( 15-NOV-2023 WED )
感恩一覺瞓天光呀 7 點唔夠都醒咗 咁啱我都想起身呢 ~
今日請咗假陪家姐去婦科檢查 因為佢係睇我個婦科醫生 咁我就陪佢去啦 ~
家姐尋朝打嚟問同唔同佢食早餐 ?! 其實我都係諗住同佢食早餐 但佢係以為喺診所附近出面食 不過我話我去佢屋企食 順便探 Berry 女呢 ~
咁今朝早咗出門口 所以要轉車去家姐屋企 估唔到都好方便 ~
因為家姐要去買早餐 咁我自己上佢屋企先 反正我有鎖匙嘛 ~
一開門見到工人 我話以為佢瞓覺 所以唔按門鐘 之後佢話星期六放假先會瞓咋 哈哈 ~
咁樣望好似好細隻咁 不過佢以唐狗嚟講真係算細隻呢
我覺得好大隻耳仔
係咪天氣乾燥所以係咁 R 呢 ?!
等食
細個個樣真係勁得意 諗起家姐話會唔會 Berry 大隻咗就唔鍾意佢 真係痴鬼線 哈哈
家姐買早餐番屋企一齊食 等埋工人掃完地就叫佢食沙爹牛肉米做早餐 我覺得兩個早餐三人食最好 始終粉麵都好飽肚嘛 ~
冬蔭功湯底好辣 好耐無食咁重口味早餐 哈哈
今朝頭都未乾哂就換衫 之後見巴士 5 分鐘後到 要即刻飛出門口 錶又無戴 Body Cream 又無搽 所以問家姐有無 Body Cream 工人拎咗佢 4 支私伙 Nivea 同 Vaseline 比我揀 Vaseline 仲要係泰國熱賣嗰兩款 真係貪靚妹 咁我話好香呀 所以家姐即刻話叫工人下次幫我買 因為印尼買係平好多 不過我話唔駛呀 屋企有 5 支 Cream 應該可以搽兩年啦 ~
有啲眼瞓咁
影影下就唔會望鏡頭㗎喇
之後工人幫家姐夾頭髮 夾咗 20 分鐘呀 夾完出嚟個孤型好靚呀 所以我又叫佢幫我夾 我覺得好似啱啱比髮型師幫我整個頭咁 好靚呀 哈哈 ~
家姐又話叫工人幫我買個直髮夾 我話唔駛啦 自己夾未必咁有心機呢 ~
10 點左右出門口 因為搭地鐵 我叫家姐負責睇點去呀 ~
我哋要遲 10 分鐘先到 所以打比診所要遲啲 姑娘話無問題 之後去到都等咗 45 分鐘先有得睇 我同家姐講過可能要等一個鐘㗎 ~
家姐登記資料 姑娘話認得我 我同家姐都覺得好出奇 可能我三個月前嚟過 有啲印象啩 ~
咁我陪埋家姐入去醫生房 醫生見到家姐件衫係八哥 問佢係咪養呢隻狗 ?! 家姐話之前養過 3 隻但走哂 依家養唐狗 醫生話唐狗好大隻 又問家姐係咪領養 ?! 話佢好有愛心 家姐話大家開心 ~
醫生叫我哋食維他命丸 影埋個牌子就搞掂 之後醫生叫我同家姐一齊去 Shopping 哈哈 ~
家姐先搞笑 話唔敢去洗手間 因為未比錢 估唔到佢同我都係咁諗 但因為我有里奧大人喺度等 我就可以去廁所 之後姑娘話去洗手間無問題㗎 ~
一落到去 家姐問我識唔識去加連威老道 ?! 我答唔識 佢都喺度笑 我話次次都係里奧大人帶我行 我無認路喎 之後我開 Google Map 睇咗唔係呢邊方向就搞掂 我話出番去就知有咩地方行㗎喇 ~
去馬莎買薄荷糖 但無我上次食嗰款 之後又睇下麵包同曲奇餅 諗住買幾盒牛油比糟糟 之後叫佢嚟尖沙咀交收 不過佢同咗媽咪入咗西貢 咁唔等佢 lu ~
家姐揀咗開心果杏仁曲奇牛油餅 + 比利時三重朱古力粒曲奇牛油餅 ($72/2件)
印度式香茜蒜蓉烤餅 ($35)
買咗曲奇同 NAAN 之後買埋個法式石烤農家麵包就走人喇
家姐諗住帶我去加連威老道食韓國菜 佢之前同埋糟糟屋企人一齊去過 但糟糟又唔記得邊度 所以去唔到 lu ~
咁我哋由金馬倫道再行去加連威老道 家姐話行番樓梯落地鐵站睇指示 之後行到一半 家姐話唔好係對面條樓梯就係去加連威老道呀 哈哈 ~
金馬倫道同加連威老道係同一方向 我覺得同家姐好似自由行呀 哈哈
家姐又話嚟到尖沙咀要食韓國嘢 不過我話唔想食烤肉 之後佢話同我去打邊爐 呢句我仲驚 ~
一齊睇咗陣衫 之後喺韓國街睇下嘢 ~
下次要買辣泡菜
醬豬蹄都吸引 本來想買番今晚食 但諗諗下都係唔好 一陣仲要去買嘢呢
呢一 Set 好似接近 $230 家姐話抵 我話等佢下次嚟我屋企食飯先買
睇完就再搵地方依嘢 見有間都唔錯咁 所以入去食喇 ~
食店嘅天花板油白色 感覺真係光猛好多
@ PURADAK CHICKEN
開餐
菠蘿梳打 (+$12) & 芒果梳打 (+$12) - 我同家姐覺得芒果起碼都有啲淺黃色啦 所以我哋飲唔出咩味道 但就夠凍都 OK
韓式烤豬肉定食 ($78) - 醬汁係甜甜辣辣 我哋覺得好味道呀 但個白飯就腍咗啲
雞翼雞膇 (4件) (追加 $39) - 家姐話韓式甜醬最穩陣 都好過話要辣 哈哈
韓式炒粉絲 ($98) - 非常之一般 仲要係得少少蔬菜絲 唔通咁先正宗 ?!
