韓式焗排骨拚薯角 + 蠔汁油麥菜 ( 19-AUG-2022 )

( 19-AUG-2022  FRI )

雖然半夜去咗一次廁所   但感恩都算瞓得好呢 ~

起身嘅時候仲以為今日係星期六   里奧大人一放假   我都會亂哂籠記錯日子咁 ~

今朝 8 點 10 分番到菇場   但西瓜未番   咁我落 Lobby 坐住等   坐咗 10 分鐘   之後職員話西瓜已經上咗去   哈哈哈哈   佢哋唔知我坐喺度   因為我背住佢哋   所以佢見到我嘅時候都好愕然呢 ~

早餐食奶醬多   家姐問做咩唔食吞拿魚治   我話唔想咁飽   因為我之前講話依家唔再食奶醬多   次次都好邪   講完唔食就係咁食 ~

菇場忙下停下   因為又係時間清文件 ~

Lunch Time 出去大生買 1 Pack 汽水同 2 Pack 台灣腸   之後去一田買韓式辣蘿蔔   咁諗住走啦   再周圍望下   見到有土耳其無花果只係 $69   所以即買一盒呢 ~

買完再去買麵包   最後買埋雞翼酸辣米線就番菇場喇 ~

今日 2 點全人類開會   又開到 4 點 45 分   其實個別部門開就得囉   真係浪費時間 ~

放工去超市買香草同辣椒鹽   之後即番屋企喇 ~

里奧大人 6 點幾番到屋企   沖埋涼等開飯   但我話今晚起碼 7 點半先食得呀 ~

咁反正焗薯角要好耐   我就問里奧大人關於開會嘅嘢   始終佢對 Marketing 有經驗   咁我每次開完會都問佢意見   佢都好認同我睇法   所以佢都知我開會根本係浪費時間   好多嘢都簡單複雜化   得出嚟嘅結果只會係亂囉 ~

之後我話終於用哂消費劵喇   用剩 $3   我買午餐要比現金呀   好驚一陣上車負數要入錢   因為我拎住嘢唔方便搵散紙 ~

今次 $2,000 真係用得好快   只係 12 日內用哂   佢話喺超市買嘢用得快   我話次次同佢食嘢買嘢嘟我張八達通呀   之後佢喺度笑   真係當我傻咩   超市嗰次都係三百幾蚊   我同佢講下次要用佢啲消費劵呀   哈哈 ~

土耳奇無花果 ($69) - 算係好平   啲同事見到都話好大隻好靚   我叫佢哋放工去一田買呀   但唔知到時仲有無囉

是日晚餐 - 韓式焗排骨拚薯角 + 蠔汁油麥菜 

韓式焗排骨拚薯角 - 第一次焗薯角   算係成功㗎喇   起碼唔係生勾勾   哈哈哈哈   但真係焗咗好耐   今次整嘅排骨非常入味呀   連里奧大人都話好食   無咩幾何   哈哈 ~

蠔汁油麥菜 - 之前特登留番蠔汁撈菜  咁唔駛為日蘸辣椒豉油咁悶 ~

洗埋碗就開機洗衫   沖埋涼再食生果   差唔多 9 點先睇 "痞子殿下"   所以睇 1 集算喇 ~

睇多陣 Youtube   里奧大人 11 點瞓   我就差唔多 11 點 15 分先瞓 ~