住家飯 @ 阿 Mi 屋企 ( 30-JUN-2020 )

蒜蓉蒸紅鮋魚腩 - 好味呀   食呢啲魚   只能夠喺阿 Mi 同家姐屋企先食到

蒜蓉粉絲蒸扇貝 - 阿喂次次都會買 2 隻比里奧大人   勁偏心   哈哈

蒜蓉清蒸角瓜 - 原來可以咁蒸嘅   又學到嘢喇

香菇豆豉醬薯仔炒雞 - 我食食下覺得好辣   阿 Mi 個樣好驚訝話無落辣椒   我其實都記得無落辣椒   之後我話我頭先食咗薑片   哈哈

酸齋 (外賣) - 我話要食酸齋呀   多人食開心啲   哈哈

古早蛋糕 (抹茶味) - 買古早蛋糕嘅時候   里奧大人話驚阿 Mi 唔食   我話你放心啦   阿 Mi 唔鍾意食都會食的   唔會浪費食物㗎

味道同口感都唔錯   下次可以買另一個味道

( 30-JUN-2020  TUE )

今日 Off   所以自然醒   但瞓到 10 點都起身 lu   沖埋涼就去食早餐 ~

食完早餐就番屋企   本身想去長洲   但里奧大人話咁熱   所以話唔去 lu ~

之後問阿喂幾點放工 ?!   佢話收 4 點   而阿 Mi 又喺屋企   所以決定入荃灣喇 ~

真係搞笑   上次特登約實日子就要 Cancel   今日就真係即慶   仲要咁啱阿喂放 4 點   如果唔係就可能只係食晚飯咋 ~

始終即慶   所以阿 Mi 問定想食咩   佢話屋企有咩就整咩   之後到時再買其他   話咁快就搞掂好晚餐   哈哈 ~

差唔多 11 點幾出門口   但去到黃大仙開始塞車   差唔多 1 個鐘先去到荃灣 ~

去到千色店已經接近 1 點   里奧大人諗住行埋一邊問阿 Mi 喺邊 ?!   估唔到阿 Mi 同步問我哋喺邊 ?!   我哋行咗一陣   阿 Mi 就到 lu   可以一齊 Shopping ~

無諗過荃灣買 One Piece 只係 $50   直頭平過淘寶呀   所以我一定要買囉   同埋最緊要可以摸到質地呢 ~

買完 2 條   阿 Mi 同里奧大人一齊話前面仲有一間都係 $50/條   所以之後再買多 3 條   勁開心呀   買到又平又靚嘅嘢   哈哈 ~

今日係咁行   連阿 Mi 都話最緊要行冷氣地方   所以今日真係唔可以戶外活動呢   哈哈 ~

2 點半左右食下午茶   本來去一間 Cafe   但只得 Lunch   所以唔去食呀   同埋今晚早食嘛   食下午茶唔駛咁飽 ~

隻隻手都好忙   哈哈

火腿香腸鮮茄湯通粉配熱脆牛角包 ($40) - 係我鍾意嘅鮮茄湯味道   所以覺得好味

三式薯皮 (煙肉芝士/蒜香雞及吞拿魚) ($45) - 每人一件   啱啱好

農夫比得包 ($38) - 呢個麻麻哋

食完就再行陣 AEON   之後再約阿喂喺先施等   里奧大人掛住睇褲   阿喂企喺佢隔離都唔知   哈哈 ~

里奧大人想買鞋但唔啱心水   反而阿喂就買咗 2 條褲   買完就去街市買餸   再買生果   之後就去探 "地毯"   我買咗零食比 Berry   成日想買   但又好少經過狗店   今次 Berry 姐發達啦 ~

