醉福樓 @ 大埔 ( OCT-2007 )

尋晚放工即走喇   因為趕住去抽血   又唔知要等幾耐   所以索性唔煮飯出街食嘆下算 lu ~

不過一樣要煲藥   唔可以懶   真係好煩厭呀   又要睇火又要分兩次煲又要洗煲   我仲要飲多個半月   好慘呀  ~

番到屋企原來都係好早   但一早諗左唔煮飯就唔想煮   而且又突然好想食生炒排骨   咁等埋里奧大人歸家就一齊出發食飯喇   由於落雨關係   所以只係去屋企附近嘅醉福樓食晚飯   叫咗生炒骨 + 豆腐火肉斑腩煲 + 兩碗白飯 + 1 罐忌廉   食咗兩件生炒骨覺得唔對路   無骨嘅   原來係咕嚕肉   無就早啲同我講嘛   最憎食啖啖肉   不過好在都啲汁好好味   本來想叫多個菜   但里奧大人堅持話唔好   驚食唔哂呀   點知個豆腐火肉斑腩煲有驚喜喎   因為有好多白菜仔   唔洗特登再叫菜   兩樣餸都好大碟   連埋帶飯都食唔哂呀   最正係可以用 $15 換購原價 $39 嘅李錦記 XO 海皇醬  又食又買   埋單 $130   估唔到連酒樓都有平嘢買   不過我只係買 1 樽   因為 Expiry Date 係 2008 年 3 月 ~

做女人真係好好   可以任意買嘢   平呀貴呀咩都買一餐   平嘅自己比   貴嘅人哋比   依家又突然鍾意煮嘢   所以又咩都買一餐   唔用嘅會買   要用嘅買得更多   我格言係 "有殺錯無放過"   只要比我一瞄到係我想要買嘅嘢   雖然無用   我就會即買   因為我會唔買唔安樂㗎   連里奧大人都好羨慕女人買野唔駛睇錢原因呢..哈哈 ~

番到屋企好攰   可能公司太多嘢做有啲唔慣呀   人家嘆慣家嘛 ~

~~~~

今朝食吞拿魚治烘底 + 熱朱古力 ($15)   好滿足呀   如果有里奧大人相伴更好   因為可以唔駛錢 ~

番到公司又忙到爆   做做做   做到 Lunch Time 先停咋   又係帶飯   所以好悶 ~

開工喇   又係勁忙忙   但我都會抽時間同朋友 M 一 M 的   唔係會悶死 ~

感謝神 ( OCT-2007 )

真的感謝神的醫治與保守及弟兄姊妹的代禱   讓我在短短兩星期的甲狀腺及血液含鐵量的指數回復正常   真的感謝神   讓我得到極大的平安與喜樂

在人是不能, 在 神卻不然, 因為 神凡事都能. (可十:27)

磨豉醬炒脆肉瓜肉碎 + 火腿炒蛋 + 字母湯 ( OCT-2007 )

尋日喺公司忙到都無諗到夜晚煮乜好   所以坐車時就喺度慢慢諗   終於諗度煮磨豉醬炒脆肉瓜肉碎 + 火腿炒蛋 + 字母湯 ~

由於淨係買瓜   所以去到街市就慢慢睇   順便再諗埋第晚食乜好   最後買咗 4 條脆肉瓜 ($3/份) 勁抵呀   之後再買牛仔骨 ($30) 就歸家 ~

磨豉醬炒脆肉瓜肉碎 - 肉碎 一早已經醃好   所以就咁切瓜   本來想自己整碎豆豉如蒜頭   但見有樽磨豉醬喺度就費事煩喇   唔係唔用一陣過期就激死   我多數先炒熟肉碎再加埋瓜同磨豉醬一齊炒   再加水焗多陣   搞掂 ~

火腿炒蛋 - 火腿唔用就到期   用嚟炒蛋就最好   勁簡單 ~

字母湯 - 想飲湯但唔想煲湯   所以罐頭湯係屋企嘅必備儲糧 ~

同場加映 - 阿婆腐乳   真係超好食   無渣又好滑   我覺得好味過 "廖孖記" ~

今次覺得個脆肉瓜好好食   夠爽脆   因為之前整親都煮到腍哂   毫無口感可言   唔知點解次次食完腐乳個身就好唔舒服   唔通食物敏感 ~

又唔知點解次次洗碗都好掹   唔用熱水又好似唔乾淨   但用熱水啲蒸氣就蒸哂上我塊粉臉度   點好呀   里奧大人又唔係咁想洗 ~

呢排里奧大人都好細心   知我欠鐵就成日要我食蘋果   仲切開一片片添   而個芯就自己啃   好感動呢   希望以後樣樣都咁細心好啦   例如開燈就有手尾熄燈   .開冷氣時要關房門   燙完衫要摺埋啲衫同收埋燙衫板同摺摺板   飲完野要洗杯   唔好話留番啖比我飲   洗碗時要洗埋爐架之後抹地   掃完地要將掃把放回原位處等等   應該仲有其他嘢   但一時間諗唔到 ~

呢期無線無咩好睇   啲劇集簡直悶到爆炸   好在有有線多個選擇咋   初初諗住取消有線   啲月費太貴喇   依家幾大都唔取消   唔係喺屋企就悶死呀 ~

