能會早啲番到屋企   咁我放工即去街市買餸   番到屋企即煲中藥   再預備晚餐   搞掂就開機洗衫同拖地   雖然開咗冷氣   都出汗呀   有啲虛脫嘅感覺 ~  

7 點預備   里奧大人 7 點 45 分已經番到屋企   不過仲要等多 10 分鐘先可以食呢   所以煲中藥真係要預多啲時間煮飯呀 ~

是日晚餐 - 三色椒炒黑椒牛丸 + 油麥菜 + 叉燒炒飯

三色椒炒黑椒牛丸 - 好想食三色椒同黑椒牛丸   不過啲丸真係貴   6 粒都要 $10.5   可能買得少會貴啲   下次買 1 磅   咁唔駛成日去買 ~

油麥菜 - $10/斤   唔想樣樣都炒   所以灼熟算喇   蘸甜豉油一齊食都唔錯 ~

叉燒炒飯 - 喺太興買 $22 瘦叉燒   再加啲蔥花去炒   好好味呀 ~

搞掂哂又 9 點   沖埋涼再食埋車厘子就抖喇    勁攰呀 ~

參巴醬炒青豆角 + 煎墨魚卷 ( 26-AUG-2013 )

( 26-AUG-2013  MON )

今朝好攰咁呀   加上天氣勁爆熱   仲更加攰呢 ~

早餐食芝腿治烘底   見到人哋食麵又好想食   不過真係食唔落一個麵餐   所以望下都好開心㗎喇 ~

菇場忙到 10 點幾就 Hea 過喇   一到 Lunch Time 就食 Lunch Box   係尋日食剩嘅 Tea 囉   但又好好味喎   自己煮到咁好味就好 lu ~  

食完就陪 8 卦去萬寧買 K 仔同糖   其實 K 仔即係 Airwaves   因為菇場太靜   一定要食勁薄荷嘅嘢嚟上電   如果唔係會無厘神氣   真係瞓着到似   所以就叫 K 仔喇   有次我好自然咁問里奧大人有無 K 仔   佢好愕然問咩叫 K 仔   咁又驚啲嘅   K 仔喎   哈哈 ~  

里奧大人 4 點見客   感恩 5 點已經見完   所以佢早番過我呢 ~

番到屋企就即煮飯喇   趕到我呢   不過可以同里奧大人一齊 7 點食飯就真係好開心嘅 ~ 

是日懶餐 - 參巴醬炒青豆角 + 煎墨魚卷

參巴醬炒青豆角 - 清埋呢包醬就無喇   實在太開心   因為可以喺 Expiry Date 29/8 前煮埋去   今次加咗 100ml 水嚟煮   所以煮嘅時候覺得好鬼辣   係咁打噴嚏   之後里奧大人食嘅時候話好辣   仲話我煮嘅時候   聞到都好辣   又聽到我煮嘅時候係咁打噴嚏   都知呢碟嘢都係辣喇   哈哈 ~

煎墨魚卷 - 尋日買定㗎喇   $20/半磅   里奧大人話好食   咁就好喇   諗唔到煮咩就可以買嚟做餸   唔駛煩 ~

食完洗埋碗都只係 8 點幾   真在太好   今日好攰   所以都唔徑步喇   沖埋完食埋生果就睇電視休息   10 點 45 分就瞓覺喇 ~

香檳京都骨 + 楊州炒飯 + 青紅蘿蔔粟米豬骨湯 ( 25-AUG-2013 )

( 25-AUG-2013  SUN )

今朝 9 點半鬧鐘響   里奧大人就沖涼先   我就喺度懶床   呢排好攰   真係唔願起身囉 ~

我真係好攰   里奧大人又要幫佢姐夫整電腦   所以都唔番教會喇 ~

食完早餐就去街市買煲湯料同菜   買完就即番屋企   條街勁熱呀 ~

番到屋企抖陣   差唔多 1 點就煲湯   里奧大人姐夫無耐就到屋企   佢有哋地整   我有我打機 ~

今日 PokaPang 有 Extra Bonus   所以到咁上下時間要 Stand by   都幾緊張   哈哈 ~

里奧大人姐夫話好餓   所以 2 點半就叫外賣 Tea   食下傾下都差唔多 4 點   之後佢哋又繼續搞電腦喇 ~

佢哋終於 5 點幾搞掂   佢姐夫就番屋企   可惜我煲湯仲係太多水   無厘味道   要再開大火煲半個鐘   如果唔係叫佢飲碗湯呢 ~

紅蘿蔔湯太利尿   所以煲完即飲   費事夜晚成日去廁所   咁樣仲衰   瞓得唔好 ~

7 點預備煮飯   今餐完全無難度   就咁炒番熱就得 ~  

是日懶餐 - 香檳京都骨 + 楊州炒飯 + 青紅蘿蔔粟米豬骨湯

香檳京都骨 - 個汁好味道   但尋晚食個汁無咁甜   今晚食就好甜呢 ~   

楊州炒飯 - 如果我炒到咁乾身   咁粒粒分明就好 lu ~ 

青紅蘿蔔粟米豬骨湯 - 今個星期無湯飲   所以就要自己煲喇   太耐無煲   又係煲到無咩味 ~

搞掂哂抖 45 分鐘就同里奧大人一齊去徑步喇   太耐無徑   所以徑 5 個圈   出咗成身汗   番到屋企即沖涼   啲感覺真係爽到陣   之後食埋生果就休息 lu ~

星悅鮮廚 @ 官塘 ( 24-AUG-2013 )

豉汁蒸黃立鯧 - 都好厚肉   好味呀

香檳京都骨 - 里奧大人想食   因為酸酸甜甜幾好味  但食剩一大半   要打包

金銀蛋莧菜 - 都好多鹹蛋皮蛋

炸脆雞 ( 半隻) - 隻雞好似好瘦咁 

楊州炒飯 - 里奧大人要食   但我無食呀   媽咪同工人又食白飯   所以又要打包啦

( 24-AUG-2013  SAT )

今朝同 8 卦食早餐   今朝有佢喺度真係好   因為食唔哂比佢食   佢話飽   不過我都一定要佢食   佢又係一個唔浪費嘅人   實在太好 ~

真係超級邪   又係 11 點 50 分先忙   忙到放工都未做完添呀   但我都唔會做埋   如果做埋真係 2 點都唔駛放工呢 ~

今日媽咪出院   家姐之前話接出院然後去鴻星飲茶   咁我都番屋企附近行下先   差唔多時間就去攞位   不過之後家姐話媽咪唔去飲茶   咁我都番屋企煲中藥同開機洗衫 lu ~  

差唔多 3 點幾就同家姐食 Tea   里奧大人又啱啱同水公 晴晴買完電腦   諗住一齊食   不過佢要等埋水姑   咁我唔等 lu   同家姐食算   點知食完走喇   佢仲等緊水姑   黐鬼線 ~

炸雞肶薯條 - 可能因為想快啲炸熟   所以將隻雞肶界開   炸完出嚟完全唔似隻雞肶   家姐話隻雞肶唔入味   我話預咗啦    

牛雜河 - 家姐最驚啲蔥   但當我叫牛雜河時   佢同我一齊講多蔥   算佢啦 

炸魚皮 - 食到最後 1 嚿嘅時候   問家姐覺唔覺有羶味   佢話有呀   仲話唔敢同我講   驚我唔食   其實我想同家姐食好耐啦   睇下佢有無覺得有羶味   不過家姐話應該係腥   我話是但啦  因為唔會再食囉

