蔥燒玉子豆腐 + 豆豉鯪魚炒油麥菜 ( 9-JUN-2020 )

( 9-JUN-2020  TUE )

一覺瞓咗 9 個幾鐘   真係精神番哂呀   感恩感恩 ~

早餐食奶醬多   唔想食咁飽 ~

菇場忙呀   簡直有做唔切嘅感覺   哈哈 ~

Lunch 食杯麵   阿齋話我呢兩日唔出去   我話無事出街少破財   唔知點解   次次出去都係可以買啲嘢番嚟咁   所以唔出街係好事   哈哈 ~

忙下停下   好快 5 點   可以放工喇 ~

買埋餸就番屋企   浸埋菜就可以抖下 ~

今晚里奧大人 6 點半放工   咁我都預備煮飯喇 ~

是日晚餐 - 蔥燒玉子豆腐 + 豆豉鯪魚炒油麥菜

蔥燒玉子豆腐 - 整埋最後 1 條玉子豆腐   上網睇人哋煮就好易   自己煮就真係覺得非常難呀   成條滑嘟嘟   一切就跌咗 1/4   我心諗   如果跌咗半條   我就成條掉埋架喇   大佬   開鑊煎得 3 粒   真係嘥煤氣啦   哈哈 ~

豆豉鯪魚炒油麥菜 - 里奧大人話點解咁少豆豉鯪魚 ?!?!   我話好多喎   可能係底啦   原來佢鍾意食大片嘅豆豉鯪魚   咁下次我唔整咁碎啦   因為我好熱   所以要慢慢食   之後佢已經食咗大半碟喇   之後我話幫手再食啲啦   咁幫佢裝啲飯   佢居然話好   佢真係好鍾意食呢個餸喎   同埋我話其實我覺得自己只係食緊豆豉炒油麥菜咁   呵呵 ~

食完就即洗碗   之後即沖涼喇 ~

抖陣就食蘋果   買咗要快啲食   其實鍾意食蘋果   但真係好鬼憎批皮同食蘋果芯囉   但無理由掉咗佢吖嘛    因為仲有好多肉呢 ~

里奧大人 10 點半瞓覺   我就 10 點 45 分都瞓喇   都算早呢   嘻嘻 ~