住家飯 @ 媽咪屋企 ( 7-AUG-2013 )

皮蛋酸薑 - 媽咪自己醃嘅酸薑   正呀

蒜蓉辣椒蒸魚雲 - 媽咪一早蒸起咗放喺枱   因為未煮好飯   咁家姐番到黎飲湯又食其他餸   我捉住家姐隻手唔比佢夾碟魚雲   我話係生架   之後媽咪話蒸好咗架喇 @.@   真係唔講唔知係熟囉   同埋覺得都係酸梅麵豉蒸就好味 d 呢  

脆肉瓜炒鮮帶子

冬菇燜五花腩 - 勁入味   正   不過都係鍾意冬天食燜餸多 d   因為 d 汁可以送飯   但夏天就無咩飯癮咁囉


炒油麥菜

當參蓮子百合豬展水鴨湯

車厘子 - 呢期嘅車厘子真係好甜   好難得呀

( 7-AUG-2013  THU )

今朝又係爆熱   唔通之後真係會狂風雷暴大驟雨   唔好放工先黎落就得架喇 ~

早餐食奄列餐   其實我麻麻地鍾意食蛋   不過呢個奄列入面 d 汁好味   好有兒時味道   所以先食呢   哈 ~

菇場唔忙   依家隔離位有人坐啦   不過我都無同佢傾計   佢咁忙   我都唔好意思講嘢   同埋菇場太靜   講嘢全世界會聽到囉 ~

Lunch time 未餓   所以行陣先食嘢   食完再去超市買嘢   之後去 Panash 買丹麥酥比家姐   再去埋一田買冷麵就番菇場喇 ~

家姐聽日唔得閒   所以今晚一齊去媽咪屋企食飯   食下傾下   講開我由細到大都好鍾意食薄荷嘢   我買糖都係首選薄荷味道先架   家姐最驚   大個之後仲更加鍾意薄荷呀   因為夠醒腦醒神嘛   不過有 d 人話似牙膏味   我又 ok 喎   不過就唔係咁鍾意薄荷飲品   因為到覺得好似飲漱口水咁呀   哈 ~

8 點半同家姐一齊走喇   咁我去完廁所就直接出門口   之後家姐串串共話妳就咁走呀   嘩   我完全唔記得拎 lunch box 同湯呀   之後望下個袋   無啦啦多咗 5 隻蕉同一個火龍果   應該係媽咪係都要比我啦   驚我無生果食   其實我依家都開始每晚食生果呢 ~  

里奧大人唔駛上大陸   仲諗住佢會無咁遲放工   點知一樣係咁遲   佢想食叉鴨飯   咁我話先到先買啦   不過今次排好耐隊   所以我買完番屋企嘅時候   佢已經喺大堂等緊 lift ~

番到屋企即煲中藥同開機洗衫喇   里奧大人唔做公司嘢   所以陪我睇電視同食生果   唉   差唔多 10 點先飲中藥   不過我 11 點都瞓喇   希望今晚半夜唔駛去廁所啦 ~