翠河餐廳 @ 官塘 ( 6-APR-2016 )

生炒排骨 

腰果炒菰丁

( 6-APR-2016  WED )

今朝里奧大人上大陸   叫佢記得帶支麥茶   之後我都瞓番 lu ~

天氣又濕濕立立咁   好在都 ok 精神   但就無乜胃口   食奶醬多算喇 ~

8 卦呢排同我食早餐   餐廳啲呀姐好搞笑   咁今朝無位嘛   所以佢遲黎就唔同我一齊坐   呀姐知佢黎就問我過唔過去一齊坐   我話唔喇   呀姐 O 咗咀   唔係以為我地鬧交呀嘛   哈哈 ~

菇場忙呀   因為想快啲做埋個 report ~

今日有 lunch box   食完再出去行下   難得見到陽光   呵呵 ~

OK 便利店買只係 $6/包咋   勁抵   所以同家姐每人 5 包

好嘢   終於做哂 report   又可以坐定定 load 相喇 ~

今晚同媽咪 家姐食飯   咁放工去媽咪屋企坐陣先   問工人呢排媽咪食咗咩   媽咪同工人打眼色   我就即鬧佢啦   咁都講大話  好煩   到時妳唔講食咩   醫生會覺得啲藥又教錯   開另一啲唔關事嘅藥比妳食   妳就慘   無啦啦要食多隻藥   真係好 Q 煩 ~

家姐差唔多 7 點到喇   快快食完快快走   因為媽咪依家要聞氣   一支氣一個鐘咋   我同工人講話咪成日出街呀   一百蚊一支氣   我唔會比錢架   同埋佢出到去又係合埋眼   出去做咩 ?!   又唔自己深呼吸   要靠人工氧氣   家姐都叫佢自己比錢架   同埋要慳住用   不過工人真係好慳住用架   臨出門口先開   唔會浪費   哈哈   之後佢話同媽咪講咗話啲氣好貴   但媽咪唔理架   照成日出街   如果佢一日出 2 個鐘   一個月要比多 $6,000   仲要租機呢 ?!   根本呢啲錢係可以慳番   係佢自己懶到出汁   唔駛郁就抖到氣   所以我都費Q事話佢   我要留番啖氣   妳唔珍惜妳條命無問題   但我好珍惜自己嘅身體囉 ~

媽咪頭先話食乳豬   真係痴上腦   家姐話同媽咪食   佢仲更加係白痴無腦   乳豬咁鹹   食完入硬醫院啦   但佢講得好有道理架   話依家同媽咪食   佢唔會食咁多   如果佢自己買黎食   會食哂   咁我話我地本份做咗   佢要死   我都無辦法   我問心無愧 ~

真係頂佢地唔順   有時比佢地錯誤觀念都搞到我自己好迷茫   所以即 whatsapp mi   想知道正常人係點諗法   好在同一陣線   如果家姐同媽咪好似佢咁識諗就好了   love u ~

之後家姐話買啲開心果比媽咪食   其實我覺得都 ok 嘅   每日 2-3 粒 nuts 應該係問題   咁佢問我得唔得   我話上網 check 下鈉嘅成份   我都未 check 完   佢已經叫工人可以比 2-3 粒   咁就咪問我啦 ~

無啦啦又叫我陪媽咪覆診   我話睇下先啦   我覺得陪佢覆又點 ?! 醫生話唔準食乜   佢就食哂啲唔食得嘅嘢   而妳又比佢食   我聽完醫生講咩   咁又點呢 ?!   妳地又唔係聽   做乜嘥我時間   其實佢陪就啱喇   等佢知醫生講媽咪情況   唔係成日陪就算   睇就算   咁就覺得對媽咪好囉 ~

咁媽咪覆診前要抽血   多數係覆診前 1 星期要抽   但今次無寫時間同係咪空肚   咁我話當空肚先啦   如果佢話唔係空肚抽嘅   咁咪即刻食個包   抖陣再抽   妳無理由飽肚去抽   之後人地話要空肚   妳第朝再黎呀嘛 ?!   用下個腦啦 ~

又話抽血早一個月抽都無問題   最多啲血無咁好   話姐夫次次抽血都早好多   同埋多數空肚   因為驗血糖定咩   話去到等派籌   唔駛約時間架 ?!   呢下我火都黎   我話妳陪過媽咪去醫院覆診咩 ?!   上次我同媽咪覆診   係姑娘比埋時間架   唔通一大堆人企喺門口等派籌呀 ?!   妳唔好以為所有醫院都係咁做先得架   真係無腦   激到我喉嚨谷鬼住抖唔到氣   勁驚自己爆血管 ~

8 點唔夠走啦   家姐同媽咪講話妳最鍾意我地走啦   媽咪笑笑口話係呀   唔知佢講笑定真啦   總知我見到佢地兩條友就覺得好很煩 ~

今次唔陪家姐等車喇   我喺另一邊走   真係唔想見多佢一面呀 ~

番到屋企就即沖涼   之後里奧大人都番到屋企 lu   佢話好熱   又問我熱唔熱   我話啱啱沖完涼   又抖咗陣唔覺熱喎   佢話佢好似有病咁   哈哈   因為佢好小會話熱過我家嘛   咁開冷氣囉   我之後都熨埋一機衫啦   難得開冷氣嘛   呵呵 ~

里奧大人做埋公司嘢先沖涼   咁我即同里奧大人講話今晚咁咁咁   佢同 mi 講嘢都係一樣   唔好咁同家姐鬧交   同埋自己勞氣都無用 ~

我同里奧大人講呀   要陪我睇 DO 姐有問題   等我開心番笑番   估唔到今晚超爆笑   感謝主   每當我真係頂唔順嘅時候   神會安排天使同美事   令我當中感受到平安喜樂 ~

今晚 11 點幾瞓呀   又要開冷氣   睇黎應該之後都晚晚開冷氣了 ~