JOLLIBEE @ 將軍澳 ( 16-NOV-2019 )

2 件樂脆雞配薯條 ($40) & 2 件樂脆雞配蘑菇飯 ($43) - 雞肉好嫩滑呀   估唔到喎

芒桃批 (+$6) - 好細件咋   但味道都 OK

( 16-NOV-2019  SAT )

今朝里奧大人 9 點起咗身   咁我都醒醒哋   之後都起埋身 lu   最搞笑里奧大人以為我唔知醒起身番工呀   後尾定一定神   就記得我今日唔駛番工呢   咁等埋我沖埋涼   就出門口食早餐喇 ~

食完番屋企休息   之後家姐打嚟問我按唔按隻手 ?!   話 11 點半可以去按   里奧大人叫我去按下   咁我都按喇 ~

家姐 10 點幾嚟車我去佢屋企先   之後再一齊去按摩嘅地方   因為我話驚無車   咁寧願同家姐一齊去好過 ~

一話食嘢   Berry 就會企定定等食

去到按摩嘅地方都差唔多 11 點半   我係做推拿   佢話我右手勞損好嚴重   但其實左手都係   只係無右手咁嚴重呢~

推拿完之後   隻手係鬆咗   同埋我可以舉起雙手   之後痛到舉唔起㗎 ~   

之後問刮唔刮沙 ?!   我話好呀 ~

刮背脊完全唔痛呀   我仲以為係要按一按鬆啲肌肉先刮添   原來已經刮緊   我話覺得好舒服添呀   哈哈   家姐同按摩師都話我好受力   居然覺得唔痛 ?!   按摩師直頭以為我成日刮沙添呀 ~

刮完成個背脊紅哂又黑點   成身毒素呀   不過刮到雞翼位同埋按 Pat Pat 位置就堅痛喇 ~

之後再拔罐   吸哂啲濕氣出來   始終第一次做   都唔會期望隻手即刻好   但做完之後   個人感覺係輕咗   無咁濕重咁 ~

做完就到家姐做按摩   因為佢讓咗 1 個鐘比我   咁我做完都走先喇   佢要做 4 個鐘頭㗎 ~

我去附近食嘢   食完再行陣  買咗 3 件外套 + 1 條裙   其實我好驚自己周圍行   因為成日想買嘢   不過咁   我都係覺得好着先買嘅   唔會亂買呢 ~

買完就搭車去家姐屋企陪 Berry   好似幾跟我咁喎   起碼會坐喺我隔離啦   哈哈 ~

索呀索

瞓喺我隻腳度   幾咁難得

不斷係咁索   因為我頭先搽油做刮沙

向我單眼   哈哈

又坐定定   佢應該係想瞓覺

比我摸頭仔喎   肯定有古怪   哈哈

咁跟我   原來最後係想咬我條裙呀   等我仲咁鬼開心添

終於肯瞓 2 分鐘

無啦啦又沉思

隻眼好衰呀   哈哈

望夠未

之後瞓得好林   仲瞓到腳撐撐

家姐 6 點幾番到嚟   佢話每次一入屋   Berry 姐第一時間係比玩具佢   要同佢玩   因為係同伴呀   哈哈   不過衰女都係咁對我囉 ~

家姐記得我話想食炸雞   所以同我去 JOLLIBEE 食   食完就去惠康買嘢   想用哂啲 Coupon 呀   12 月到期   真係要快快用   買滿 $500 就送貨   同埋可以 Free Parking 3 個鐘 ~

買完又再去番 JOLLIBEE 買炸雞比工人食   咁等嘅時候   我話唔會有人食漢堡扒飯呀嘛 ?!   點會嚟呢度食飯㗎 ?!   之後家姐叫我望下個男人   佢好似叫咗盒飯咁   點知真係食漢堡扒飯呀   哈哈   真係開口中   好在我講完佢先坐低咋 ~

買完就開車走喇   比盒炸雞比工人食先   熱辣辣食先好味嘛   之後再車我番屋企 ~

里奧大人早我一部 Lift 番屋企   我再望個鐘   原來已經 9 點 ~

沖埋涼就開機洗衫   里奧大人 10 點都瞓覺喇   聽朝好早起身 ~

我就睇 Youtube   睇到 11 點幾先瞓 ~