2018年1月31日星期三

海蜇燻蹄 (外賣) + 滷水雞翼 (外賣) + 豆苗 ( 31-JAN-2018 )












( 31-JAN-2018  WED )

今朝里奧大人 6 點起身啦   好在尋晚放定支唔凍嘅咖啡比佢   我唔駛起身   哈哈 ~

我繼續瞓啦   咁凍真係好好瞓架 ~

天氣咁凍   大食 d 都無人怪妳架   所以食米粉餐   哈哈哈哈 ~



菇場忙下停下   但完全無 mood 啦   所有大粒唔喺度   做嘢真係對唔住自己   嘻嘻 ~

今日阿墨 last day   所以菇場同佢做 farewell   又去飲茶喇 ~



有個同事超級勁怪   船頭問佢食 d 咩   佢話乜都食   之後就夾哂佢面前嘅點心落自己碗度   豉汁鳳爪 蝦餃 腸粉 燒肉   我頭先見佢已經係咁   其實妳可以夾兩樣先都得   反正我地預咗每人一粒   唔夠食一定會再叫   但唔好咁樣囉   之後佢全程都係食食食   真係無停過口架   分分鐘大食過 8 卦添呀 ~

菇場唔忙   又傾下計   CC 無啦啦問我電費幾錢 ?!   話我成日熨衫   但我話點都無開冷氣咁勁啦   佢話我連底褲都熨   佢會痴喎   咁放低落洗衣機嘅   基本上我全部都會熨   床單床冚乜都熨   熨平咗又好放 d   所以我鍾意熨衫   但最唔鍾意熨里奧大人 d 西褲   因為成日熨到雙骨   哈   同埋佢 d 褲都好憎熨   太多袋喇   熨到起鏡面   我會無咩心機熨囉 ~

正想食甜嘢   咁啱有散水餅食呢   呵



今晚遲咗放工   因為有 d 手尾要搞埋   唔想又瞓唔着    哈哈 ~

里奧大人今晚番香港   咁就好喇 ~

咁我見有時間   就去大成街市買餸啦   其實好鬼凍唔想行   不過算啦   當做運動 ~ 

買完魚就去買無花果乾   乜原來咁鬼貴   好記得淘大 Taste 開將   一大包好鬼平   依家要 $60半磅   有 d 係 $200 一磅添呀   不過我覺得買半磅最好   一個樽可以裝哂嘛 ~

咁順便又去燒味檔買餸   唔想食丸同水餃呀 ~

諗住整 2 塊牛油多士食啦   但唔見咗袋方包   仲以為里奧大人驚凍   所以拎埋上大陸食   但其實佢又唔會拎我 d 嘢食家嘛   咁打比佢問   佢話無   呢下驚喇   要是我唔小心放咗喺佢個袋   咁就大鑊了   因為佢個袋留喺工廠   下次唔駛拎來拎去   但麵包就一定發霉到九彩啦   好在後尾原來趺咗落梳化邊邊位   真係嚇死我呀   我都知自己尋晚心急   拎完無放好方包   因為我完全無印象放咗喺邊呀 ~

里奧大人話 8 點半左右番到屋企   咁今晚只係淥菜同淥麵   咁好快手   咁我都抖下嘛   一望個鐘原來已經 8 點   真係要預備   因為煲水都要時間嘛 ~

是日懶餐 - 海蜇燻蹄 (外賣) + 滷水雞翼 (外賣) + 豆苗  

海蜇燻蹄 (外賣) - $20 盒咋   估唔到份量都唔小   味道又 ok   下次可以再買 ~  

滷水雞翼 (外賣) - $12 有 3 隻都抵   同埋幾入味 ~    

豆苗 - 買咗 $20   呢度一半咋   呢期好唔想食菜咁   好奇怪   但出街食菜又無問題喎 @@ 

洗埋碗都 9 點   沖埋涼都休息喇 ~

11 點幾即瞓   天氣凍好快眼瞓   呵 ~

沒有留言:

發佈留言