紅燒五花腩 + 白菜仔 + 荔枝啫喱 ( 17-JUN-2020 )

( 17-JUN-2020  WED )

依家真係覺得戴口罩好熱   但點都一定要戴囉   為己為人嘛   所以次次一番到屋企就會即刻除口罩   簡直係有種解脫嘅感覺呀   哈哈 ~

早餐食腿蛋治   今朝麵包好 Soft   好味好味 ~

菇場忙呀   實在係好事   哈哈 ~

Lunch Time 出去萬寧買嘢   之後再買魚片頭河番菇場食喇 ~

喺萬寧只係 $8.9 一包咋  所以即買 2 包比家姐 & 1 包比里奧大人同事

仍然好忙   但呢排有啲攰   做嘢都慢啲   因為唔想出錯呀 ~

家姐年頭去日本旅行   買咗好多零食比我食   我排住隊食   大包嘅就拎番菇場食   始終夜晚喺屋企   食唔到咁多嘢呢

好忙係好架   因為好快就 5 點   哈哈 ~

放工即走   買埋菜就即刻番屋企喇 ~

里奧大人 6 點左右番到屋企   第一句就話今晚要開會   原來佢都係啱啱先記得   搞到我當堂緊張哂   哈哈 ~

佢午餐食剩半盒煙肉腸仔粒炒飯   所以今晚唔駛煮飯   炒翻熱個飯就可以了 ~

是日晚餐 - 紅燒五花腩 + 白菜仔 + 荔枝啫喱

紅燒五花腩 - 今次用五層鑊整糖色   終於成功喇   上網睇食譜   見到有人會加薯仔   咁我又加咗 2 個細薯仔   煎一下再連五花腩一齊燜   我本來諗住燜耐啲   但里奧大人無啦啦話開會   所以只係燜咗 25 分鐘   但估唔到都好入味   特別係啲薯仔   下次會再整   不過唔整五花腩喇   實在太肥膩   雖然我哋唔食嚿肥豬肉   但夏天真係唔想食咁多肥膩嘢呀   哈哈   但冰格仲有 1 Pack   又要諗下點整好了 ~

白菜仔 - 成日覺得蘸豉油真係好鬼鹹   所以今晚都要開樽甜豉油喇 ~ 

荔枝啫喱 - 終於見到係一杯成型嘅啫喱喇   哈哈   好味道呀   不過下次都係再開多少少水   因為今次嘅啫喱口感都幾結實   有啲啲似食緊啫喱糖   咁我 Send 比家姐睇   佢放大個啫喱問係咩嚟 ?!   我叫佢估   佢話係蕎頭   哈哈哈哈 ~

洗埋碗再大清潔廚房   之後即沖涼喇 ~

里奧大人 8 點準時開會   9 點就開完   叫佢快啲一齊食啫喱   哈哈 ~

佢無啦啦話隻腳瓜 "long" 抽筋   抖咗陣就無事   咁我同佢按下腳啦   佢又話唔駛   不過我係都要同佢按   之後佢話真係舒服好多   我話我唔辛苦   我都係坐喺度幫你按之嘛   因為佢成日覺得我同佢按摩係好辛苦 ~

睇多陣電視   今晚 11 點都瞓   呢幾日覺得好攰   聽晚係時候要 10 點幾瞓喇   哈哈 ~