感恩一覺瞓天光呀 但天氣又濕又熱 都好似瞓極唔夠咁囉 ~
早餐又食芝腿治烘底 今次真係好想食喇 ~
菇場唔太忙 但係時候做 Filing 喇 因為已經堆到兩尺咁滯 但整整齊齊嘅 所以好似一幅白色嘅牆 哈哈 ~
唉 菇場冷氣唔夠呀 好似只係出風咁 我已經諗住 Lunch Time 即出去買牛什河番菇場食 咁唔駛行咁遠 唔駛出汗 點知家姐 Whatsapp 問我晏晝去邊 ?! 佢好少咁問我 因為我番緊工有咩好去喎 之後即問佢乜料 ?! 佢話想我去一田買蟹柳 咁佢叫得我買 即係好想要啦 咁我一定會幫佢買嘅 ~
買完蟹柳再買牛什河就番菇場 好鬼熱呀 但我好想食濕粉麵 哈哈 ~
一路睇 Youtube 一路食真係好 Relax 哈哈
之後同家姐講話買咗蟹柳啦 佢話咁快買咗 ?! 真搞笑 又問我晏晝會去邊 咁唔係諗住我晏晝會去買嘅咩 ?!
仍然忙呀 4 點突然有 Urgent 嘢要做 好在 4 點 50 分搞掂 之後肥仔豪話叫我放假後先再做 Step 2 唔阻我放工 咁我話:好呀 唔該哂 估唔到佢話: 無事 我唔好意思 哈哈 ~
放工即走 番到屋企放低嘢就預備滾湯喇 ~
里奧大人 6 點半打嚟話公司突然有緊急事發生 所以要番番公司做嘢 咁無問題啦 我今晚預咗佢會遲 ~
咁我抖多陣都預備晚餐 里奧大人差唔多 8 點先番到屋企 可以即開餐喇 ~
是日晚餐 - 三文魚柳 + 蒜蓉炒旺菜 + 冬菇元貝節瓜湯
三文魚柳 - 唔知煮咩呀 見冰格有咩就煮咩 今次落鑊煎 煎到香香脆脆 真係好味好多呢 ~
蒜蓉炒旺菜 - 今次用紫皮蒜頭 之前買咁多 係時候清咁啲 咁我將大半個整蒜蓉 整番 3 粒就留番下次 點知我唔小心整跌一半蒜蓉落鋅盤 所以切埋整番嘅 3 粒 即係始終都係整夠一個 哈哈 ~
冬菇元貝節瓜湯 - 我好鍾意飲冬菇湯㗎 呢個湯做湯飯都唔錯 又飽肚 ~
好在食飯前洗埋鑊再大清潔廚房 所以食完飯之後只係洗碗碟 感覺快好多 呵呵 ~
沖埋涼就開機洗衫 之後休息喇 ~
今晚 11 點都瞓喇 呢排好攰咁 ~
沒有留言:
發佈留言