粟米肉醬螺絲粉 + 筋麵蔬菜炒年糕 ( 16-AUG-2023 )

( 16-AUG-2023  WED )

尋晚瞓得都算唔錯   不過都係咁發夢   臨起身前個夢係同家姐唱 K 唱到好夜   搭的士番屋企   之後見露台有成 10 隻白鴿   我係咁影相   影影下就鬧鐘響了 ~

早餐食芝士肉鬆甜餐包   上次上網見到人整芝士肉鬆包   先醒起屋企有肉鬆   咁整呢個包又方便   里奧大人又鍾意食   真係雙贏   哈哈 ~

菇場唔忙   同阿齋傾下偈啦   順便比個按摩球比佢   佢隻腳仲有少少痛   希望幫到佢啦 ~

Lunch Time 出去行陣   再買埋雞翼酸辣米線就番菇場喇   本來唔係食米線   但同 8 卦傾開米線   所以搞到好想食 ~

我一定要扣底同多蔥   但次次真係我有得講   佢有佢做   哈哈

唔忙就 Skype  所以話咁快就放工 ~

買埋麵包就即番屋企預備晚餐   真係激鬼死我   我煲緊蕃茄蓉嘅時候拎隻碟   點知唔小心打爛咗   隻碟跌咗落個煲到   崩左少少   執玻璃彈落我塊臉度   嗰下都痛㗎   但都唔得閒理有無流血   因為我個心更痛   我要倒哂成煲蕃茄蓉   同埋隔離位置嘅乾蔥蓉同脆肉瓜粒   好在我用另一個細碗裝嘅脆肉瓜放喺遠少少   咁肯定無玻璃碎先咁食 ~

是日晚餐 - 粟米肉醬螺絲粉 + 筋麵蔬菜炒年糕

粟米肉醬螺絲粉 - 好在屋企有茄汁   唔係唔知整咩醬汁好   哈哈 ~

筋麵蔬菜炒年糕 - 尋晚食剩   今晚再加埋包醬汁煮   但越食越辣   如果落哂兩包   真係食到着火都似 ~

洗埋碗就開機洗衫   之後沖涼喇 ~

今晚都睇咗陣 Youtube   再靈修咗半個鐘左右都瞓   因為已經 10 點 45 分喇 ~