住家飯 @ 姑奶屋企 ( 22-SEP-2017 )

姑奶自己包嘅餃子   都好味道   不過無嘢蘸就比較乾咗啲呢



呢碟臘腸同潤腸係全場最熱   佢原來煮咗飯   唔怪得煮水餃又會有臘腸啦



唔知咩來   佢只係話燶咗   咁嘅賣相好恐怖   加上又凍呢   我唔敢食   呢碟餸直頭係無郁過



菜心 - 得幾條咋   佢哋真係唔食菜㗎喎   呢碟我可以包尾   雖然係凍

無花果 - 我堅唔覺得甜   但姑奶話好甜   可能家姐買比我嗰啲實在太好味喇



( 22-SEP-2017  FRI )

又 happy friday 喇   依家要清下啲大假   所以間唔中會請星期六   感覺好似番 5 日工咁   爽爆 ~

早餐終於記得食奶油多喇   真係無咁滯   正 ~



菇場忙下停下啦   不過咁   忙開無啦啦一停落嚟   個人好似好謝咁   哈哈   真係煩 ~

一坐低   第一件事係拎呢張毯出來   蓋住膝頭哥   咁無咁凍呢   但個個同事見到都話我好似冬天咁   哈哈   



Lunch Time 出去食魚蛋河   已經叫少河   但都食剩 1/3   但其實我係未飽   不過感覺到個胃已經就來按鐘   叫妳 Stop 唔好再食囉   如果再食   我會胃痛呢 ~



仍然忙忙哋   點知 4 點突然有 Urgent 嘢做   真係要快手搞掂佢啦   聽日放假   唔想有手尾啊 ~

搞掂哂都差唔多放工   今晚去姑奶屋企食飯   所以喺 APM 等里奧大人 ~

佢今日去完深圳   但要番公司攞嘢   所以 6 點半先到   睇住佢啲汗係咁流   肯定好急步行來啦 ~

7 點開飯   食完就傾下偈   姑奶話佢仰高個頭太耐   再望番地下會頭暈   大佬   係人都會啦   唔駛大驚少怪丫嘛   又話自己記唔到嘢   要寫低先得   我即刻比我手機佢睇   我都有好多 Reminder   連里奧大人都忍唔住出聲話佢   係人都會寫低要做啲咩囉   我話妳成日將啲好平常不過嘅事化到好大好大   老實講   講出嚟係比人笑囉   等如 Mou 低起身見頭暈   後生仔女都會啦   唔通咁又嚇餐死咩 ?!   我真好怕啲人成日負面思想   講極唔聽囉 ~

之後話里奧大人食好少嘢   我話妳煮嘢唔啱佢胃口咪食好少囉   我話我煮嘢   里奧大人會 "扒" 飯喎   又話佢大細超   家姐煮嘢食咁少   大佬   樣樣凍冰冰   感覺真係好隔夜餸咁   妳真係好難怪人哋食得少   我雖然煮嘢都唔係話好食   但起碼次次都係熱辣辣   佢知我真係好用心煮嘛 ~

食埋生果都走喇   里奧大人今日好攰呀 ~

番到屋企   里奧大人食咗 2 支雪條添呀   我估佢今日真係好熱呢 ~

沖埋涼就開機洗衫   到我要抖喇   呢排個人好攰咁   11 點幾都瞓 lu ~