五香粉焗雞翼 + 蠔油燜節瓜冬菇 + 印尼鹹蛋撈麵 ( 2-JUN-2020 )

( 2-JUN-2020  TUE )

今朝里奧大人鬧鐘響   我都諗住繼續瞓   之後到我鬧鐘響   奇怪里奧大人仲未出門口 ?!   原來佢特登教遲 10 分鐘起身   因為我話佢太早起身   我之後真係瞓唔到   濕疹又翻發 ~

我話怪唔得我今朝起身都 OK 精神啦   佢話 10 分鐘咋噃   當一個睡眠質素差嘅人   瞓多 10 分鐘真係好緊要呢 ~

落車去超市買罐頭粟米 + 沙律醬    估唔到咁都撞到多士   傾咗幾句就走喇 ~

早餐食奶醬多   熱到無咩胃口   哈哈 ~

菇場忙咗陣   11 點左右可以 Hea 喇 ~

Lunch Time 去買節瓜   之後再買 Flakes 同蘋果   最後買埋鯪魚球米粉番菇場食 ~

喺街行咗半個鐘啫   真係成身濕哂咁滯   好後悔仲買湯粉食   食完真係熱上加熱 ~

4 點先來忙   好在 4 點 55 分先搞掂哂 ~

放工即走   咁個天想落雨   阿爽即話今日好鬼熱   仲話啲汗係好似倒水咁倒   佢唔咁講   我真係以為自己潮熱   呢兩日真係熱到無朋友呀 ~

番到屋企都即預備晚餐   搞掂哂就拖地 ~

里奧大人 6 點幾番到嚟   我叫佢沖涼先   咁可以精精神神開會 ~

是日晚餐 - 五香粉焗雞翼 + 蠔油燜節瓜冬菇 + 印尼鹹蛋撈麵  

五香粉焗雞翼 - 呢排攰到完全痴咗線   其實我用燒汁醃就可以啦   但我完全唔記得有燒汁呢回事   就咁用生抽老抽醃咋   所以加五香粉再醃 30 分鐘   最後再掃蜜糖就搞掂 ~

蠔油燜節瓜冬菇 - 本來想蠔油燜節瓜冬菇雞翼   但一個餸太少咁   之後里奧大人話下次就咁煮雞翼得喇   唔駛兩個餸   我話其實本身係 1 個餸   只不過我分開煮   之後佢碌大對眼   即係咩意思呢 ?!   哈哈 ~

印尼鹹蛋撈麵 - 上次一田減價買嘅   好似都係半年前嘅事   好在今晚拎來睇下   原來 6 月 20 日到期   呢個月又要食多次   不過我覺得味道怪怪哋咁 ~

大清潔廚房再執下廚櫃   想煮嘅罐頭就拎出來   如果唔係又會唔記得買咗   嘻嘻 ~

搞掂哂就即沖涼   呢兩晚都係開微熱嘅水沖涼   諗起後生嘅時候沖凍水真係好勁   朝早都沖凍水架   不過之後有人話沖凍水唔好   我先唔敢再沖凍水咋 ~

里奧大人 8 點 15 分開會   9 點半開完   可以休息喇 ~

咁唔知睇咩好   又睇 "慶餘年" 第 1 集   里奧大人好大聲話好勁呀   睇第 32 次喇   哈哈 ~

呢排勁攰   今晚 10 點半都同里奧大人一齊瞓喇   雖然覺得早   但我真係需要瞓番夠本   哈哈 ~