米線陣 @ 官塘 ( 13-JUN-2020 )

鮮味二人選套餐 ($128)

滷水雞翼 + 滷水牛展米線 (蕃茄麻辣湯底) - 終於有麻辣味喇   之前中辣都無咩味咁

鮮蝦雲吞 + 滷水金錢肚米線 (蕃茄麻辣湯底)

川辣口水雞 - 今次好好味呀   上次得個鹹字

香辣手拍青瓜 - 呢個又係好味   因為上次食又係鹹囉   今餐食得好開心呀   因為樣樣都好味道

( 13-JUN-2020  SAT )

感恩呀   尋晚一覺瞓天光   仲要無發夢   今朝鬧鐘差唔多響就起身   仲好精神呀   感謝主 ~

早餐食通粉餐   其實我麻麻哋鍾意食通粉   但諗到食米粉要用力 "雪" 入口就唔食喇   已經好鬼熱   再用力就熱上加熱呢 ~

今日菇場無咩人番工   傾偈都可以大聲啲   咁我見阿齋早番過我   我問佢做咩咁早 ?!   佢話無車   我話我唔知喎   佢話我擺明潤佢   之後我話依家妳行路番公司   我覺得妳臉色好咗好多呀   之後一齊大笑   連阿花都大笑埋一份   阿爽番到嚟   話一陣會越落越大雨   阿齋食食下早餐   無啦啦話慘絕人寰   我都忍唔住話佢黐線   笑到我同阿爽死死下   我話駛唔駛講到慘絕人寰呀   落場雨啫 ~

放工即走   坐小巴去家姐屋企   家姐 Whatsapp 話好好太陽呀   今朝里奧大人又 Whatsapp 話好好太陽   大佬   好在記得係里奧大人講   唔係會話家姐講完又講㗎喇   哈哈哈哈 ~

感恩好快有車   車程又暢順   1 點 40 分已經到家姐屋企 ~

今日勁好太陽   暴風雨前夕   哈哈

Berry 姐見到我   係咁撲唔停   真係一路跳一路撲   家姐同工人都覺得 Berry 超級勁興奮呀   工人話 Berry 好耐無見我   我話都係一個星期啫   所以要等 Berry 冷靜哂先帶佢出街呀 ~

家姐借咗架車比糟糟   所以都唔出去食 Lunch 喇   咁叫工人煮麵   大家可以一齊食 ~

同家姐 Share 一個丁麵   份量啱啱好   我問家姐係咪好鍾意張枱墊 ?!   佢話係呀   佢話喺千色店買㗎   佢話覺得個女仔好靚喎   最搞笑工人話係 Frozen

Berry 一入屋就行埋我嗰邊   家姐話做乜咁跟新媽咪呀   哈哈 ~

樣衰   哈哈哈哈

好多對眼

佢攰喇   都唔係點理我   哈哈

家姐買咗大電視   咁一齊睇 Youtube 啦   一齊聚精會神咁睇   睇到大家都有啲眼瞓 ~

4 點左右真係瞓咗呀   我瞓梳化左邊   家姐瞓右邊   最搞笑係 Berry 瞓喺中間   我哋係完全唔知道 Berry 喺梳化   係工人話比我哋聽先知咋 ~

我同家姐起咗身   佢仍然瞓緊

衰女好跟工人   同時仍好驚工人   佢成日咬毛巾呀   工人大聲叫 Berry   佢嚇到個頭 "dup" 一 "dup" 再 "丫" 大個口   所以咬住嘅毛巾都即刻跌咗落地下   我睇住成個過程   覺得好搞笑呀 ~

之後同家姐傾偈   講開媽咪   原來家姐都好怪自己   媽咪走嗰晚無探媽咪   之後我哋一齊喊到死死下   嚇到姐夫出來睇下乜事 ~

家姐話我夢見媽咪就好啦   我話梗係唔係啦   醒咗會諗緊係咪媽咪無走到 ?!   我個腦係諗到實哂㗎   同埋嗰日會零舍唔開心呢 ~

5 點幾終於落好大雨喇   希望無咁焗啦   不過落咗一陣   好快就停雨 ~

仍然好好瞓咁   我點摸佢都無問題   有狗吠都唔理呀

7 點左右出門口   今晚同里奧大人要去官塘廣場買 Memory Card   所以我喺 APM 行陣   里奧大人 8 點左右到   我就去巴士站接佢   行來行去   真係由頭濕到落腳   哈哈 ~

買完都 8 點 45 分   之後去米線陣食晚餐 lu ~

食完都即番屋企   出咗成身汗   想快啲沖涼 ~

睇多陣電視   11 點幾先瞓 ~