醉和里 @ 黃大仙 ( 9-SEP-2017 )

鵝片拼墨魚 ($168) - 好味呀   但食唔哂   要打包呢 


加 $20 要雙拚   因為好想食墨魚   



小炒皇 ($98) - 睇番記錄   年幾前食只係 $78 咋   依家 $98   份量仲少咗   



藍妹 ($26) - 里奧大人話同上次一樣咁凍   最正呢



( 9-SEP-2017  SAT )

里奧大人今朝 10 點幾起身   其實我都醒咗   咁今日我身體又 ok   咁就即起身沖涼喇   之後出發去 mega BOX 飲茶睇戲 ~

11 點半去到 mega BOX   里奧大人去買戲飛   我就去麥記買杯咖啡先   雖然夠瞓   但我都習慣飲杯奶茶咖啡   感覺係更加精神咁呢   哈哈 ~   

估唔到酒樓咁多人   里奧大人話呢張係 Last 嘅四人枱喎 ~

紅油抄手 - 里奧大人差唔多次次都食   今次我要多汁喇   因為上次食無咩汁   好乾咁呢   



香芒凍布甸 - 里奧大人叫㗎



千層薑汁糕 - 今次無咁重薑味   但同樣煙韌   呵呵   



家鄉蒸蘿蔔糕 - 里奧大人話食   咁叫啦   



香煎蕃薯餅 - 又係里奧大人話食   之後話好油   咁我食啦   見煙韌好味道咋    



四寶滑雞扎 - 我話叫咁多甜嘢   要叫番啲鹹嘢中和一下   哈哈  



食下傾下   好快就 1 點 40 分   要走人喇   因為睇 1:55pm 戲呀 ~

成個陳友咁款嘅



我以為佢帶咗 Cap 帽呀 



上次家姐比咗 2 張 Coupon   咁今次都想睇 "打死不離 3 父女"   所以即用埋佢喇   里奧大人話唔駛加錢添呀   佢話好多時用 Coupon 係要加錢   我真係唔知呢   哈哈 ~

雖然片長係 161 分鐘   但完全唔覺咁耐   無悶場   我覺得呢套戲真係好好好好睇   笑中有淚   我真係笑完又喊   喊完有笑   啲感動位真係好難令妳唔流淚囉   里奧大人話佢隔離個女人喊得好犀利添呀 ~

無啦啦好餓咁呀   所以去 Ikea 食啲嘢   但係完都 5 點幾喇   之得唔食啦   早啲食飯好過嘛   哈哈 ~

所有食材係烚咁嘅



雞翼就熱辣辣   



行多陣就諗住去拎淘寶   咁里奧大人知我成日想去黃大仙大牌檔   話不如今晚去食   反正有時間   諗住坐 Shuttle   點知打勁大嘅蛇餅   咁一定行路快過搭車   所以決定行去德福   原來出面落雨   唔怪得咁多人坐 Shuttle 啦 ~

去到黃大仙都係 6 點半左右   又係最後一張 2 人枱呀   感恩感恩 ~

不過呢間大排檔真係唔可以慢慢嘆住來食   因為真係超級超級嘈   嘈到係有啲頭痛嘅感覺呢 ~

好飽呀   行陣商場再搭地鐵去官塘拎淘寶   之後番屋企喇 ~

今次淘嘅嘢衰咗   淘咗塊熨衫板墊   點知里奧大人話好烏糟   成塊黑色咁   佢話掉都掉唔切   所以我無睇到係點囉   佢淘咗件男裝 Tee   以為佢調轉着啦   因為個衫領好高   箍住條頸咁   但原來佢係着啱㗎喎   咁我試下啦   我又好啱喎   咁我要啦   好在件 Tee 係過 Pat 咋   唔係我唔着㗎~

沖埋涼就開機洗衫   之後休息喇   唔知係咪墨魚唔消化   因為我個心口好 "藝" 呀   但費事同里奧大人講啦   因為佢都話唔好食墨魚   難消化同膽固醇高呢 ~

所以今晚 11 點幾都瞓   希望快啲瞓到就唔駛痛啦 ~