Green Monday 魚香茄子 + 香煎墨魚卷 + 超甜粟米 ( 5-AUG-2013 )

( 5-AUG-2013  MON )

又星期一喇   尋晚瞓得唔錯   今朝都好精神呢 ~

天氣爆熱   好在都有 d 風   所以都幾舒服咁 ~

早餐食粟米碎蛋飛碟   無想像中咁飽肚喎   但食吞拿魚碎蛋飛碟呢   食半份已經開始飽架噃 ~

我部腦仲未搞掂   所以有 d 嘢仲 hold 住做唔到   好在唔多咋   唔係又要一下子堆住要做咁好煩囉 ~

好快又到 lunch time   今朝買咗菠蘿包同合桃蛋糕做 lunch   諗住 lunch 食菠蘿包   tea 食合桃蛋糕   點知食完個菠蘿包都唔飽嘅   隔咗半個鐘再食埋個合桃蛋糕   叫做啱啱好啦   慘 ~

嘩   邪到唔邪   已經餓啦   8 卦無啦啦講聽晚約人食飯   有咩好介紹   一講就講哂我自己想食嘅嘢啦   講下講下連佢都話餓呀   所以我話唔好再講喇   我已然好辛苦呢 ~

放工即走去街市買菜餸  番到屋企即食隻大蕉補充體力   之後抖陣   里奧大人差唔多 7 點半打黎話放工   咁我都預備煮飯 lu ~   

是日懶餐 - 魚香茄子 + 香煎墨魚卷 + 超甜粟米

魚香茄子 - $7/3 條   今次又係用魚香茄子醬   再加 d 辣豆辦醬   惹味好多呀 ~ 

香煎墨魚卷 - $20/半磅   買咗半磅   特登煎比里奧大人食架   同埋我聽日又可以帶飯呢   今次用慢火煎   都無咩心機煎   下次焗熱算喇   哈 ~

超甜粟米 - $12/3條   勁想食呀   不過一次食哂好飽囉   依家有 d 驚喇 ~

搞掂哂再沖埋涼都差唔多 9 點幾   里奧大人本來話食完生果就跑步   之後又話唔跑   想陪下我喎   係鬼咩   自己攰就攰啦   佢沖完涼就食生果   不過我真係食唔落呀   下次都係唔好食咁多粟米   有 d 頂胃咁 ~