牛腩米 + 牛腩河 + 腐乳通菜 (外賣) @ 屋企 ( 14-JAN-2022 )

( 14-JAN-2022  FRI )

感恩一覺瞓天光   不過真係仍然好想繼續瞓   因為仲係好攰咁   其實感冒一日假真係唔夠   同埋開工一定唔可以食藥囉   唔係肯定瞓着 ~

早餐食奶醬多   唔想行咁遠呀 ~

菇場忙呀   不過個人都係溫溫燉燉 ~

阿齋走埋嚟話我成日着短袖   唔病有鬼咩   我話知衰啦   終於病咗   哈哈 ~

每年菇場會幫我哋兌換新銀紙   星期二阿慢話我今次開嘅票彈咗   講完就走咗   我再開番張票比佢啦   我心諗   係咪應該叫我再開番比佢呀 ?!   如果我無開   咁即係等如無叫菇場幫我兌換利是錢囉 ~

所以今日要拎一舊錢番工   因為好驚又彈票呀   同埋又唔知阿慢有無去入數   咁如果無入數   我都可以即時去銀行入數嘛   感恩終於成功入票   依家只係好想快啲番屋企放番啲錢   哈哈 ~

Lunch Time 即去買嘢食喇   阿哥話我聲都變埋   我話唔舒服呀 ~

個個見到我個豬扒意粉都好驚訝   話完全唔似我平時   我話唔想食辣嘢   如果食粉麵   我一定會落辣椒油嘛   咁我同小 A 講話呢個算清   佢話呢個都唔算清呀嘛   哈哈   咁又係   但我覺得自己唔食辣就算係清囉 ~

忙咗陣就等放工   我真係差啲瞓着嘅時候   阿爽拍我   問我咩事 ?!   我話唔舒服呀   佢叫我番屋企啦   我話唔駛啦   抖下無事 ~

放工即走   本來諗住煮飯   但最後都係叫里奧大買外賣   因為真係好鬼攰 ~

沖完涼就即刻食一次藥   里奧大人 6 點幾番到屋企   可以即開餐 ~

8 點半瞓咗   一瞓又瞓到 10 點   啱啱好夠鐘食藥 ~

差唔多 10 點 45 分勁眼瞓   啲藥真係令到我成日瞓覺   但感冒真係最好要瞓覺   咁樣自然好快好呢 ~