我番到屋企   里奧大人打嚟話唔等喇   番屋企 Set-up 電腦好過 ~

今晚同媽咪食飯   因為里奧大人知媽咪出院   又好耐無探佢   所以話一齊食飯   順便幫媽咪換屋企電話   今日佢都頻頻樸樸   我見到都攰呢   哈哈 ~

6 點半食飯   要就媽咪打針   食完就上媽咪屋企坐下   食下生果   8 點半就打針   等媽咪搞掂哂就番屋企 lu ~

媽咪又比咗 1 磅車厘子同 4 個橙比我   好在里奧大人幫手拎   等佢知道我次次番親媽咪屋企都有唔少嘢拎走   好重呢 ~ 

錦日本料理 @ 九龍灣 ( 23-AUG-2013 )

天婦羅飯定食 (配迷你烏冬)

天婦羅蝦咖哩鍋燒烏冬 ( 配迷你三文魚粒飯 + 雜菜薯餅 )

雜錦魚生角切粒飯

蟹籽沙律

( 23-AUG-2013  FRI )

尋晚食到好飽   今朝要食齋包   我次次食奶油豬仔包都話要燶啲同多啲奶油   不過今次就超勁多奶油囉   所以啲包超索哂啲煉奶   超勁甜   搞到我食唔哂添 ~

菇場忙咗陣就 Hea 喇   呢幾晚都探媽咪   雖然去到都係坐喺度傾偈   但都好攰   番到屋企真係沖完涼就抖   咩都唔做   最多開機洗衫㗎咋 ~

11 點幾媽咪打嚟話今日姑娘教打針   再見埋營養師   咁聽日就可以出院   係就好喇   我唔駛頻頻樸樸   同埋成日覺得醫院好多菌   所以都係番屋企好啲咁呢 ~

Lunch Time 落勁大雨   好在之前喺阿信屋買咗個激辣杯麵   今日終於食喇   真係好激辣   正呀 ~

又 Hea 到放工喇   今晚睇中醫   如果時間許可就探埋媽咪   所以又係急急腳咁行   唔想浪費一分一秒   哈哈 ~

今次又係差唔多 20 人排隊   咁我行到隊尾   突然聽到有人叫我   原來係煩單   佢排第一呀   佢叫我一齊入去睇   因為咁排起碼要個幾鐘   我真係同佢一齊入呀   因為我真係好想探媽咪   其實我都衰㗎喇   咁樣打尖   所以佢話下次佢真係幫我排   等埋我先一齊睇   因為好多人都係咁呢 ~

今晚好在睇到中醫   因為我其實喉嚨痛又耳仔痛   原來又係扁桃腺發炎 ~  

真係好感恩   因為我遲一步到診所就見唔到舊同事   到時我就有排等 lu   之後同埋佢陪埋我一齊行   佢搭地鐵   我就坐巴士   好感恩 7 點 20 分到醫院呀   因為無諗過可以探到媽咪呢 ~

今晚姑娘會再教媽咪同工人打針   但媽咪想我同家姐一齊聽   不過姑娘要 8 點後先可以教到   我哋又可以留耐啲   實在太好喇 ~

姑娘 8 點 15 分就開始教   不過其實都唔係好難   最緊要係媽咪同工人記得   同埋好感恩支針真係好幼同好細支   咁樣見到都無咁驚嘛   哈哈 ~

搞掂哂都差唔多 8 點 45 分   里奧大人又到咗九龍塘   咁我哋都差唔多時間番到九龍灣   可以一齊食飯 lu ~

同家姐食飯   多數食佢鍾意嘅日本嘢   諗住食完去金滿堂食甜品   不過要排隊   仲要坐出面   所以唔喇   熱辣辣咪搞   同埋驚一陣落雨要走鬼   咁咩 Mood 都無哂 lu ~   

番到屋企又即沖涼   之後打機再睇陣電視   11 點 15 分即瞓   因為對眼皮塌哂落嚟喇 ~

Ruby Tuesday @ 九龍灣 ( 22-AUG-2013 )

