2017年8月31日星期四

住家飯 @ 家姐屋企 ( 31-AUG-2017 )

三餸一湯



煎立魚 - 好味呀   個皮脆卜卜   我睇住工人煎咗 15 分鐘   真係好有心機呢   咁家姐話佢成日食嘛   叫我一個人食哂成條魚   我真係食哂架   之後第日家姐問番工人有無食 ?!   佢話見我食得咁滋味   唔敢夾來食喎   車   又係佢叫我食哂嘅   哈哈   



冬菇金針雲耳蒸雞 - 好味呀   因為我唔會煮金針雲耳   



金銀蛋莧菜 - 冰姑尋日先叫我買黎食   今晚就有得食   感恩感恩   




我話要一碟薑蓉   



勝瓜鯪魚肉湯 - 諗住咁清無咩味   估唔到又有味喎   好味道



日本桃 - 4 個 $160   依家食生果真係貴過我食餐飯囉 @@



( 31-AUG-2017  THU )

感恩又一覺瞓天光   臨醒之前發咗個夢   有個男人叫牛尾湯通粉   但要豬扒麵湯底   我心諗   牛尾湯又點會豬扒麵湯底呀 ?!   估唔到自己發夢嘅時候都咁清醒   哈哈   之後個侍應答佢唔可以轉豬扒麵湯底   答完就鬧鐘響   呵呵 ~~~~

早餐又食吞拿魚治   好味道呀   但間嘢無冷氣咁   所以應該唔會再去住呢 ~~~~



菇場超級忙呀   好在食飯前搞掂哂 ~~~~

今日家姐放假睇醫生   所以約我食 lunch 呀   勁開心呢 ~

呢間食店要比錢先嘅   咁我都諗住請家姐   我比完錢之後   家姐話今次又係佢講緊電話   好似唔想比錢咁   哈哈   上次同佢食飯   又係埋單比錢時佢講電話   咁我就比啦   真係好邪   哈哈   不過佢黎陪我食   我一定請佢食飯囉 ~

特上盛海景丼 - 一般啦   



細細片嘅刺生



芝士豬排 - 我以為左上角係沙律醬添   一蘸落去係好有彈性   覺得好奇怪囉   家姐話係甜品來架   哈哈   之後食咗一啖唔敢再食   因為好重奶味



仍都好一般   呢間唔會再食   



咁家姐今朝 10 點半去佐敦睇耳鼻喉專科   因為佢話成日有嘢頂住出唔到黎咁   個醫生串 Q 到爆   話家姐唔係鼻敏感   睇黎做咩 ?!   家姐即時串番佢啦   話西醫話佢鼻敏感   同埋我唔黎睇又點知自己唔係鼻敏感呢 ?!?!   之後個死人醫生仲衰格   話開 2 星期藥比妳食   妳食咗可能仲衰   咁家姐話開一星期啦咁   真係咩醫生黎架 ?!   嫌錢腥 ?!   但 d 死人態度唔好咁黑人憎囉 ~

姑娘又係衰衰格   好串咁問家姐   妳等咩 ?!   家姐話等妳比番張醫療卡同收據呀   呢間診所係咪顛架   咁家姐等嘅時候   話有個女人都同佢講   呢間 d 姑娘怪怪地咁 @@      

咁食完去一田睇下嘢   之後家姐話去 Panash 買包   因為星期三有折   咁我帶佢去啦   之後行行下   我話今日好似係星期四喎 @@   其實今朝我做做下嘢   我以為今日係星期五添呀   咩事呀   哈哈 ~

送埋家姐搭車就番菇場   家姐話條街好熱   我話啱啱好   因為菇場真係好凍   間唔中都要出來解凍   個人舒服好多呢 ~

菇場又忙啦   好在 3 點左右搞掂   同冰姑傾計   佢居然又話今日係星期五   做乜咁架   個個都記錯日子嘅   哈哈 ~

放工即走喇   坐小巴去家姐屋企   但一定要家姐出黎接我   因為我唔識行去呢 ~

咁我落車嘅時候   諗住過馬路先打比家姐   點知一落車就見到家姐企咗喺度   堅嚇一嚇囉   仲着白色衫添   哈哈   因為我無諗過佢咁快嘛 ~

可能今日真係好開心   全日都好餓咁   家姐都話好少有   哈 ~

食完包威化餅   再食 2 塊炸蝦片   勁好味呀   不過我條脷腫咗   所以唔敢食咁多呢 ~



麥包   你要健健康康呀  








咁今朝 skype 8 卦   問佢咬親條脷係咪熱氣 ?!   佢答: 我上網睇呢   佢無講熱氣   係話因為唔知乜嘢條脷漲咗   所以容易咬到 !!   笑死我呀   頂   同阿 mi 一樣   咩都加個豬字   係咪真係一諗起我   就即刻聯想到隻豬呀 ?!   嘩哈哈哈哈 ~

家姐工人話我瘦咗好多   以前圓碌碌咁   我話依家唔係瘦咗好多   而係以前實在太肥呀   同埋我話一個人食飯   最主要食多 d 菜   同埋要做運動   我地做 office 實在成日坐   加上冷氣又凍   真係血氣完全唔運行   所以我依家都愛上徑步   真係要比時間自己郁下   唔可以懶囉 ~

差唔多 7 點開飯   食完再食生果   真係飽到上腦呢 ~~~~

同家姐又傾下計   咁家姐車我番屋企   所以我 8 點半都走喇   等家姐早 d 休息 ~

番到屋企即沖涼   之後熨衫   一定要郁下嘛   哈哈 ~

熨完又上 Youtube 睇嘢   11 點鬆 d 都瞓喇 ~

2 則留言: