泡菜炒飯 (外賣) + 青紅蘿蔔粟米螺頭湯 + 自家製麵包 ( 14-NOV-2021 )

( 14-NOV-2021  SUN )

今朝 9 點半自然醒   所以去徑步喇 ~

徑完步就買早餐番屋企食   之後就拖地   沖完涼就番教會 ~

崇拜之後等里奧大人放工   咁我去搵阿妹同頂爺傾偈呢 ~

里奧大人 2 點放工   因為我想去街市買餸   咁食埋 Lunch 先番屋企 ~

依家里奧大人帶飯   我唔想成日餐餐都係豬   所以去買包無激素雞柳同雞翼   又買水餃   再買湯料同生果   買下買下又 3 袋   好在唔係勁重   但都唔算輕   哈哈 ~

番到屋企即煲湯   今朝已經浸好咗螺頭   所以出埋水再切好青紅蘿蔔粟米就搞掂 ~

叻叻請我食㗎   我好鍾意食呢個零食   但要買 1 大包   所以唔買啦   估唔到今日有得食   勁開心呀

里奧大人就瞓晏覺   我就肯定唔可以瞓啦   因為要睇火嘛   咁沖埋涼就睇 Youtube 過日晨 ~

6 點幾再炒個飯   所以 7 點唔夠可以開餐 ~

是日晚餐 - 泡菜炒飯 (外賣) + 青紅蘿蔔粟米螺頭湯 + 自家製麵包

泡菜炒飯 (外賣) - 晏晝食剩 2/3   所以我再加 4 條香腸   但其實碟炒飯真係得 2 塊細豚肉   唔通正宗泡菜炒飯係咁 ?!?!

青紅蘿蔔粟米螺頭湯 - 好想好想飲老火湯   所以點都要煲湯   唔落豬骨真係無咁油膩   味道仲清清甜甜   里奧大人今餐仲一啖飯一啖湯   真係同佢一齊咁耐   第一次見佢咁食法   不過佢話個炒飯好濃味呀 ~

自家製麵包 - 之前好抗拒蒸熱麵包   但依家超勁鍾意   因為口感真係煙煙韌韌咁呢 ~

洗埋碗就抖陣   8 點幾先一齊去徑步 ~

沖完涼就開機洗衫   之後又睇下 Youtube ~

掛住投票   一望個鐘原來已經 11 點幾   係時候瞓喇 ~