標準貴婦狗   佢大隻過 Berry 㗎   但佢就超級乖   任摸唔嬲   我其實可以摸佢好耐   但因為趕住走   下次再去摸過   哈哈

最後買埋齋就搭車去阿 Mi 屋企   今日行程非常充實 ~

兩個男人傾偈   咁兩個女人就喺廚房傾偈   其實我次次都只係睇阿 Mi 洗嘢煮嘢   真係無咩幫到手 ~

阿喂成日無啦啦入廚房裝我哋   佢話食魚想食飯   但掛住傾   煮完先醒起無煮飯   阿 Mi 碌大對眼話咁仲煮唔煮 ?!   但其實飯熟   啲餸都可能食哂    所以唔駛煮啦   哈哈哈哈 ~

7 點左右開餐   飲咗啲白酒   成個人熱哂呀   熱到額頭都係汗   阿 Mi 要開風扇比我呀 ~

明明食緊雞   無啦啦唔見阿 Mi   我聽到洗嘢聲   我話佢奇奇怪怪啦   食食下走去洗鑊   哈哈 ~

食埋蛋糕  再傾多偈都走喇   原來已經 10 點鐘 ~

番到屋企即沖涼   咁沖涼之前   我喺度諗聽日又要大清潔廁所   但明明好似清潔完無耐   因為我成日以為聽日係星期日呀   到依家仲係覺得去阿 Mi 屋企多數係星期六嘛 ~

呢罐芝士零食要 $85   買比 Berry 食嘅   希望佢鍾意啦

里奧大人 11 點幾瞓   我差唔多 1 點先瞓呀 ~

香港地 @ 紅磡 ( 29-JUN-2020 )

開餐

涼瓜燜滑雞煲 ($68) - 涼瓜係生咁嘅   但我照食囉   苦瓜汁都係生㗎啦   哈哈    啲雞肉係完全無味

京都焗肉排 ($68) - 呢個就好味喇

好大碗白飯

貓樣蓮藕好得意呀   我同里奧大人講   飲完蓮藕湯   頭髮甩清光   之後里奧大人細細聲講飲完蓮藕湯   賭錢輸清光   哈哈哈哈   大家都好毒下

( 29-JUN-2020  MON )

尋晚瞓到半夜凍醒呀   真係凍到瞓唔着   最後都係要蓋埋里奧大人張被先夠暖呢   次次食西瓜就會預咗半夜凍醒㗎喇   嘻嘻 ~

8 點幾收到群組 Whatsapp 電話   第一次無聽   第二次再聽係阿喂   我問佢咩事 ?!   佢又問番我咩事 ?!   咁我就知係里奧大人打錯啦   之後阿 mi 都問里奧大人乜事搵得我哋咁急   仲要連續打兩次   哈哈哈哈   笑鬼死我呀   佢成日都打錯電話   最慘係佢唔知自己打出咗電話   我哋係咁喂   佢都唔知發生咩事   哈哈 ~

早餐食芝腿治烘底   呢排勁鍾意食 ~

菇場忙呀   預咗放假前實好忙 ~

可能周圍走   所以好快餓   Lunch Time 一到即飛去買嘢食   但買完之後又唔餓   可能熱得滯   哈哈 ~

仍然忙   4 點先來做 Urgent 嘢   我做到 5 點 05 分先走得呀   哈哈 ~

放工去里奧大人公司等佢   希望佢同事快啲搞掂啦   但我哋都差唔多 6 點 45 分先走呢 ~

今晚去香港地食晚餐   因為家姐比咗張 $50 Cash Coupon 比我   其實我已經唔記得   但家姐提我   咁我就去食啦 ~

食完就番屋企   唔想周圍行   呢個幾月真係熱到唔係人咁品   真係企喺度唔郁都出汗 ~

番到屋企即沖涼   依家沖到最尾真係用凍水   其實好鬼凍   但又真係好舒服   哈哈 ~

睇下 Youtube   差唔多 11 點半先瞓 ~

粟米龍脷柳 + 蟹柳炒蛋 + 剁椒金菇 ( 28-JUN-2020 )

( 28-JUN-2020  SUN )