~~~~

今朝好鬼肚餓   所以食無沙爹味嘅沙爹牛肉麵 + 熱咖啡 ($16)   尋晚瞓得唔好   所以想飲咖啡提神   但又唔想飲 1 杯   所以飲半杯就算喇   好唔捨得呀 ~

番到公司勁忙   咁啱朋友又勁忙   大家上 MSN 打個招呼再傾咗句偈就做做做喇   覺得好充實 ~

晏晝又係帶飯   之後就要睇陣書 Ready 做功課喇 ~

呢排又帶藥 (2 支)   又帶飯又帶書 (1.5 吋)   再加埋銀包 碎銀袋 Key Holder 日記簿 紙巾同披肩   加加埋埋都有成 10 幾磅呀 ~

韭菜豬肉雲吞 ( OCT-2007 )

雖然係星期日   但係啲時間都係好似唔夠用咁嘅 ~

一早諗好星期日煮韭菜豬肉雲吞   所以已經醃好韭菜豬肉同粟米豬肉   尋晚就咁包雲吞就得   預咗半個鐘頭比自己包   點知用 15 分鐘就搞掂   今次用雞粉做湯底   其實想滾啲菜湯做湯底   但唔識呢   煮既時候就非常好   但一撈起時啲   粟米豬肉雲吞就散哂   無一隻係完整   激死   上碗時里奧大人仲以為係粟米湯底添呀   搞笑   今次又係好好食   但本人就開始有啲悶喇   但嚟緊都會有呢個雲吞晚餐   因為包咗 40 隻都仲有成百塊喺度   一係掉咗去   無眼屎乾淨盲   一係就食哂去   我咁慳家就梗係要食哂去啦 ~

食完野洗埋碗就同里奧大人跑步   我跑親都心口痛   所以其實係徑步   跑半個鐘就番屋企 lu   因為要飲中藥同食生果 lu   里奧大人依家要我一日一蘋果呀   因為我貧血又欠鐵   所以要食蘋果喎   其實醫生都開左鐵丸比我啦 ~

