打邊爐 ( 17-DEC-2023 )

用李錦記沙爹火鍋湯底   再加條粟米

美國特選綠牛梅花肉 ($39) - 呢個真係超級抵   下次會買嚟做儲備

美國安格斯牛肩脊肉 ($68) - 都幾滑   好味過牛板腱

新占記買嘅鳳城水餃 ($35) - 新占記個名其實好熟   好似細細個已經同媽咪成日食   我買水餃雲吞各半打   但拎嘅時候都覺得重   一開個盒都嚇驚咗   因為水餃係超級大隻   等如平時食開嘅一倍呀

招牌雲吞 ($32) - 雲吞都大隻呀   起碼有 4-5 隻蝦

鮮炸魚皮 ($16) - 都係新占記買㗎   呢個好味喎   里奧大人鍾意食薄身   我話最緊要無腥味就真

蝦滑 ($30) - 我問里奧大人打邊爐想食咩 ?!   佢話牛肉水餃雲吞蝦滑嗰啲得㗎喇   其實佢無講蝦滑   我真係唔想再特登行去買   哈哈

韓國急凍蠔 - 終於清哂喇   下次去街市買 1 桶桶嘅蠔仲好   因為真係唔想成日記住要清蠔呀

( 17-DEC-2023  SUN )

尋晚瞓得勁差   真係個人好熱咁   之後醒起食咗炸嘢呀   下次要學里奧大人飲啤酒清熱先得 ~

鬧鐘響都真係唔願起身   我覺得好似無瞓覺咁呀 ~

諗住沖涼洗頭會精神啲   但今次無嘅 ~

同里奧大人去食早餐   其實無胃口   但唔食又唔得   今日要體力勞動呀 ~

芝蛋治要烘先好味

食完早餐去里奧大人公司幫手   同阿妹又傾咗陣密偈   估唔到佢好多諗法係同家姐諗法一樣   怪唔得啲答案咁熟口面啦   哈哈 ~

今朝番完崇拜再去里奧大人公司幫手   無啦啦又胃痛   不過今日有個好重要嘅事奉   所以一定要參與   其實我都呆呆滯滯無咩反應   唉 ~

搞掂就要去買飯比里奧大人食喇   今日佢要開會   所以去佢公司食   不過我無咩胃口   食咗 3 啖飯就叫佢食啦得喇 ~

番屋企放低啲嘢   個人又都 OK 咁   所以搭車去黃埔買嘢 ~

尋晚個色仲靚呀

諗住去 A1   但落車對面係奇華   所以即用埋張 $50 E-coupon 喇   估唔到有麵包買嘅   咁可以做早餐都好   因為馬仔又太甜   皮蛋酥又賣哂 ~

最後勁喇   買咗牛油方包 ($14) + 芝士吐司 ($14) + 黑芝麻糯米糍 ($21)   合共 $52   我比 $2 就搞掂   哈哈 ~

買完去成興隆買多份牛肉同三文魚粒   之後再買埋西班牙免治豬肉就走 lu ~

周圍行陣   想睇下附近有無得買生餃   好感恩見到新占記   所以即買水餃同雲吞喇 ~

諗住買埋白蘿蔔同蝦滑就番屋企   點知又無喎   咁要番屋企放低嘢   再去另一邊買   所以買齊所有嘢   番到屋企原來已經 5 點喇 ~

整好哂所有嘢就大清潔屋企   差唔多 6 點 20 分搞掂   里奧大人啱啱番到屋企   咁我都預備先   叫佢沖埋涼先食 ~

又影張相先   因為之後無咁靚㗎喇   但其實之前仲靚   不過我拎嘅時候唔係放平   所以歪咗啲呢

洗埋嘢再燜餸   之後開機洗衫   差唔多 9 點先沖涼 ~

食埋人參果就睇 Anya   再睇多陣 Youtube   今晚 10 點 45 分都瞓先喇 ~