煎三文魚柳 ( 11-JUN-2020 )

之前喺 Ikea 買咗一樽辣根醬   用來蘸三文魚真係唔錯

( 11-JUN-2020  THU )

今朝里奧大人鬧鐘響咗   我居然瞓得番   到自己鬧鐘響咗先醒呀   第一次咁 ~

早餐食芝腿治烘底   因為 8 卦叫錯   我 Send 比佢係芝蛋治烘底嘛   咁三文件上枱嘅時候   我心諗啲蛋咁薄嘅   原來係芝腿治   哈哈 ~

菇場勁忙呀   一望個鐘都已經 12 點 ~

今朝鼻塞呀   帶埋口罩真係抖唔到氣   所以我都將口罩放低啲   但又費事唔帶   所以即飲杯 Hot Lemon 打底   同埋一陣食麻辣驅寒 ~

Lunch Time 出去買米線   我唔係咁鍾意打完電話落去拎   因為我怕啲湯凍哂呀   同埋都想落去行下   難得無落雨   雖然勁熱   哈哈 ~

仍然勁忙呀   做到有啲頭暈暈   最慘係右手痛嘛   仲要成日用 Mouse   痛上加痛 ~

放工即走   番到屋企預備好晚餐   之後拖地喇 ~

今晚里奧大人 6 點左右番到屋企   我話未食得呀   叫佢沖涼先 ~

雖然今晚係整隔夜嘢同埋煮麵   但要分幾廿次來整   之得煲飯好過   哈哈哈哈 ~

是日懶餐 - 煎三文魚柳

煎三文魚柳 - 唔想大清潔廚房   所以用光波爐焗啦   但唔得香脆   下次都係唔好懶喇   哈哈 ~

洗埋碗就開機洗衫   之後沖涼休息 ~

咁里奧大人熨衫   見我晾衫嘅時候   佢話又洗衫 ?!?!   我話今晚洗淺色嘛   之後我話係咪好驚呀 ?!   頭先熨完聽晚又要熨   哈哈哈哈 ~

今晚唔睇 "慶餘年"   但睇番 "倚天屠龍記" 呀   哈哈   我都好鍾意小無忌㗎   但其實中無忌同大無忌都鍾意睇呢 ~

里奧大人話 10 點半瞓   我話我 11 點瞓   點知大家一齊 10 點 45 分瞓   呢排可能出得汗多   好快眼瞓咁 ~