尋晚睇有線   肥媽訪問何鴻燊同三太   肥媽話佢哋幸福喎   話次次約親三太飲茶都係要喺三太屋企   因為唔知何生會唔會番屋企食飯   所以要等電話囉   又話何生一打電話比三太話番屋企食飯   三太就會好鬼開心同人講: 佢番嚟食飯呀   講真   我一啲都唔覺得好幸福   .第一唔知個老公幾時會番嚟   要等老公電話   妳話幾慘呀   第二同人 Share 老公仲慘   肥媽公開佢哋好幸福 ?!   肥媽幸福嘅定義都幾恐怖   唔係有錢就代表幸福嘛   唔好咁膚淺啦 ~

~~~~

今朝食腿蛋治 + 熱朱古力 ($14)   番到公司又係忙   晏晝自己出去食牛筋米 ($14)   之後去 Delifrance 換免費咖啡   正呀   我唔係咁鍾意晏晝飲咖啡   但我再唔換就會唔記得   而且 Expiry Date 係月尾   唔記得就嘥哂㗎喇 ~

番到公司前所未有嘅忙忙忙   咁都好 ~

元綠壽司 @ 大埔 ( OCT-2007 )

尋晚好開心   因為家姐特登入嚟同我哋食元綠壽司呀   因為之前申請左元綠 Visa Card   所以有張 Free 刺身 Coupon ($200)   但我同里奧大人就唔係咁好魚生   所以一早已經預左同埋家姐一齊食㗎喇 ~

家姐好少食迴轉壽司   因為佢同朋友多數去日本居酒屋嘆刺身   所以佢覺得好新鮮   而我同里奧大人啱啱前幾日先去完   所以今次好啲喇   多個人食可以食多啲嘢   食咗刺身 (21 片) + 蟹子沙律腐皮壽司 + 天婦羅蟹柳壽司 + 素魚翅海哲壽司 + 蠔情卷 + 冷辣辣麵 + 帆立貝比薩 + 炸雞軟骨 + 兩杯蘆薈涷飲   辣辣麵突然有番隻蝦呀   仲以為自己眼花添   前幾日先話完無左隻蝦家嘛   .唔通比人投訴食物與相片不符 ?!   由於星期六關係   只得 88 折   好過無啦   埋單 $151   都抵嘅   3 個人都好飽嘛 ~

食完同家姐 里奧大人逛陣吉之島就番屋企 lu   家姐好攰呀   所以一上到我屋企見到部 iSqieez 就好開心   按咗 30 分鐘   .期間又一齊傾偈睇電視   所以好快就過咗 1 個鐘   之後家姐就番屋企休息 lu ~

今朝同里奧大人 10 點起身食早餐   去大家樂食咗牛扒腸仔配多士 + 熱好立克   里奧大人就食牛扒蛋配多士 + 熱好立克 ($36)   食完就番祟拜  lu   聽完祟拜已經 1 點   但又未餓   所以周圍逛下   見到有 Sell 花灑既檔口   聽到個後生仔 Sales 話點掉落地下都唔會爛   吉之島買$298   依買 $80 好似好吸引咁咪去睇下囉   個後生仔講野都幾搞笑   佢話有個阿婆問: 個花灑係咪可以用成世㗎 ?!   個後生仔就答: 我唔知妳幾長命   但三五七年都得嘅   我覺得妙問妙答好搞笑呀   最後我都買咗個   $80 用三五七年都抵啦   橫掂里奧大人正想買花灑   之後再去 A-1 Bakery 買細法包 ($9.5) 就番屋企 lu ~

難得星期日   就煮里奧大人至愛嘅丁丁比佢嘆啦   而我就食超甜粟米 + 蒜蓉包   今次啲蒜蓉包失敗咗   焗得太耐   仲聞到有陣燶味添   好彩都入到口咋 ~

食完諗住睇下電視就做功課   .點知睇睇下瞓着咗   好在瞓左 20 分鐘左右   唔係瞓得多夜晚就失眠㗎喇. ~

車仔麵 @ 大埔 ( OCT-2007 )

尋日又開心又攰   因為可以同媽咪去美心皇宮飲茶   食咗雞絲粉卷 + 干蒸牛肉 + 菠蘿叉燒包 + 臘腸糯米飯   .其實美心真係無咩好食   不過媽咪話坐得舒服所以先去咋   同埋我覺得都幾貴   4 碟點心 + 2 位茶要 $122   唔係咁值囉   但媽咪鍾意就算啦 ~

嘆完之後就即刻番屋企附近覆診 (甲狀腺)   我比預期早一個鐘到   諗住博下早啲到早啲睇   點知都係無用   一樣要等到原定既時間   好在帶咗 Notes   可以一路等一路睇   咁啲時間先過得快啲咋   不過有時等叫名都幾好笑   因為有啲人名好特別   尋日聽到有個叫 "吳開登" 同 "杜友 "   好搞笑呀   等左個半鐘終於叫我名喇   一入到醫生房   醫生仔就奸笑咁問: 依排妳覺得點呀 ?!   我答係咪翻發呀 ?!   醫生仔話係呀  比預期高咗 1x %   要食藥喎   我話知啦   不過我依家食緊中藥喎   醫生仔個樣好無奈   而姑娘就好緊張咁問: 妳做咩食中藥呀 ?!   我話調理身體囉   姑娘就哦   其實我都知唔應該同西醫講自己食中藥㗎喇   無聊想睇下佢哋有咩反應啫   不過佢哋又比我想像中無咁偏激喎   醫生仔笑笑口話妳知應該點做㗎啦   我話知啦   食藥嘛 ~

其實我係唔會食甲狀腺藥   因為我依食緊中藥   又中又西想死咩   而里奧大人就話啲西藥好似唔係咁好咁嘅   3 月 停藥 10 月又翻發   等埋下星期睇中醫先再作打算   順便自己再驗血   睇下食咗中藥有無改善到   因為醫院驗血報告係我睇中醫之前驗嘅   當時仲未開始食中藥調理   希望啲中藥有效啦 ~

咁啱里奧大人見完客番咗屋企   咁我拎完藥就同里奧大人拿拿聲食個晚餐喇   得半個鐘頭咋   因為要趕住出九龍城番學   所以只可以食車仔麵   里奧大人食牛腩 + 魚蛋 + 生菜米粉   而我就食豬腸 + 炸菜 + 生菜米粉   埋單 $34 咋   又平又好味   食完里奧大人可以番屋企嘆   但要煲完中藥先   我就即走喇   成日樸嚟樸去真係好攰   我居然喺車度瞓添呀   可能食飽想瞓啦   落車時見仲有少少時間   所以急腳去九龍城廣場既 "阿里爸爸" 買朱古力   諗住 $40/100g   求其買十粒八粒   點知成 $76 呀   好心痛呀   唔好食就死喇   後即刻打比里奧大人   話買咗啲好味既朱古力比佢   叫佢比番錢我啦 ~

今晚係學校嘅中期測驗   15 條題目我答啱 13 條呀  勁開心呀 ~

放學打比里奧大人   佢話有啲餓喎   所以又去食宵夜喇   就係腸粉 + 魚蛋 + 牛丸 + 炸魚皮 + 燒賣   Order 嗰陣時就好興奮   但食嗰陣時就覺得黐咗線   叫咁多做 Mood   兩個人差唔多食到反白眼出去呀 ~