Build Your Own Sampler (Ruby's Chicken Wings / Onion Rings / Breaded Shrimp /  Fried Mozzarella)

Onion Rings - 呢個一定要食   因為恨食好耐呢 

Fried Mozzarella - 好食但好漏

啲芝士可以拉到好長   好好玩

Breaded Shrimp - 都好味   因為新鮮炸起嘛  

Ruby's Chicken Wings - 超正呀   越食越辣

A Half Rack of Fork-Tender Ribs - 要 Classic 味道   因為要就里奧大人唔食辣

呢個薯蓉好大個呀   但超好味   因為好香牛油味   不過食剩一半   因為真係好漏

Steamed Mussels - Waiter 話係是日精選   $48/10隻   不過唔好食  

Salad - 依家加到 $108 lu   今次講明夾咗就要食哂   因為真係唔想嘥嘢   我哋夾緊嘅時候   有 3 個男仔喺度夾   佢哋砌到好似蛋糕咁   但就好自私   因為碟薯仔 Refill 咗之後   佢哋居然夾咗 2/3   我覺得食得哂無問題   但就唔好夾哂人哋吖嘛 

( 22-AUG-2013  THU )

今日係里奧大人生日   祝佢生日快樂   身體健康  事業順順利利呀 ~

好感恩今日佢唔駛上大陸   咁可以同佢食飯慶祝呢 ~

早餐食腿蛋治   又係食到一半好飽咁   又留唔到做 Lunch   因為啲包索哂啲油   蛋又凍哂   咁食都幾難頂 ~

菇場唔忙   後面同事又 Off   我可以 Full Screen 上網真係超級爽呢 ~

我同家姐依家都玩緊 PokoPang   但又唔係好識   所以直接問家姐同事   傾咗 25 分鐘   但其實只係用咗 3 分鐘講 Game 嘅嘢   佢把聲同啲語氣超級勁似家姐   我話真係 95% 似   如果整鬼里奧大人   佢一定上當呀   哈哈 ~

Lunch Time 又未餓   見無落雨就出去行陣先買嘢食   去完超市買嘢   之後再買咗 2 件外套同 2 條 One Piece   原來都已經點幾喇   要去埋買 Lunch 番菇場食喇 ~

放工唔坐直接巴士到醫院   諗住坐到屋企附近再轉車   點知邪到爆   尋晚 5 點 47 分先到   今晚 5 點 42 分就到   眼白白睇住架巴士喺我面前經過   而我仲未等到巴士   之後落車想轉另一架巴士   咁我一落車就見到前面有架巴士駛開   點知就係我想轉嘅巴士   激鬼氣   所以直接行去醫院   到醫院門口   見到對面巴士車尾   再睇清楚   原來係本身想坐果架巴士   有啲暈啦 ~

頭先行完真係腳又震   又標哂汗   去到醫院咩都唔理即坐低抖呀   好在媽咪叫工人烚咗幾隻雞蛋   抖咗半個鐘再食埋隻蛋   補充番啲體力 ~         

見到媽咪精神唔錯   聽日就教佢點打針   同埋見營養師   咁應該好快出得院 lu   感恩感恩 ~

里奧大人 7 點 45 分放工   我同家姐 工人都係 8 點先走 ~

去到德福見到里奧大人   同家姐喱埋嚇佢   見佢正想打電話比我   咁家姐就走去推佢   不過家姐推得唔係好大力   所以佢都唔係好驚 ~

之後一齊行去 RT   Book 左 8 點半   不過都要等多陣先有位呢 ~

唔知係咪太多人   所以都好焗   初初仲諗住驚凍添 ~

一坐低即睇 Menu 喇   大家都好鬼餓   今次又係爆肚食唔到甜品 ~

食到 10 點幾就走喇   同埋家姐一齊行到巴士站就分手喇 ~

實在太焗熱   番到屋企即沖涼喇   睇多陣電視   又 11 點幾先瞓添 ~

錦日本料理 @ 九龍灣 ( 21-AUG-2013 )