今朝我連里奧大人出門都唔知   所以一覺瞓到 8 點 50 分   其實 9 點半起身   不過見都幾精神咁就起身啦   我想大清潔廁所呀 ~

搞掂哂就沖涼   差唔多 9 點半就出門口 ~

食埋早餐都 10 點半   要去里奧大人公司幫手喇 ~

崇拜完畢就出去行陣   今日無咩風咁   所以帶口罩更熱   哈哈 ~

買完嘢就去里奧大人公司   同佢啲同事傾偈   差唔多傾到里奧大人放工   咁都唔錯   時間過得好快咁 ~

$20/2 盒   好似幾好味咁

同里奧大人食 Lunch   食完抖陣就走喇 ~

凍紅茶

馬來西亞招牌叻沙 (蝦, 白魚蛋, 豆卜, 豬皮, 蛋) ($50) - 我覺得唔重奶味   所以覺得好味道

馬拉盞煎魚柳配黃薑飯 ($58) - 馬拉盞好辣   勁正呀   哈哈

番到屋企即沖涼   里奧大人沖完涼都瞓 lu ~

我就熨 3 機衫   搞掂就睇 Youtube   之後睇睇下都瞓咗半個鐘   5 點半起身就最好   因為要預備晚餐   哈哈 ~

里奧大人一起身就可以食一碗西瓜

今晚 7 點 15 分先開飯   因為要煎又要炒   我要多啲時間㗎 ~

是日晚餐 - 粟米龍脷柳 + 蟹柳炒蛋 + 刴椒金菇

粟米龍脷柳 - 一 Pack 3 塊龍脷柳   解凍一塊   點知解凍之後係好細塊   我仲用一罐粟米湯做汁添   估唔到里奧大人非常鍾意呢個粟米汁   下次再煮   順便清埋 2 塊龍脷柳   哈哈 ~

蟹柳炒蛋 - 清埋 6 條蟹柳   再清埋 6 月份嘅雞蛋   已經用咗 4 隻蛋   但仲剩 4 隻   都應該 7 月先食㗎喇 ~

刴椒金菇 - 唔知點煮   所以加刴椒 ~

大清潔廚房   開機洗衫   之後沖涼 ~

食埋生果就繼續睇 Eric Sir   我想快啲睇哂佢嘅片呀 ~

愛文芒 / 西瓜 / 車厘子   樣樣都要快啲食呀

里奧大人 10 點幾瞓   我就睇到 11 點幾先瞓 ~

橋鍋居 @ 紅磡 ( 27-JUN-2020 )

日式叉燒絲冷烏冬 ($48) - 好味呀   下次自己整都可以   因為家姐比咗支芝麻醬比我呢

雞扒夜貓大碗飯 ($45) - 里奧大人又開始食番呢個飯喇   哈哈

( 27-JUN-2020  SAT )

感恩一覺瞓天光呀   今日起身好精神   感恩感恩 ~

雖然好衰   但真係好懷念星期六唔駛番工嘅日子   哈哈 ~

今日車程快咗   8 點 10 分已經到茶記   我仲以為已經 8 點 20 分添呀 ~

早餐食麵餐   因為今日起碼 2 點幾先食下午茶 ~

菇場忙咗陣   之後朋友 Whatsapp   一傾就兩個鐘   所以好快就放工喇 ~

放工搭車直接去新都城   同埋家姐同姐夫一齊食 Lunch   但我話我好滯咁   唔好叫咁多嘢食 ~

XO 醬海鮮炒烏冬 ($58) - 味道都唔錯喎

鮮茄濃汁焗豬扒飯 ($65) - 豬扒都好厚身   同埋係好 Juicy   但就無咩味道   可惜可惜

食完又去廣良興買軟糖   之後就去家姐屋企喇 ~

原來都已經接近 4 點   咁要食埋個蛋撻喇   頭先同家姐講話喺蛋撻王見到好多人   搞到我都想食蛋撻   之後去睇下啦   原來買 3 送 3   所以家姐即買   哈哈 ~

一入屋   雖然 Berry 撲我   但都試下用 Eric Sir 嗰招對付 Berry   不過係完全唔掂   哈哈哈哈   唔比佢咬番轉頭已經偷笑 ~

我鍾意食酥皮蛋撻   唔係咁鍾意食曲奇皮

顛婆係都唔瞓   但其實攰㗎喎   但當佢正想瞓嘅時候   出面有狗吠   佢又走去八   激死我 ~

主人   同妳影張相可以嗎 ?!

