蟹柳火腿粟米湯 + 肉丸媽媽麵 ( 17-AUG-2017 )

( 17-AUG-2017  THU )

尋晚發夢見到媽咪   個夢仲好真實添呀   但起身唔記得係咩夢囉   咁都好   唔係會仲更加唔開心呢 ~

好眼瞓呀   其實呢兩晚瞓得唔好   唔知點解 ~

早餐去 KFC 食   因為唔駛同 8 卦食   呵呵 ~



菇場唔忙   今日全部大粒唔喺度   勁 Free 呀 ~

Lunch Time 出去食牛腩河   我發覺早餐食得飽   反而會好快餓   我朝早食奶醬多呢   唔會咁快餓㗎   睇嚟朝早都要食多士算喇   難得瘦幾磅   唔想咁快肥番呀 ~

食完行個大運就番菇場喇   因為好鬼熱呀   行個圈都流汗   唔想立痴痴番工呀 ~

唔夠瞓   又出咗啲啲汗   好鬼眼瞓囉 ~

咁諗住抖下   點知 8 卦喺大陸都唔放過我   係都要同我傾偈 ~

唔記得傾開啲咩   我又話佢乸乸哋囉   因為佢咩都會話: 呢 有嘢想問妳   呢 妳覺得呢間好唔好食 ?!   我話好心你 Man 啲啦   咪成日咩都 "呢" 字開頭啦   女人咁   所以佢話佢係我閨密   哈哈   咁我問番佢   覺唔覺得我好麻甩 ?!   佢即答: 堅麻甩   哈哈   佢話有時就咁睇啲對話   完完全全係同緊男仔講嘢添呀   所以我成日話我係女兒身   男兒心呢   哈哈哈哈 ~

放工即走   番到屋企拖地再抖陣   6 點半可以食嘢喇   覺得好鬼肚餓   慘   好唔想有餓嘅感覺呀   哈 ~

里奧大人 7 點唔夠放工   咁我煮麵比佢食嘛   咁見有時間    我又食完又抖咗陣   所以即去徑步喇   估唔到可以徑 20 分鐘   爽呀 ~

是日懶餐 - 蟹柳火腿粟米湯 + 肉丸媽媽麵  

蟹柳火腿粟米湯 - 一罐粟米湯 + 2 塊火腿 (切粒) + 3 條蟹柳 (切粒) + 1 隻蛋   死完鬼咁飽呀   哈哈   下次都唔好咁煮咯 ~ 

肉丸媽媽麵 - 懶呀   所以就咁煮呢個麵算喇   哈哈 ~

洗埋碗就開機洗衫   之後就休息喇 ~

兩晚瞓得唔好   難得今晚 10 點半就勁眼瞓   所以自己瞓先喇 ~