( 12-AUG-2023 SAT )
今朝鬧鐵響之前都醒咗 不過都係等到鬧鐵響先起身 ~
我就沖涼先 咁里奧大人就去買早餐 ~
咁我食完抖陣 再話同里奧大人一齊出門口 佢話今日番中午呀 我話真係唔好意思呀 之得我自己食早餐啦 佢實係話無所謂 話食完之後可以瞓 不過我話雖然係咁啫 但都想佢瞓夠先食早餐嘛 唔好特登陪我 我已經第 2 次係咁 成日以為星期六佢番朝早 叫佢買早餐一齊食 ~
今朝買埋麻糬比家姐就番菇場 好在無遲到咋 ~
菇場唔忙啦 咁人又少喎 所以越坐越凍 ~
家姐今日同我哋食 Lunch 佢想要轉換器 所以嚟我屋企先 咁佢差唔多到屋企附近 我叫里奧大人接佢上屋企 ~
之後家姐影咗相 佢又拎咗紅白藍袋同 3M 吸濕同驅蚊器 再加 2 條手抽式紙巾 我都話下次我去佢屋企拎 真係比佢激死 ~
放工同小 A 一齊行 我話公司勁凍呀 之後我用隻手掂佢手臂 佢好似觸電咁 因為我隻手實在太凍 佢話阿爽成日開冷氣係 17 度 佢話佢校佢嗰邊係 22 度 阿爽都會校番 17 度 真係黐孖根 好心佢就除咗件裇衫啦 所以小 A 話佢好自私 咁確實係 同埋真係唔駛 17 度啦 根本係寒唔係凍 好傷身㗎 同埋一出去變咗個溫差超級大 好易病嘛 ~
里奧大人同家姐一齊去食店先 好在佢哋早到咋 唔係就無哂卡位呀 ~
家姐話食水煮牛肉 因為佢想我食 我話里奧大人又係咁 我話妳想食咩就食咩 唔駛理我呀 ~
慾望酸梅 (+$8) & 百香果梳打 (+$8) - 天氣熱 真係多數飲啲酸酸咪咪嘅嘢
川香回鍋肉 - 我第一啖係食咗隻紅椒 辣到我咳 之後家姐叫我唔好食紅椒呀 話好辣 但我話我已經食咗啦 個汁係好惹味 但五花腩嘅份量係超級少囉
點睇都覺得五花腩好少囉 哈哈
川式口水雞 (中辣) ($66) - 因為多醬汁 家姐一夾就係雞肶 佢話想食呀 因為佢又係鍾意食脆骨位置 我話食啦 駛咩問呀 同埋我都諗住見到係雞肶都會夾比佢食呢
酸菜魚 (小辣少油) ($68) - 今次酸菜無咩味道 但我又覺得反而 OK 可能口水雞啲汁太辣喇 哈哈 家姐問里奧大人做咩係咁食魚 ?! 佢話其他兩樣好辣 哈哈 真陰功咯
魚嘅份量就真係好多
一路食一路傾 家姐話頭先已經無講話拎紅白藍袋 點解阿妹會叫里奧大人接我 仲話唔通漏咗口風 ?! 之後里奧大人仲搞笑 話係我知道所以叫佢接家姐 我話我肯定無講 因為我根本唔知家姐拎嘢嚟 家姐都話肯定唔係阿妹講 係佢同里奧大人講呀 ~
咁佢再話里奧大人 見到個紅白藍袋 家姐話有好多嘢喺入面 但里奧大人係都要開來睇下 原來佢想直接拎番公司 所以即刻睇下囉 哈哈 ~
食下傾下 好快就 2 點 45 分 咁我要整牙 送埋家姐搭車都差唔多時間了 ~
輸咗嘅請 家姐輸咗 咁走嘅時候 里奧大人行咗出去先 之後指住我哋 我同家姐講話行快啲 因為我要比個 QR Code 佢先比到錢 點知去到原來里奧大人已經比咗錢 我哋話用我手機落單喎 里奧大人話所以頭先就指住我哋張枱咁解囉 我以為用我手機落單 要用我手機先可以知到銀碼比錢添 ~
里奧大人番屋企抖陣 我送家姐去搭地鐵 咁一路行一路傾傾 真係成頭汗呀 ~
3 點半左右到牙醫診所 我話上面啲牙有啲赤痛 特別係漱口嘅時候 但醫生話肉眼睇到隻無問題喎 似下面隻牙有問題 不過我話真係上面牙痛 所以我話照照 X-Ray 最後真係無問題 但下面隻牙都會照 X-Ray 原來真係有問題 牙套太耐 所以有罅 同埋蛀牙都幾深 下次睇下可唔可以挖哂 唔得就要去杜牙齦 我真係聽見都煩呀 同佢哋講話要祈禱祈禱祈禱 佢哋都喺度笑 哈哈 ~
今次度牙套先 下次搞得掂嘅話就再帶埋牙套 希望搞得掂啦 ~
難得出開去 咁去超市買零食比里奧大人同事 比完佢哋就番屋企休息下 ~
番到屋企見到封利是 肯定家姐比里奧大人嘅生日啦 ~
我打比家姐 話都估妳係比生日利是 因為佢唔鍾意遲比 之後話里奧大人比佢嘅生日利是 其實係佢比里奧大人生日嘅銀碼 但就會再加多少少 咁我咪話佢囉 比咁多做咩呢 ?! 來來去去都係去番自己度 哈哈 ~
其實我尋晚都同里奧大人講 家姐應該係比生日利是你 我想叫家姐唔駛比住 但又可能家姐真係純粹約我哋食飯 咁變咗提佢比生日利是咁 ~
5 點幾出發番晚堂崇拜 之後買晚壽司番屋企 lu ~
沖埋涼就抖下 里奧大人 8 點幾先放工 所以今晚唔煮係好明智嘅決定 哈哈 ~
我今日出咗成日街咁 所以同里奧大人一齊 10 點半瞓呀 ~
沒有留言:
發佈留言