大快活 + 滿記甜品 @ 九龍灣 ( 2-DEC-2016 )

( 2-DEC-2016  FRI )

呵呵   又 Happy Friday 喇   希望今日唔忙啦   哈哈 ~

我哋依家都會比報紙阿婆   不過聽日都搬喇   再比唔到佢 lu   所以我比封利是佢   當小小心意呢 ~

早餐食豬扒包   麻麻哋好食   但唔想食三文治囉 ~

菇場唔太忙   做埋 Report 就可以揀相 lu ~

里奧大人 12 點幾去太子見客   咁又好呀   一陣可以番屋企執嘢 ~

Lunch Time 出去買 Bubble 紙   點知無貨   又要行去另一間文具店   感恩佢有貨咋   仲只係 $49   無貨嗰間要 $58 㗎   依家平咗九蚊雞   真係好開心呀   哈哈 ~

買埋燒賣粉果番菇場食   番到去已經 1 點 15 分   勁趕 ~ 

4 點半先嚟忙   好在 5 點搞掂咋 ~

放工即番屋企喇   里奧大人已經執緊嘢 lu   見佢 Pack 嘢真係好有心機㗎   特別係封紙箱口   我求其咋   黐得實就算㗎喇   哈哈 ~

8 點半食嘢   今晚要食飯   唔係一陣唔夠力 Pack 嘢 ~

第時會好小機會去滿記㗎喇   所以睇下姑奶嚟唔嚟   估唔到佢真係嚟   仲早過我哋到   叫佢叫定嘢等我地哋  因為我哋仲食緊飯   煲仔飯太熱喇   想快都唔得 ~

食完傾陣偈就走喇   趕住執嘢 ~

我諗住 2 個鐘會搞掂   因為運輸公司教我哋   好多櫃桶入面嘅嘢唔駛執出嚟   Ikea 嘅除外   佢哋當日會用膠紙 Mon 住哂啲櫃桶   咁樣我哋真係慳好多時間   雖然分開兩邊擺   但最後真係有啲亂   呵呵   無計啦   如果一早開箱執好哂   屋企就無位行咯   最多之後再慢慢分番 ~

執呀執   開始有啲攰   原來已經 11 點幾   但仲未執哂   廚房真係好鬼多嘢   好在之前發現強蛋   所以已經清咗廚柜 2/3   唔係仲慘 ~

我覺得執屋最煩係櫃面同枱面啲 "林嬸" 嘢   濕濕碎碎咁   加上我又衰   知道要搬就求其擺   完全無心機執   依家瀨哂嘢   哈哈哈哈 ~

要咬香口膠提神   因為個人真係攰到頂點   可能郁呀   又唔係話攰到企喺度都瞓得着咁囉   但里奧大人就慘啲   10 月開始忙   真係未停過   搞掂好哂   一定要煲啖湯   整啲新嘢佢食先   哈哈 ~

執到 3 點半   真係要停喇   好在執哂   只係牙刷枕頭呢啲日用品要聽朝先執到   沖埋涼   4 點幾瞓 ~