金菇扒豆苗 + 焗蝦卷 + 蘋果雪梨豬骨湯 ( 13-JAN-2018 )

( 13-JAN-2018  SAT )

今朝約家姐食早餐   所以 7 點半都要起身喇 ~

一起身覺得好鬼凍   但就算之前 9 度   起身果下都無今朝咁凍喎   今日已經 14 度啦   好驚自己作感冒呀   因為已經蓋張厚嘅被   但都覺得好鬼凍   同埋個頭有小小赤咁   最驚呢啲感覺 ~

今次個包烘得好脆   好味道呀





菇場忙咗陣   但其實有好多嘢做   不過無 Mood 做 ~

今日里奧大人同姑奶們食 Lunch   所以我都自己去食麻辣米線   因為我覺得自己真係有啲作感 Feel   要食啲麻辣驅寒 ~

食完就去街市買餸同湯料   再去超市買其他嘢   買嘅時候唔多覺多嘢   但拎上手就重到呢   要行下停下咁呀 ~

番到屋企放好哂啲嘢就抖陣   4 點幾開始煲湯   里奧大人 5 點都番到屋企   又拎咗 1 大袋淘寶嘢番來   拆淘寶真係好鬼開心   哈哈 ~

6 點半預備晚餐   7 點 20 分可以開餐喇 ~

是日晚餐 - 金菇扒豆苗 + 焗蝦卷 + 蘋果雪梨豬骨湯

金菇扒豆苗 - 買咗半斤 $26   見係話豆苗胚先買咋   不過我同里奧大人都覺無豆苗味囉   咁我同家姐講話買咗豆苗   我話 $26 半斤呀   佢話佢哋街市要 $100/斤   我話大佬   我好豪㗎喇   全場最貴係呢檔㗎   其他都係買 $20/半斤咋   之後佢話: umm   咁妳都好豪   哈哈哈哈 ~

焗蝦卷 - 唔想開鑊就焗啦   但今次唔知點解啲皮韌嘅 ~

蘋果雪梨豬骨湯 - 用咗 4 個雪梨 + 5 個富士蘋果 + 3 隻黃耳 + 3 粒蜜棗 + $30 豬骨   估唔到個湯咁甜   好香蘋果味呀   衰奧話我喎   成日讚自己煲嘅湯好甜   咁我話真係甜嘛   如果無味嘅我都會講囉 ~

洗埋碗就即沖涼   之後開機洗衫 ~

今晚唔徑步喇   同里奧大人一齊 Relax 下 ~



睇戲睇到 12 點幾瞓   呢排成日好夜瞓咁   真係要校番 11 點瞓好啲呢 ~