回鍋肉 + 酸齋拚齋鴨腎 (外賣) ( 5-NOV-2021 )

( 5-NOV-2021  FRI )

今朝徑咗一個圈都覺得好熱   之後家姐都話熱   仲話星期日下降 10 度會凍   我話天文台最鍾意將尋日最高同當日最低溫度嚟計   嘥鬼氣   依家都仲要開冷氣瞓呀   會有幾凍喎   只可以講係涼咗 ~

早餐食芝腿治烘底   係時候食啲鹹嘢 ~

菇場仍然忙   依家一忙就會胃痛   唉 ~

Lunch Time 去一田買榮華臘腸    我買新鮮豬肉整嘅加瘦臘腸   買二送一平均 $106/包   家姐話遲啲買好味嘅臘潤腸比我   其實我知家姐都會買   但依家佢 WFH   又唔知會唔會訂   咁里奧大人又鍾意食臘腸   又得呢 3 日做特價   所以照買囉 ~

買完再去大生買嘢   再去買牛腩米就要即番菇場喇 ~

瘦腩都好肥囉   有兩件根本肥到入唔到口   唉

食完就抹枱   原來阿齋攝咗張廿蚊紙喺車銀優張相後面   佢話放嘅時候有啲手震   仲話尋晚比佢發現咗呢樣嘢   佢坐喺我同阿花中間嘛   所以佢擰轉面會見到我成日喺 FB 睇車銀優啲相   之後佢又話埋阿花   話我哋有問題   阿花話係咪你有問題先啱呀 ?!   呢句好笑呀   哈哈哈哈 ~

超級忙呀   放工前都未做完   咁要聽日做 lu ~

放工即走喇   因為要趕巴士   如果走咗呢班又要等 15 分鐘呢 ~

里奧大人已經放工   我番到屋企都即預備晚餐喇 ~

是日晚餐 - 回鍋肉 + 酸齋拚齋鴨腎 (外賣)

回鍋肉 - 1 個椰菜 + 免治豬肉 + 金菇   煮埋出嚟好鬼多   同埋我哋食好少飯   今晚好似直頭只係食餸咁   哈哈 ~

酸齋拚齋鴨腎 (外賣) - 去開一田   所以又買嚟食喇 ~

洗埋碗就抖陣   之後同里奧大人一齊去徑步 ~

一路行一路傾開米酒   我話下次行山    但我未講完   里奧大人問我係咪想帶去飲 ?!   我話我想講話下次行山之後食啲咩啫   佢話明明講緊米酒   無啦啦又講行山食啲咩   哈哈 ~

開機洗衫就沖涼   依排都要投票   都無時間睇文森佐添 ~

今晚 11 點先瞓   因為唔係咁眼瞓咁呀 ~