喺我隻腳度瞓呀   我係咁摸佢   佢好似好舒服咁   哈哈

好快就醒咗 lu   但我仍然繼續摸   我好鍾意摸佢同索佢   見到佢會好肉緊的

家姐同里奧大人都話唔似 Berry 呀   因為我睇相嘅時候   都覺得呢個 Berry 樣好得意呀   個鼻無咁長   同埋塊面仔好肥咁呀

摸到佢都麻木哂   哈哈哈哈

糟糟媽咪比家姐   但家姐唔食呢啲健康嘢   所以益我   呵呵

7 點左右走人   要去到里奧大人公司幫手   差唔多 8 點幾先去食晚飯呢 ~

食完都番屋企喇   沖埋涼就休息 ~

估唔到我今晚 11 點幾都瞓   但里奧大人仲未瞓   平時星期六好早瞓家嘛 ~

榮基打冷小菜 @ 官塘 ( 26-JUN-2020 )

招牌牛腩米 ($32) - 牛腩唔得呀   口感好似食緊瘦肉咁

鮮蝦韭菜餃拚手打牛丸麵 ($42) - 韭菜餃就好味喇

( 26-JUN-2020  FRI )

明明尋晚都眼瞓   但 2 點去完廁所   好難先瞓得番呀   之後都係瞓下醒下咁 ~

里奧大人 7 點左右就搞掂哂出門口   我都係瞓唔番   我覺得自己完全無瞓過咁呀   哈哈 ~

勁攰呀   居然唔覺熱   仲有想嘔嘅感覺   里奧大人話可能尋晚嘅少削麵難消化呀 ~

早餐食吞拿魚治烘底   要食酸酸咪咪嘅嘢呀 ~

菇場唔太忙   所以勁眼瞓   哈哈 ~

Lunch 食菠蘿叉燒包   朝早買定㗎喇   因為晏晝想抖抖 ~

無啦啦又忙   好在 4 點左右搞掂 ~

放工即走   家姐打嚟話喺果欄買咗生果   想比啲我   約我 6 點交收 ~

番到屋企順便拎埋食物袋同排水口隔渣網   之後再比包啫喱粉比佢   佢勁搞笑   見我整啫喱佢又整   但佢話無啫喱杯   我話佢之前成日買啫喱   食完就留番個杯就可以啦   佢聽完我咁教佢   覺得我好醒㗎   救命   哈哈哈哈 ~

5 點 50 分交收   又傾到 6 點 15 分先走 ~

番到屋企即切好西瓜放入雪櫃   搞掂哂就抖下 ~

呢個星期唔駛買生果了

里奧大人 6 點 45 分左右番到嚟   咁我話直接去食晚餐喇 ~

家姐無啦啦打比我   叫我要認真答佢嘢   唔可以講大話   原來佢話沖涼嘅時候喺度諗   買 1 個西瓜比半個我   買 3 個愛文芒比 1 個我   買 8 個橙比 3 個我   買 1 磅車厘子比 2/3 我   覺得自己好衰呀   應該比 2 個芒果 + 4 個橙比我先啱喎   我話真係痴痴哋啦   妳買生果買自己屋企嗰份就可以   其實唔駛樣樣都預埋我添啦   佢真係好搞笑 ~

諗諗下   頭先佢話想買榴槤比我   我話正呀   好耐無食   依家有啲後悔咁講   好驚佢又特登買比我食呀   不過佢頭先話好驚架車一陣榴槤味   咁我都係呀   好怕架車有陣味   依家開始講定話自己燥熱   等佢唔駛買比我先   哈哈 ~

食完就番屋企喇   開機洗衫再沖涼   之後休息睇 Youtube   今晚盡量比自己抖下 ~

里奧大人 10 點半瞓   我就 10 點 40 分瞓   真係好眼瞓呀   哈哈 ~