豉油王煎海蝦 + 臘潤腸炒菜心 ( 11-FEB-2014 )

( 11-FEB-2014  TUE )

好凍呀又   直頭凍過上年冬天   屋企開咗小小窗咋   都覺得好鬼凍呢   我無諗過市區都咁凍架 ~

早餐食腿蛋治   今次唔烘底   原來好味過烘底喎   因為 d 麵包好軟熟   好好味呀 ~

菇場忙到 11 點就搞掂   又可以做番自己嘢 lu ~

Lunch 出去食酸辣米線   之後再幫里奧大人拎褲去腳   行多陣就番菇場喇 ~

阿 head 話 5 點 15 分要開會   我見到佢叫埋 shipping 同事一齊開   仲以為因為 partner 走所以有嘢講   點知原來所有同事都要開會 ~

入到 show room 見到好多信封   原來係老闆派 bonus   話上年成績非常之好   盈利仍都非常之好喎   所以要同我地一齊分享   聽到之後勁開心啦   有 bonus 派喎   哈哈 ~

放工即走喇   要去街市買餸呢 ~     

番到屋企勁忙   燉肉汁同煲中藥   之後就浸菜   又要剪蝦鬚同蝦腸   搞掂哂就開機洗衫   諗住抖下先煮   但原來已經 7 點半   所以唔抖即煮喇 ~   

我今次買靚小小嘅當參同黑北芪   呢度 $260   每樣 10 兩      

是日晚餐 - 豉油王煎海蝦 + 臘潤腸炒菜心  

豉油王煎海蝦 - 1 斤海蝦 $64   我買咗 $50   因為我唔識睇靚唔靚   咁買住小小先   好味下次可以買 1 斤   估唔到 d 蝦都好彈牙   今次本來用美極煮架   不過過咗期   所以用豉油算喇   都一樣咁好味   哈 ~     

臘潤腸炒菜心 - 其實我諗住就咁灼熟就算架喇   不過煎臘潤腸時    見有 d 油剩咗   所以用黎炒菜啦 ~ 

今晚自己食先啦   里奧大人 8 點幾先放工   咁我食完就即刻洗碗   之後再拖地   真係番到屋企未停過架 ~

幫里奧大人洗埋碗就沖涼喇   都已經 10 點 ~  

又睇電視劇   差唔多 11 點 45 分先瞓   今晚都係要開電毯喇   實在太凍呢 ~