招牌泰式去骨海南雞 + 泰式墨魚餅 + 麻辣手拍青瓜 + 油飯 (外賣) @ 屋企 ( 14-NOV-2023 )

2 人餐 ($156)

招牌泰式去骨海南雞半隻 - 雞肉都滑   同埋唔肥     

泰式墨魚餅 x 2 - 比哂里奧大人帶飯

麻辣手拍青瓜 (小辣) x 1份 - 幾好味

油飯2碗 - 我覺得個飯唔夠香   今晚無哂無椰子雞湯   所以改為桂花烏龍茶包   

燒腩仔 ($50) - 個皮脆卜卜呀   真係好鬼開心   下次會再買嚟食

( 14-NOV-2023  TUE )

尋晚瞓得唔係咁好   個腦仲不停諗緊嘢咁   但感恩起身都精神 ~

里奧大人去買早餐   叫我瞓多 10 分鐘   不過要沖涼洗頭   所以其實都要用唔少時間   同埋鬧鐘響咗   都好少話可以再瞓得到呢 ~

早餐食仿鮑片火腿通粉餐   里奧大人呢餐應該夠飽喇啩 ~

一出門口   里奧大人話好凍   我話極其量都係叫做涼   唔係叫做凍囉   因為我都仲係短袖   呵呵 ~

菇場唔忙   但今日 3D   開心開心 ~

Lunch Time 出去行陣   咁我想買芝麻醬好耐   但無做特價   今日喺 360 見到 $38/2 支   所以即問家姐要唔要 ?!   估唔到佢話就係想要 1 支   但成日見 2 支先特價所以唔買   咁就啱啦   我買完就可以同佢 Share ~

買完即去食牛筋河   食完又再行下先番菇場 ~

家姐話見到呢碗綠色嘢就唔開胃   哈哈哈哈   因為佢好驚食蔥

無啦啦好忙呀   不過 3 點左右就搞掂   又可以做自己嘢喇 ~

放工即走   今晚睇中醫   今次醫師第一時間笑笑口問我中文名   咁奇怪嘅   定驚我又心心急急未講完就走呀   哈哈 ~

醫師話我個人仲係濕   但我話已經無咩飲凍嘢喇喎   佢話有3個原因   就係壓力   生活習慣同內分泌   我心諗壓力又真係無喎   唔通煮飯好緊張 ?!   生活習慣都正常啦   唔通早瞓得滯 ?!   哈哈哈哈   咁內分泌問題機會最大   唯有咁諗   哈哈 ~      

佢仍然話我唔夠氣 ?!   我問正常係 100% 夠氣   咁我係幾 % ?!   佢話我係 20%   我話咁咪有排補 ~

里奧大人同家姐估我係 50% 都覺得已經好低   知我 20% 都呆咗   家姐話要問糟糟飲咩食咩先補氣   哈哈 ~

本身諗住同里奧大人食印度嘢   不過見到勇記唔駛排隊就買啦   之後叫里奧大人即刻沖涼   咁等我番到屋企即沖涼就可以食得呢 ~

里奧大人話估唔到我買到   因為上次經過話已經賣哂   佢講講下又有啲印象 ~

沖埋涼就開機洗衫   之後開餐喇 ~

榴槤又請我食零食   我都同里奧大人講話佢實回禮   我請佢食嘅餅乾只係五蚊雞   佢次次都買番呢啲健康零食比我   肯定貴過我嗰啲   咁搞法真係令我唔好意思啦

食完就抖下   熨埋衫同里奧大人一齊睇 "Moving 異能"   不過我睇到 10 點半都瞓覺了 ~