( 16-JAN-2018 TUE )
今朝里奧大人 6 點起身上大陸 我叫完佢帶咖啡 我都瞓番喇 佢最驚我成日講幾次帶咖啡 咁即係代表我仲未瞓得番 哈哈 ~
7 點半起身喇 好在唔係話太攰 ~
早餐食芝蛋治 咁 8 卦話 Lunch 一齊出去食 我話: 睇下點先啦 朝早食埋啲咁嘅嘢 無咁快肚餓 佢問我咩係咁嘅嘢 ?! 我話飽肚嘅嘢囉 哈哈 ~
菇場勁忙 諗住清自己嘢 點知有嘢更急 ~
Lunch Time 同 8 卦出去食 之後去圖書館還書 ~
紅咖哩豬扒飯 - 豬扒好味 但個汁無味
香茅雞翼湯河 - 雞翼醃得好夠味呀 又啱啱炸起 所以好好味呀又
我鍾意用呢啲薄身杯 但好少茶餐廳用呢啲杯
仍然忙 但點都要清埋自己啲嘢 真係唔想成日記住 瞓得唔好囉 ~
放工去 mega BOX 特登去買童星麵 不過無里奧大人食開嗰隻 同埋好多都未改特價價錢 咁行咗一轉就轉去 Ikea 睇嘢先囉 食埋嘢先再去 應該轉好價錢喇啩 ~
喺 Ikea 食埋嘢先 諗住慢慢食 點知隔離坐正個口水佬 食雞翼講雞翼 食菜絲講菜絲 食肉丸就講妲己整肉醬 頂佢 完全影響人哋食慾 最慘佢女朋友覺得好好笑 所以佢就更加講得大聲 以為好好笑 其實好煩 真係全世界人聽到佢講嘢咁 ~
見佢食完嘢就勁開心啦我 頂佢 原來仲有甜品未食 又嚟料啦 講玉桂係點嚟 真係把口好似唔可以合埋咁 好在我都差唔多食完 食完即閃 ~
再行 AEON 超市 終於改哂特價價錢喇 自己行就可以慢慢睇 爽 ~
買完嘢都 8 點 係時候番屋企喇 ~
雀巢可可穀物捧 ($3/條) / 點心麵 ($3/包) / 芝士脆片四連包 ($5/Pack) 真係好抵 又可以比啲家姐
放低哂嘢就開機洗衫 之後徑步 其實都 8 點半㗎喇 但見今晚食得咁 Heavy 所以點都要郁囉 ~
徑半個鐘 番到屋企再拖地 沖埋涼就休息喇 ~
睇下 Youtube 又打下機 成 12 點幾先瞓呀 ~
沒有留言:
發佈留言