雜錦魚生角切粒飯

鮮帶子併三文魚飯 (帶子大號 1 粒 + 三文魚 5 片)

炸雞軟骨

( 21-AUG-2013  WED )

好攰呀   擔心係令人最攰   我覺得心靈上嘅攰係痛苦過肉體上嘅攰   因為會成日掛住家嘛 ~

呢朝好餓   但叫完早餐又唔係太想食 ~

菇場唔忙呀   今次真係勁想瞓   無咩 Mood 上網 ~

Lunch Time 出去食   之後同家姐去阿信屋買咖啡   不過無得買添   實在太焗熱喇   所以都唔再周圍行   即番菇場呢 ~

放工去探媽咪   唔駛買嘢就坐巴士   慳番唔少錢   又係差唔多 6 點 20 分到醫院   見到媽咪都幾精神   之後媽咪話糖尿指數已經趺到 12   都唔錯啦   但食咗幾塊梳打餅之後就去番 20   真係睇唔出幾塊梳打餅咁勁 ~

家姐 6 點 45 分又到埋   傾下偈又到 8 點    又係時候走 lu ~

里奧大人 7 點半已經喺羅湖   不過佢唔同我哋食   係都要食 KFC   咁唔理佢喇   因為我唔想食 KFC 呀 ~

唔想太夜瞓   所以同家姐番屋企開機洗衫   之後再去食嘢   一落大堂就見到里奧大人拎住 KFC 外賣番嚟   看更見到都好奇怪   點解我出佢入   哈哈 ~

家姐真係好鍾意食日本嘢   睇 Menu 會好認真睇   咩都想食咁   如果食中餐   佢個樣係唔同啲  咩都話是但 ~

食完同佢去睇衫   之後再去阿信屋買咖啡   感恩買到   送埋佢搭車就番屋企 lu ~

番到屋企即沖涼   食埋生果就打機   又 11 點半先瞓添 ~  

煎餃子．專門店 @ 九龍灣 ( 20-AUG-2013 )

韭菜煎餃子

原味煎餃子

滷水雞翼米線

菜心

( 20-AUG-2013  TUE )

尋晚睇埋電視   差唔多 12 點先瞓   今朝起身真係好攰下   哈哈 ~

早餐食奄列餐   不過真係食唔哂    留咗半份奄列做 Lunch 都唔錯   因為 Lunch Box 得三色椒同生菜   有蛋可以飽啲 ~

菇場忙呀   忙到 Lunch Time   番工時間過得咁快真係好 ~

3 點幾媽咪打嚟話要入院   個心即刻離一離   原來尋日覆診抽血   驗到有糖尿呀   咁我問指數幾多   佢話醫生話高到不能再高   所以要入院   因為媽咪食好多藥   再加埋糖尿藥   啲藥要調教過   所以要入院睇下啲藥食咗啱唔啱   仲話要打針   我都無咁好氣   平時叫佢唔好食呢樣嗰樣   佢又係都要食   依家有事又嚟驚   我話呢啲係自己攞嚟   妳預咗係咁結果 ~

雖然我都衰   咁樣話佢   但真係好鬼火囉   唔鬧都偷笑   不過話完佢   我又開始擔心啦   之後頭又痛身又凍   勁想快啲放工探佢呀 ~

唔駛買嘢比媽咪食   所以坐巴士   去到差唔多 6 點 20 分   都幾耐下噃 ~

去到見媽咪都無咩嘢   見到姑娘幫佢打胰島素針   支針頭都好細枝   打完媽咪都無嘢   直情話唔覺打針添呀 ~

話完媽咪一輪就問佢糖尿幾多度   佢話 27.x   正常人好似係 5-6   咁真係好高下   等我今日仲特登買糖比媽咪食添   其實食一粒半粒都 OK   但媽咪次次一食就食好多呢   所以我比哂家姐算喇 ~

