咕嚕魚柳 + XO 醬西生菜 ( 19-AUG-2013 )

( 19-AUG-2013  MON )

尋晚將冷氣風口位向住我   瞓得唔錯   一早應該咁啦   點解里奧大人依家先諗到嘅呢 ~

不過尋晚發 2 次夢都係沖涼   里奧大人係都要話我因為凍喎   因為佢次次發夢沖涼就等如凍   大佬   你還你我還我好喎 ~

雖然瞓得唔錯   但都有 d 攰   但食完早餐又好 d 架噃 ~

菇場唔忙   所以 8 卦又黎 Skype 係咁講派帖 d 嘢   又話 ok 熟嘅朋友唔黎   問咗幾次都唔黎   因為驚悶   保險經紀 2 年前話結婚時通知佢   佢實到   不過同佢講咗都無覆到 8 卦   咁我咪話囉   朋友唔黎咪唔黎囉   又同人講另一朋友會到唔會悶   又咁又咁   係都要人黎咁   其實人地第 1 次話唔黎就唔黎啦  係咁叫人黎   又幫人分析唔會悶   我覺得咁樣好煩   之後再講個保險經紀唔黎   我話極度正常啦   如果佢 d 客 1 個月內有 20 個人派帖比佢   佢全部都去飲咩   你自己諗都諗到啦   8 卦成日話請人飲只係想有人替佢開心   但其實我覺得佢請飲係 "有殺錯無放過" 心態囉   好似佢同 A/C Dept 唔熟   人地做咗個幾月都請   我就覺得唔好啦   將心比己   人地請你   你都覺得怪啦   所以佢成日要問人到唔到   話因為酒席要預位   我心諗   有 2 圍走盞又怕咩呀   心態係驚蝕 1 圍無人到   唔係驚唔夠食囉 ~

今日有 lunch box   諗住食完出去行   點知又落大雨   咁又繼續上網啦 ~

4 點開始忙   但都會準時放工   今晚唔駛買餸   番到屋企即煲中藥再預備晚餐   食埋生果就拖地   之後里奧大人 8 點打黎話放工   咁我都煮飯 lu   等埋佢番屋企先一齊食 ~  

是日晚餐 - 咕嚕魚柳 + XO 醬西生菜

咕嚕魚柳 - 喺佳寶買 1 pack 鯰魚柳都係 $10 咋   又抵喎   因為有 2 塊嘛   但今次煎到樣衰衰   已經落生粉架喇   但都係散哂   好在個汁都整得好味   唔係真係連自己都唔想食呀   哈 ~    

XO 醬西生菜 - 今晚食埋佢棵生菜喇   我唔係咁鍾意 d 醬係凍冰冰咁食   所以炒番熱 XO 醬   本來想加埋生菜兜幾兜   不過驚里奧大人一陣又話辣   又承機唔食菜   點知佢真係話辣呀   我話唔好有食 XO 醬果 d 咪唔辣囉   又唔係兜埋一齊 ~

雖然今晚無落雨   但好焗   所以又無徑步喇   不過今日其實都好攰   我都唔會徑步架喇   我試過好攰但照去徑步   諗住精神 d   點知仲攰 ~