~~~~

今朝好開心   因為可以同里奧大人去美心食早餐   我食至愛既吉列魚柳腸仔配多士 + 熱朱古力   里奧大人就食牛扒煎蛋配多士 + 熱華田   好好味呀   因為有我至愛既酸瓜粒沙律醬呀 ~

番到公司好多野做   搞到咩 Mood 都無哂   我發覺次次都星期六先特別多野做㗎噃 ~

里奧大人又要番學喇   晏晝得番我一個人喺屋企食   為咗慳家   所以自己炒飯   用蔥粒同火腿粒做配料   食落又唔錯噃   之後就好忙忙忙   因為要拖地 開機洗衫燙衫 煲中藥   好攰呀 ~

懶人餐 (灣仔水餃 + 米粉 + 菜心) ( OCT-2007 )

尋晚真係黑仔   因為巴士爆呔呀 ~

其實我放工期間都會有吉車   但尋晚好攰想早啲番屋企   所以唔等吉   見巴士有位就上   咁啱我又一袋二袋   所以坐下層   想瞓又瞓唔到   咁就睇下書咁啦   去到隧道入面突然聽到好大聲 "卜"   嗰刻好驚   以為前面發生嚴重車禍   但聽到隔離個女人同電話中人講: 慘喇   架車爆呔   我個心都定啲   好在架車去到隧道尾可以捱到埋站咋   如果唔係就真係慘喇   又好在個站有幾架巴士可以番到屋企   唔駛等死一架   就肯定要企囉 ~