影相比里奧大人睇 佢話家姐件衫好啱今日着 哈哈 呢件係工人送比家姐嘅印尼手信 係隻八哥圖案 我以為係糟糟或者係大媽 估唔到係工人送 真係好有心喎 乖女
我成日叫家姐提我出旺角買麵包 之後佢話今晚妳唔係整 NAAN 咩 ?!?! 我話係喎 完全唔記得買咗 佢都大笑出嚟 話點解話有 NAAN 個樣變得咁慘嘅 唔係鍾意食咩 哈哈 ?!
食完就同家姐一齊去旺角 MOKO 一田 佢雖然開住個 Apps 仍都好認真係邊條路線去旺角東 但落扶手電梯時 我話係咪啱方向㗎 ?! 佢話落咗去再搵囉 我話唔得㗎 再上番嚟未必呢個出口㗎 ~
今日搭地鐵都好順利 出口位置又近 最緊要係無搭錯車 哈哈 ~
經過恆香老餅家 家姐買咗 3 個老婆餅同 3 個皮蛋酥 因為要用盒裝住 咁佢買嘢嘅時候比我見到小新袋 仲要係買任何一樣食物就可以加 $20 換 即係買 1 個皮蛋酥都得 不過我要 1 個夠啦 ~
最鍾意黃色袋 隔離係買便當先有嘅
澳洲 Driscoll's 珍寶藍莓 ($119/3 盒) - 姐夫鍾意食 所以家姐買喇 我話無貨都唔駛驚 因為我番工可以幫佢買呢
澳洲牛油果 6 個 ($24.8) - 我同家姐每人 1 袋
卡樂 B 宅卡 B 燒烤味 & 熱浪薯條企身 (好似 $38.9/2 件) - 家姐同工人 Share 食
澳洲紫皮薯仔 (好似 $15.9) - 我覺得平呀 所以買喇
同家姐去一田買藍莓 之後再買下其他嘢 今日第一日激安 但我覺得唔係咁多人 ~
買完之後就去花園街 家姐就要出去整嘢 佢話好多謝我陪佢 我都話今日兩餐都免費好開心 之後家姐打嚟話馬莎嘅曲奇餅係我比錢 哈哈 其實我都唔記得去過馬莎買嘢囉 ~
咁阿花 Whatapp 同我傾偈 之後佢話原來我 A/L 仲話以為我 Lunch Time 咁耐未番係因為去一田 我話買都唔會買咁耐啦 終於明白點解啲人要刷存在感 哈哈 ~
去八珍買豬腳薑同甜麵醬 再買即煮咖哩醬 之後再去花園街行下 ~
呢個刨只係 $20 我之前喺 DAISO 買錯咗刨絲器 所以今次見到有就即買喇 我買完就有幾個人買 唔知以為我做煤 哈哈
里奧大人以為我去咗佐敦 因為佢只係知道我陪家姐去尖沙咀 無諗過我會出旺角呢
最後買埋半隻貴妃雞同鮮榨椰汁 再去買西蘭花同紅蘿蔔 之後就搭小巴番屋企 ~
番到屋企都 5 點半 要快啲預備晚餐 lu ~
打爛咗樽豬腳薑 真係心痛死我啦 之得買方便裝啦 嗚嗚 ~
里奧大人 6 點幾放工 所以接近 7 點先食得 ~
是日晚餐 - 咖哩薯仔貴妃雞 + 印度式香茜蒜蓉烤餅 + 西蘭花
咖哩薯仔貴妃雞 - 間唔中食咖哩真係唔錯 又方便喎 以前整得仲簡單 只係雜丸腸仔 但依家唔係咁想食咁多雜丸呢 頭先買咗半隻貴妃雞要 $65 但屋企附近只係 $50 不過我唔想再行嚟行去 所以點都買㗎喇 ~
營多仍然賣 $30/2 包
印度式香茜蒜蓉烤餅 - 喺馬莎買嘅 $35 有 2 大塊都抵食 但其實 18 號到期 唔明點解唔減價囉 減咗價會開心好多嘛 哈哈 ~
西蘭花 - 諗起以前一煮就 3 個 因為我鍾意食西蘭花 但自從個胃唔好就唔敢食咁多 lu ~
洗埋碗再做小清潔 再開機洗衫就沖涼喇 ~
今晚叫里奧大人熨衫 因為條腰好痛 可能今日揹咗成日背囊呀 ~
之後一齊睇 "Moving 異能" 真係讚壞咗 呢兩集劇情拖得太長喇 有啲悶 ~
里奧大人唔係咁鍾意食牛油果 但我都會照比佢食 哈哈
里奧大人揀緊要邊款嘅時候 阿妹話呢款一定啱我食
係好味喎 第時叫佢幫埋里奧大人揀就可以了 哈哈
咁再睇下電視 又係 10 點 45 分瞓覺 今晚一定要里奧大人幫我按腰拍背脊先瞓覺 好少痛得咁犀利呢 ~
沒有留言:
發佈留言