家姐 6 點 45 分都嚟到   咁啱媽咪要吊鹽水   最勁係半個鐘頭就要換過包鹽水   不過見到包鹽水都滴得真係好快 ~

里奧大人 7 點半放工   咁我同家姐 工人都 8 點走喇   家姐番屋企食飯   我同里奧大人就去食餃子 ~

好攰呀   番到屋企即沖涼喇   睇陣電視   11 點即瞓喇 ~

咕嚕魚柳 + XO 醬西生菜 ( 19-AUG-2013 )

( 19-AUG-2013  MON )

尋晚將冷氣風口位向住我   瞓得唔錯   一早應該咁啦   點解里奧大人依家先諗到嘅呢 ~

不過尋晚發 2 次夢都係沖涼   里奧大人係都要話我因為凍喎   因為佢次次發夢沖涼就等如凍   大佬   你還你我還我好喎 ~

雖然瞓得唔錯   但都有啲攰   但食完早餐又好啲㗎噃 ~

菇場唔忙   所以 8 卦又嚟 Skype 係咁講派帖啲嘢   又話 OK 熟嘅朋友唔嚟   問咗幾次都唔嚟   因為驚悶   保險經紀 2 年前話結婚時通知佢   佢實到   不過同佢講咗都無覆到 8 卦   咁我咪話囉   朋友唔嚟咪唔嚟囉   又同人講另一朋友會到唔會悶   又咁又咁   係都要人嚟咁   其實人哋第 1 次話唔嚟就唔嚟啦  係咁叫人嚟做咩   又幫人分析唔會悶   我覺得咁樣好煩   之後再講個保險經紀唔嚟   我話極度正常啦   如果佢啲客 1 個月內有 20 個人派帖比佢   佢全部都去飲咩   你自己諗都諗到啦   8 卦成日話請人飲只係想有人替佢開心   但其實我覺得佢請飲係 "有殺錯無放過" 心態囉   好似佢同 A/C Dept 唔熟   人哋做咗個幾月都請   我就覺得唔好啦   將心比己   人哋請你   你都覺得怪啦   所以佢成日要問人到唔到   話因為酒席要預位   我心諗   有 2 圍走盞又怕咩呀   心態係驚蝕 1 圍無人到   唔係驚唔夠食囉 ~

今日有 Lunch Box   諗住食完出去行   點知又落大雨   咁又繼續上網啦 ~

4 點開始忙   但都會準時放工   今晚唔駛買餸   番到屋企即煲中藥再預備晚餐   食埋生果就拖地   之後里奧大人 8 點打嚟話放工   咁我都煮飯 lu   等埋佢番屋企先一齊食 ~  

是日晚餐 - 咕嚕魚柳 + XO 醬西生菜

咕嚕魚柳 - 喺佳寶買 1 Pack 鯰魚柳都係 $10 咋   又抵喎   因為有 2 塊嘛   但今次煎到樣衰衰   已經落生粉㗎喇   但都係散哂   好在個汁都整得好味   唔係真係連自己都唔想食呀   哈哈 ~    

XO 醬西生菜 - 今晚食埋佢棵生菜喇   我唔係咁鍾意啲醬係凍冰冰咁食   所以炒番熱 XO 醬   本來想加埋生菜兜幾兜   不過驚里奧大人一陣又話辣   又承機唔食菜   點知佢真係話辣呀   我話唔好有食 XO 醬嗰啲咪唔辣囉   又唔係兜埋一齊 ~

雖然今晚無落雨   但好焗   所以又無徑步喇   不過今日其實都好攰   我都唔會徑步喇   我試過好攰但照去徑步   諗住精神啲   點知仲攰 ~

梅菜蒸鯇魚 + 臘潤腸炒西生菜 ( 18-AUG-2013 )

( 18-AUG-2013  SUN )

