煙肉烚蛋 + 鮮肉雲吞湯通粉 + 刴椒皇帝菜 ( 19-JUN-2020 )

家姐話煙肉好似有對腳   我話唔好話似青蛙呀下

( 19-JUN-2020  FRI )

尋晚瞓得勁差呀   醒幾次又好難先瞓得番   今朝完全唔想起身呀 ~

坐巴士又見到多士   不過今朝完全無 Mood 傾偈   其實晨早流流我係想靜下   同埋佢又成日早落車   即係架車啱啱開咗就起身落去等   但都係企喺樓梯等   咁就仲危險啦   下次唔理佢喇   叫佢自己落車先 ~

咁佢又行得急   我又唔知做乜鬼跟佢咁急   我明明大把時間家嘛 ~

今朝 8 點半先到茶記   諗住食米粉餐都唔得 lu   咁食芝蛋治算喇 ~

菇場忙呀   咁都好   唔係中眼瞓 ~

里奧大人同事又請佢食粟米粥   佢就好啦   咁多住家嘢食   哈哈

Lunch Time 去銀行打簿   順便行下   買埋腸粉燒賣就番菇場 lu ~

放工即走   去超市買完嘢就即番屋企喇 ~

我平時好少計價錢   咁今日買得少嘢   所以計啦   明明計咗 $13x   但埋單要 $16x   咁我都以為係自己計錯   但一睇張單   原來計咗粟米湯係 $10.9/罐   但我睇個 label 係 $22.8/3罐先買嘛   最後 Cashier 就退番計多咗嘅錢比我囉   因為佢地搞錯咗 ~

依家超市好多物品都係買 2 件平啲   有時就買 3 件平啲   今次我買嘅就幾乎係買 3 件平啲   所以又好鬼重   我覺得魚仔餅好味道   所以比兩盒家姐工人   希望佢鍾意食啦

番到屋企差唔多 6 點   即刻蒸番尋晚食剩嘅糉同馬拉糕   因為一陣淥菜同通粉   要兩個爐頭一齊開啦   咁慳番啲時間 ~

唉   里奧大人 7 點半先放工   佢又唔講今晚咁遲走喎   我已經唔多舒服又攰   真係想喊呀 ~

8 點幾先開餐   糭同馬拉糕都直頭凍哂   不過我照食喇   唔想蒸熱 ~

我全程黑哂臉   我話下次 7 點後放工就唔煮飯   最憎咁樣等等等 ~

本來諗住煙肉唔脆都算   煮埋通粉就即刻沖涼   凍鬼哂就算喇   真係把鬼火   但又做唔出喎   因為里奧大人都係做嘢啫   比我發個脾氣就可以架喇   哈哈 ~

是日晚餐 - 煙肉烚蛋 + 鮮肉雲吞湯通粉 + 刴椒皇帝菜

煙肉烚蛋 - 本身想煎荷包蛋   但最後都係烚蛋   唔駛咁多油   今晚試下焗煙肉   希望焗到脆卜卜   但焗咗 10 分鐘都唔脆嘅   所以再落鑊煎   但唔知係咪焗咗嘅關係   煎嘅時候啲油無駛彈到周圍都係呀 ~

鮮肉雲吞湯通粉 - 家姐之前比咗 4 包即食通粉比我   今晚大派用場喇 ~

刴椒皇帝菜 - 呢排鍾意食刴椒   可能天氣實在太熱   要食辣嘢開胃 ~

洗埋碗都 9 點幾喇   沖埋涼就休息 ~

里奧大人 11 點瞓   我就睇多陣 Youtube   11 點半左右瞓喇 ~