翠河餐廳 @ 官塘 ( 20-APR-2016 )

西檸軟雞 

生炒排骨

( 20-APR-2016  WED )

今朝里奧大人要去機場見客   所以又陪我食早餐   好開心呢 ~

菇場居然忙   咁都好   眨下眼又 Lunch Time ~

家姐話阿姨同婆婆會星期日探媽咪   我話未必得閒   之後唔知講開咩   話婆婆想我哋每晚探媽咪   我話都黐黐哋   唔駛做呀 ?!   叫佢自己晚晚探囉   講就天下無敵   之後家姐話其實我哋探得唔多   咁其實我都承認   探佢佢又瞓   同埋佢又唔珍惜   而得妳快啲走   咁點會有人想探妳呢 ?!   妳咁錫媽咪   叫妳探妳又話晚晚放 8 點   咁其實如果妳真係要探   妳望一眼都可以   妳覺得自己有虧欠嘛   所以唔好同我講話無時間呀   邊個住得近呢啲無謂嘢 ~

成日覺得同媽咪一齊住   佢就會好番咁   因為有人睇住佢食嘢同埋知佢做運動   我話佢忽上腦定啦   我 9 個鐘頭唔喺屋企   點睇住佢呀   核心問題唔係在於我呀   真係頂佢唔順   完全唔用個腦諗嘢 ~

今日有 Lunch Box   食完飽鬼到呢   仲食唔哂啲扁意粉添呀   但真係唔可以格硬食   因為已經飽到上喉嚨頂呢   唉   之後同自己講   短期內唔再食咖哩   嗚嗚 ~

仍然忙下停下   好快又放工 lu ~

今晚同媽咪 家姐食飯   我一去到媽咪屋企   佢當然係瞓啦   咁是但佢啦   之後我見到包魷魚絲   上次就見到包花生   唔應該食嘅都有齊   咁工人叫佢坐啦   我望到佢額頭好似黑黑哋咁   我話妳真係要郁下啦   成日又亂食哂   排唔到毒好煩㗎   郁多啲唔駛揹機   可以去遠啲食嘢   咁仲好啦 ~

咁家姐 Whatsapp 我   話想同媽咪食乳豬   咁我話是但啦   有事佢負責就得㗎喇 ~

之後同佢傾下偈咁啦   隔咗陣   佢無啦啦又話會死   又叫我對家姐好啲   我話妳放心   我對家姐好好嘅   之後佢又講聽日可能會死   我都唔理佢   咁驚死又亂食嘢 ?!   驚死就郁多啲啦   唔係就咁坐喺度嗌死死死   應該梗加積極面對人生啦 ~

家姐好激氣話無乳豬呀   我心諗都黐黐哋   乳豬幾咁鹹呀 ~

去到餐廳   媽咪又話死   可能聽日會死   我無出聲㗎   因為我唔覺得佢慘   只係覺得好煩   家姐話喎   醫生話妳無嘢   只係話妳懶   要郁多啲   我細細聲再同佢講   仲要唔好亂食嘢   之後媽咪話醫生話佢生 Cancer   我話點解咁講   佢話醫生同佢抽血咁講   之後我話妳咁勁嘅   出動到醫生同妳抽血 ?!   我話醫生係唔會同人抽血㗎   家姐再問點解咁講   佢話佢覺得   我真係好想話佢都忽忽哋   咁驚死就咪亂食嘢啦 ~

之後佢同家姐講   話我頭先話佢會死喎   呢下我火嚟   我話妳咪亂講   我無講妳死   工人都話無啦   之後我黑面   我唔食嘢   同埋我真係好飽   咁家姐仲話叫我唔好咁   我叫佢唔好再講   因為我已經好想喊   同埋我喉嚨已經谷到好難吞口水 ~

咁家姐問媽咪仲想食咩   佢話想食咖哩牛腩同豉汁炒蜆   家姐真係睇下餐牌有無   真係忽上腦 ~

媽咪應該知我好嬲   話我唔食嘢佢會好激氣   我想話慳啲啦   我全程都無望佢   不過家姐又食唔哂   我先格硬食   每樣餸剩 1/3 呀   無理由嘥嘛 ~