今朝 10 點鬧鐘響   不過就懶床   瞓到 11 點呀   之後即刻梳洗就去食早餐喇 ~

又無番教會喇   咁我就去街市買餸啦   唔知係咪吽雨   熱鬼到呢   買完餸成身汗呀 ~

睡房冷氣成日向住天花板   所以天花板間唔中都有虱㗎   尋日里奧大人用漂白水抹哂成個天花板   咁我都順便抹埋窗同櫃   搞掂哂就噴埋虱水   殺哂所有虱   爽呀 ~

望下個鐘已經 2 點幾   即刻沖涼之後去食 Tea   食完就番屋企   再去舖頭   咁番到屋企都 4 點 lu ~

番到屋企抖喇   里奧大人就瞓咗陣   之後飲埋湯   我又要預備煮飯喇 ~  

是日懶餐 - 梅菜蒸鯇魚 + 臘潤腸炒西生菜

梅菜蒸鯇魚 - 好耐無整魚比里奧大人食   今次去另一檔買   因為多人買   呢嚿鯇魚 $15   估唔到好味喎   因為唔腥   之前果檔有啲腥咁 ~   

臘潤腸炒西生菜 - $13/2 個又抵喎   因為我想帶 Lunch Box   所以加咗臘潤腸呢 ~

今日又焗   又滕嚟滕去   有啲頭痛呀   所以唔徑步喇   沖完涼再食埋生果就熨 2 機衫   個半鐘搞掂   算快喇   里奧大人慘啲   今日頻頻樸樸做唔到公司嘢   所以做到 11 點幾呀 ~

海港酒家 @ 將軍澳中心 ( 17-AUG-2013 )

黃金蝦餅 - 好彈牙   好味道  


海港燒鵝皇 (半隻) - 唔羶   好味呀

滷水掌翼 - 得我食咋   實在大滿足呢

四川口水雞 - 邪爆   今次到我想食口水雞   但今次居然係最難食嘅一次   完全唔麻辣

順德欖角骨 - 無食呀   呢餐太多肉

漁香海鮮燒豆腐煲 - 呢個餸食到麻木哂啦

( 17-AUG-2013  SAT )

今朝 8 點起身   但都係勁唔想起身   哈哈 ~

早餐食碎蛋吞拿魚飛碟   無咁脆邊 lu   都係第一次最好味   依家次次都好似好求其咁囉 ~

菇場 Hea 到 12 點   之後忙喇   次次都星期六差唔多放工先忙   邪到爆 ~

里奧大人 11 點約姑奶飲茶   飲到 12 點   咁我放工又未餓   所以叫里奧大人自己出去黃金睇電腦   我唔鍾意迫呀   番屋企好過 ~

2 點開始餓喇   懶得落街   煮個米粉算喇 ~

食飽之後抖陣就抹嘢   搞掂又抖下   里奧大人差唔多 4 點半就番到屋企   話好在我無去咋   超勁多人   我實會發脾氣咁話喎   因為我上次同佢去   雖然唔多人   但係好焗囉   同埋我又無興趣睇   所以覺得又焗又悶   好想快啲走呢 ~

今晚水姑提早請里奧大人食生日飯   所以又去將軍澳喇 ~

之前里奧大人姐夫約里奧大人星期六食飯   里奧大人話好   佢姐夫話你知點度呀可   里奧大人話你仲有邊度吖   佢姐夫就話你知邊度就好喇   妙問妙答   次次約親食飯都係海港啦   除非海港執咗就無得好講啦 ~

7 點食飯   今晚得 4 個人   傾下食下都 9 點 lu   之後再上姑奶屋企拎嘢   又傾下偈   差唔多 10  點半先走   番到屋企都成 11 點幾   沖埋涼睇陣電視   1 點先瞓呀 ~

住家飯 @ 媽咪屋企 ( 16-AUG-2013 )