落車即去街市買左 1 斤菜心 ($8) 就走 lu   番到屋企即刻洗菜浸菜   仲好有心機咁拻埋啲衣   食落口無渣真係正好多 ~

喺里奧大人回家途中我已經開始煮野喇   務求里奧大人一番到屋企唔駛等就有得食   尋晚既飯餐真係好簡單   灼菜心 + 灣仔水餃 + 米粉   灼完菜再煲水再煮水餃米粉   便又簡單   而我既午餐仲未落格   所以剩食水餃 + 雙丸 + 菜心   但原來都好飽 ~

之後同里奧大人散步   再去 Jusco 日本城 萬寧買嘢   又用咗百幾 lu ~

番到屋企就即刻沖涼   睇陣電視就即刻瞓喇   因為之前一晚瞓得唔好   要瞓幾晚先補到呀 ~

~~~~

今朝早咗番到公司附近   所以可以慢慢嘆早餐   芝蛋治 + 熱杏霜 ($14) ~

番到公司有野做喇   今次要快啲做先得   因為晏晝同完媽咪飲茶之後就要去覆診呀   今晚又要番學   所以覆診完又要出番嚟番學   樸嚟樸去   攰死 ~

呢排天氣又熱番喇   諗起之前果個星期有啲涼意幾正呀   估唔到咁快就無 ~

8 折的元綠尋司 ( OCT-2007 )

尋日諗咗成日都諗唔到食乜好   而里奧大人又叫我唔好煮   咁就令到我更加唔想煮喇   可喺媽咪屋企瞓得唔係咁好   所以好攰   腦海一片空白   咩都諗唔到呀 ~

依就算番到屋企幾攰都好   都要煲藥   唔係夜晚同第朝會無得飲   仲要煲多兩個月呀   點頂呀 ~

里奧大人差唔多 8 點番到屋企   但仲未煲好啲藥呢   所以索性大火開蓋煲   煲完即走人喇   因為驚元綠好多人等位呀   去到好在有位啫   之後同里奧大人講不如食啲新嘢無咁悶   但我哋揀嚟揀去都係食番嗰啲   有冷辣辣麵 + 三文魚手卷 + 蠔情卷 + 鮮帶子壽司 + 天婦羅蟹柳壽司 + 素魚翅海哲壽司 + 和味茄子 + 元祿燒雞比薩 + 兩杯巨峰蘆薈   冷辣辣麵縮皮呀   以前係 1 隻蝦 + 3 片青瓜 + 蟹柳絲   依家得啲青瓜絲同蟹柳絲咋   不過又幾啱得喎   我次次都係將隻蝦比里奧大人享用既   因為我食咗會好易皮膚敏感嘛   杯飲品係買一送一   叫 1 罐可樂都十蚊啦   依家 $16 有 2 杯喎   唔飲對唔住自己啦   埋單嗰時仲開心   因為原來用元祿 Visa Card 係有 8 折   埋單 $155   好過用元祿會員卡 (88 折) 呀   再送埋 7 折 Coupon 比我   真係好正呀 ~

見唔駛煮飯咁他條   梗係要做番啲野嘅   就係開機洗衫喇   以前好鍾意出街食飯前開機洗衫   因為可以慳時間同埋一番到屋企就可以即刻晾衫   做運動嘛   但依就唔會 lu   因為睇報紙成日都有洗衣機電線短路燒燬成間屋   好恐怖呢   妳知屋企有好多貴重物品同紀念性物品家嘛 ~

之後里奧大人話前晚按摩遇到啲搞笑嘢   話說里奧大人開完會就同女同事一齊去按摩   間按摩店係有另類服務提供嘅   如果要的話   必須事先通知按摩店經理   因為房間係有啲唔同   里奧大人話間店都 OK   最正係張床   有成 3 呎   唔似深圳嗰啲瞓上去就趺就趺咁   我覺得最正係我唔在場   開頭嘅時候   里奧大人都有同按摩女郎傾下閒偈   之後當按摩女郎幫里奧大人按隻飛毛腿時   按摩女郎就莫名興奮咁同里奧大人講: 我好鍾意男人有毛㗎   你見過方中信未㗎 ?!   佢好多心口毛㗎   咁你心口有無毛㗎 ?!   里奧大人個心好驚但扮鎮定   用極平音嘅語氣咁話: 我無㗎   我心口無毛㗎   之後個按摩女郎無啦啦咁拿起里奧大人條短褲嚟裝呀   嚇死人咩   之後按按下又掀起里奧大人件衫袖睇下有無加拿大毛   又話你啲眼睫毛好長好靚呀   個按摩女郎真係好鍾意毛呀   連眼睫毛都唔放過   可憐嘅里奧大人已經嚇到標屎喇   之後成個過程里奧大人都係扮瞓覺   唔理個按摩女郎   個按摩女郎無癮先唔搞里奧大人咋   我就笑死   里奧大人就嚇死   哈哈 ~

太攰喇   所以11 點 就瞓 lu ~

