海南雞 (半隻) ($148) - OK 啦 啲肉都幾滑 但個汁唔掂囉 完全無泰國風味
泰式鮮蝦金邊粉 ($88) - 阿女話無味 我話佢一定係成日食濃味嘢 果然無估錯 但其實都有啲酸酸咪咪嘅味道噃
馬拉盞通菜 ($78) - 里奧大人指定要食呢個菜 佢真係好鍾意食㗎 但呢間整得唔好味囉 以前鍾意黎呢間食泰菜 唔貴又好味 但後尾要限時先唔嚟囉 估唔到依家貴哂又唔好味
炸素菜春卷 ($48) - 阿女話食 最後都食剩一條 因為大家都好飽
涼浸浸 (紅梅汁 椰奶 士多啤梨爆爆珠) ($32) - 里奧大人居然唔食啲爆爆珠 好在我包尾咋 唔係嘥哂啦 呢杯嘢賣點係爆爆珠嘛
貼心 Baby ($62) - 咁茄子叫完呢個甜品 個 Waiter 話貼心 Baby 佢以為話緊佢個女呀 哈哈
愛妳一萬年 ($56) - 大佬 個名可唔可以唔好咁難頂呀 哈哈
( 23-SEP-2017 SAT )
今朝 7 點幾比個雷嚇醒 如果我約家姐食早餐嘅話 就係最大雨嘅時候出門口呢 好在今朝無約家姐食早餐 哈哈 ~
瞓到 10 點 45 分 但起身有啲頭暈暈咁 不過唔理喇 照起身 唔想請假用嚟瞓嘛 同埋里奧大人一早醒咗 驚佢餓呢 ~
食完早餐就又好似無咁暈喎 所以又抹下嘢 大清潔廁所 沖埋涼就抖喇 原來已經 1 點半 ~
抖多陣就去 APM 行下 約咗茄子同阿女 2 點半食泰菜 咁我都要去 MUJI 買棉花糖同餅乾比茄子個女 小朋友見到糖就最開心呢 哈哈 ~
2 點半到餐廳 佢地之後都到喇 ~
好耐無見茄子啦 佢下月移民新加坡 lu 所以今日同佢 Farewell 好在之前間唔中都會同佢傾偈 咁啱里奧大人今日又得閒 所以就約食 Lunch 喇 ~
時間過得超勁快 去佢屋企探佢個女嘅時候 個女只係 3 個月大咋 依家 5 歲幾喇 4x 磅人仔 佢啲肉係實的的 但唔係肥 咁我試下抱佢啦 抱咗 5 秒即放番佢落嚟 原來咁鬼重 哈哈 ~
同茄子算有緣㗎 因為大家都啱傾 同埋佢有好多秘密都同我講 連佢阿媽都唔知㗎 佢真係好信得我過 所以里奧大人真係好多嘢都唔知 仍都唔知茄子會搵我 呵呵 ~
因為佢係里奧大人舊同事來㗎 有次我同家姐一齊睇樓 佢都一齊睇呀 之後再去佢屋企吹水 夜晚一齊食晚飯添呀 呢幕真係好深刻 話哂家姐同佢第一次見 估唔到大家都啱傾 ~
佢又話我瘦咗好多 咁相距幾年前見佢 我真係瘦咗十幾磅㗎 同埋佢話我無咁水腫 呢排見親啲人都話我瘦咗 無咁水腫 但我真係覺得自己仲係肥 但就唔係咁識分係咪水腫囉 ~
雖然茄子做咗阿媽 但佢同未做阿媽嘅時候無咩分別 但就唔係唔緊張個女 即係個女想食就食 唔食就由佢 仍唔會餵佢 最搞笑佢個女叫佢撩牙仔 佢一路撩一路同我哋傾計 之後仲停埋手 佢個女吖大個口係咁叫 佢完全只係掛住講嘢咁 笑死我 ~
個女好黐里奧大人呀 係咁摸里奧大人隻手 話佢對手有好多草 仲話記得里奧大人探佢喎 但就唔記得我探佢 特登整鬼我 茄子都話啦 3 歲都唔記得啦 何況 3 個月 衰豬整鬼我哋呀 咩都話比里奧大人 唔比我同佢媽咪 ~
又問里奧大人 點解佢要坐里奧大人隔離 ?! 里奧大人答佢話因為靚 問阿女靚唔靚 之後佢又話自己靚 最搞笑里奧大人話自己唔靚 問阿女靚唔靚 佢又跟住里奧大人講自己唔靚 搞笑 ~
雖然茄子經歷咗一段好唔開心嘅日子 但感恩見到佢都好開心 好正面咁生活 唔會成日自怨自艾 始終真係怨來無用 倒不如積極面對將來嘅日子呢 ~
其實食咗 3 個鐘頭飯 佢講咗 3 次好悶 所以茄子都要比佢睇片啦 佢又會坐定定睇 真係好乖呢 ~
食到 5 點半要埋單走人喇 佢地就行下街 我哋就去佐敦買嘢 之後里奧大人話又無咩嘢想買住 話番屋企算喇 ~
好飽嘛 所以番到屋企就熨衫 之後沖埋涼就休息喇 ~
8 點食生果 又繼續上 Youtube 睇嘢 爽 ~
睇到 11 點幾都瞓喇 晚晚 11 點幾先瞓 對我嚟講真係覺得夜 但好衰囉 11 點前又唔眼瞓喎 ~
沒有留言:
發佈留言