咁佢話隻狗依家每星期做一次針灸   每次五百蚊   我話一早就唔應該養狗啦   為咗間屋有生氣有聲就養   人地養狗係成日陪佢落街   唔係有病就帶佢睇醫生   比錢醫佢就好   之後佢話咁點解我要供樓   我都費事理佢   九唔搭八   養狗養到佢咁   其實個個都話啲狗最可憐囉   好在唔係得我話   唔係跟得佢哋多   真係以為得自己樣樣都係錯   佢哋做嘅嘢就最有智慧呢 ~

之後同佢講話媽咪今日都食咗雪糕新地   家姐好愕然   問我點解會知   我話我掉垃圾   見到垃圾桶有 2 個雪糕杯   即係媽咪同工人每人一杯啦   家姐話媽咪尋日打比佢   問佢可唔可以食雪糕   家姐話唔好   之後媽咪喊   我即刻話黐黐哋   所以我話其實佢問完妳都會買   打比妳真係好多餘   我仲話佢可能諗住呃埋妳話無食添   但人在做天在看   我好日唔會掉垃圾家嘛   點知一掉就見到雪糕杯   等如佢上次買蛋散咁   無諗過我會探佢   又比我見到   所以其實我都同家姐講   根本佢點都會買   是鬼但佢啦   唔好煩到我就得喇 ~    

同佢行埋萬寧就番媽咪屋企   媽咪第一句問我有無食哂嘢   我知佢知我嬲   咁我都好平淡語氣答佢話食哂   但就無望佢嘅   我覺得我唔走人已經好好 ~

我覺得媽咪隻腳係腫   但家姐話唔係喎   唔係硬嘅腫   叫媽咪郁多啲就得   我話佢郁先得㗎   不過妳話唔腫就唔腫啦   妳咁有經驗 ~    

之後同家姐傾偈   傾到 9 點走喇   其實家姐只係唔鍾意我唔比媽咪食嘢   覺得我好衰咁   但其實佢只會累死媽咪   不過頭先單嘢之後   我決定唔再話唔比乜唔比物   反正我話唔比   佢地會照買照食   由他吧   總知我對手無染到鮮血就可以了   妳哋鍾意點就點啦   唔好煩我   而我都唔再講咩   唔好問我意見  唔好叫我上網查依樣嗰樣   家姐叫工人同媽咪覆診嘅時候   錄低醫生講咩   我心諗都忽上腦   醫生叫媽咪唔好出街食   妳咪一樣同媽咪出街食   咁聽醫生講咩   對妳有乜很用呀 ?!   佢唔知我會陪媽咪覆診   不過我當日問完醫生嘢   我都會誇大醫生所講嘅嘢比佢知   睇下佢係咪仍然亂比嘢食比媽咪食   之後會問番佢   妳叫我聽醫生講咩   但妳又唔係聽醫生講   咁聽嚟做咩 ?!   睇佢點答   呵呵 ~

里奧大人今晚 6 點唔夠番到屋企   一番到去佢都做緊公司嘢   咁我都沖涼先喇   情緒低落   要沖熱水涼冷靜一下 ~

我問里奧大人   如果有一日我比媽咪 家姐激到暈咗入醫院   你會點做   佢話都唔需要問佢哋啲咩   因為佢都知媽咪 家姐都係唔用腦嘅人   但就一定比臉色佢哋睇   因為激到我入院   哈哈   佢好少答我假設性問題㗎   所以佢知道有大單嘢發生   哈哈 ~ 

我忍唔住大喊   話頭先激到我就嚟死呀   我話我樣樣咁上心   但到頭來得到啲乜    個個當我衰人   之後佢用手幫我抹眼淚鼻涕呀 (如果我睇戲咁喊   佢就拎紙巾比我   今次居然用佢自己隻手抹   佢好少見我咁激動   我估佢都心情緊張亂了)   哈哈 ~

咁佢一路抹一路叫我唔好激氣   驚我甲狀腺翻發   當下我覺得佢真係好愛我   次次我一激氣   佢第一時間就驚我依樣翻發嗰樣翻發   其實佢真係好驚我有事呢 ~

喊完真係舒服啲   已經忍咗好耐   唔喊可能我會谷死 ~

今晚雖然極之非常唔開心   好在可以同呀 mi 同冰姑呻   再同里奧大人呻埋   心情鬆咗好多   因為我真係好驚   我咁對媽咪係我嘅錯 ~

同冰姑 Whatsapp 到 11 點半呀   原來已經咁夜   係時候要瞓喇   真係第一次咁夜   佢知我唔開心   所以點都會同我傾   事實傾完真係舒服好多   所以今晚好多謝冰姑同阿 mi 呢 ~