三色椒炒帶子


咖哩雞

陳皮絲蒸鮑魚


炒唐生菜

皮蛋酸薑

合桃蓮子百合當參豬骨湯

西瓜

Chocolate Banana Cream Cake @ Cova

2 layers of Chocolate Sponge cake filled with mixture of dark chocolate, fresh cream  & banana, topped with strawberries & banana chips

( 16-AUG-2013  FRI )

又 Happy Friday 喇   今日又係天陰陰   好在無落雨啫 ~

早餐食腿蛋治   好耐無食喇   覺得幾好味咁呢 ~

菇場唔忙   不過我都唔想忙   哈哈 ~

今日有 Lunch Box   如果我有帶 Lunch Box 嘅話   我會幫埋其他同事叮飯   其實都幾好㗎   睇下人哋食咩餸嘛   咁唔駛下下諗煮咩   有個男同事嘅餸次次都係蕃茄豆腐湯渣同烚白菜   另 1 個女同事就係烚菜心蒸排骨   啲排骨仲唔係豉汁蒸嗰隻喎   有次忍唔住同佢哋講   你哋食得好清   原來係屋企老人家煮   唔怪得啦   不過其實我媽咪都煮得好清   係我同家姐番屋企食先煮啲濃味嘢   我成日覺得清即係無咩味   留番老嘅時候食到未遲啦 ~

好快又放工咁   里奧大人上咗大陸   我又番媽咪屋企食飯 lu ~

家姐今晚早咗少少番屋企   不過都係差唔多 7 點先食飯   今晚真係要留肚喇   因為要食蛋糕呢 ~

媽咪買咗 1 磅龍眼比我   又切咗 2 盒西瓜   加上拎埋湯同蛋糕    足足 10 磅   所以次次番到屋企一放低啲嘢   就有一種大解脫嘅感覺呀 ~

今晚同家姐 9 點先走   估唔到里奧大人早番過我少少   咁我沖涼先啦   之後差唔多 10 點飲埋杯中藥   但里奧大人就入房瞓喇   但我實在太飽   所以瞓唔到   咁就繼續睇電視啦   之後差唔多 11 點半就瞓 lu   因為聽日要番工呢 ~

參巴醬炒蝦仁 + 蒜蓉蒸帆立貝 ( 15-AUG-2013 )

( 15-AUG-2013  THU )

雖然打風過後   但今朝無落雨喎   不過就好大風 ~

早餐食熱狗餐   我覺得細隻咗呀   好在都夠飽 ~

菇場唔忙   依家間唔中都會同隔離同事傾下偈   新嘅同事好多都 OK   係舊嗰啲同事比較怪   成日以為自己做咗好耐好有地位咁   但其實又唔係有料嗰隻喎 ~

食完 Lunch Box 就出去行下   如果條街全部都係有瓦遮頭就最好   真係落雨都唔怕   同埋可以日日食完 Lunch 就去散下步呢 ~

今日全日都天黑黑   不過好在無落雨咋   但都唔去街市買菜喇   反正屋企有什豆   去超市買棵蔥算喇 ~

番到屋企預備晚餐同煲中藥   搞掂就抖陣   里奧大人 7 點打嚟話放工   咁我都煮飯喇   佢番到屋企   我都係啱啱煮好咋   所以次次煲中藥都係要預多啲時間   得一邊爐煮嘢好唔方便呢 ~  

是日晚餐 - 參巴醬炒蝦仁 + 蒜蓉蒸帆立貝

參巴醬炒蝦仁 - 包醬料 11/8 到期   所以又清埋去   不過里奧大人話辣   我又唔覺喎 ~  

蒜蓉蒸帆立貝 - 勁想食蒜蓉   所以就整呢個餸喇 ~

搞掂哂就想出去徑步   不過里奧大人話地下濕   叫我唔好出去叮   所以我都沖涼喇   之後喺屋企做下運動算 lu ~