~~~~

今朝好唔想食三文治   所以食沙爹牛肉麵 + 熱朱古力 ($16)   飽到上心口呀   飽到 Lunch Time 仲未諗到食乜   行下行下就去赤丸   因為之前同家姐 里奧大人一齊食過   .覺得好好食   所以好想去食   咁啱公司附近又有嘛   橫掂要排隊   等下無妨   因為我仲未肚餓   唔想周街行亂買嘢   但等咗 5 分鐘就有位   真係唔知好彩定唔好彩   食咗冷烏冬 ($15/大) +煎肉腸 ($12)   啲烏冬又係好煙韌   但自己一個食就覺得無咁好食   嗰刻好想家姐同里奧大人陪我一齊食   講真   我食咁多次 Lunch   啲感覺最差係今次   好似我番第一份工咁   記得係叫外賣嘅   坐喺自己位一路食一路喊   掛住屋企人呀   之後夜晚約家姐搭地鐵番夜校時   一見家姐就即刻喊咗好耐呀   嚇死家姐同埋坐地鐵啲人   不過呢啲喊嘅習慣到依家咁大個人都無改過   里奧大人出 Long Trip 啦   媽咪去旅行啦   我都仲係會喊   可能係擔心佢哋啩 ~

食完就去萬寧買 Cream 比媽咪   Olay 草本淨白保濕霜 ($149.9) + St.ives Hand Cream ($29.9) + 自己買 2 包 Extra 香口珠 ($14)   又用咗 $193.8 喇   我想儲錢呀 ~

晏晝又係做下嘢又 MSN 咁囉   優質生活保持不變 ~

住家飯 @ 媽咪屋企 ( OCT-2007 )

尋日成日都好開心   因為夜晚可以見到我深愛嘅朱朱 ~

放工即走人啦   好快咁就去到媽咪屋企 lu   一見到深愛嘅朱朱熱烈地歡迎我   真係開心到爆呀 ~

原來尋日家姐工人無去度媽咪屋企   所以要媽咪親自煮餸呀   媽咪煮咗 4 樣餸添呀   有燜節瓜海參雞腳 + 茄汁豬扒 + 煎沙椎魚 + 灼白菜仔 + 南棗北芪豬𦟌湯   但係得我同媽咪人食咋噃   之後家姐同里奧大人打嚟問有咩餸呀   我話有咁咁咁   後佢哋都係話: 嘩...咁多餸 ?!   話時話又真係幾多喎   但我當時唔覺得多   因為次次番親屋企食都有 4-5 樣餸   而且家姐同工人都喺度食   但今次佢哋唔喺度咪好似好多咁囉 ~

食完飯媽咪洗碗   我好嘆呀   食完唔洗做   之後再同媽咪一齊睇電視一齊傾偈   一齊食日本番薯同提子   好有賞月 Feel 呀 ~

之後媽咪瞓覺 lu   我就同深愛嘅朱朱一齊 "灘" 喺梳化度溫書   朱朱仲 "灘" 落我心口度係咁舔我塊瞼添呀   好得意呀 ~

我家朱朱真係好得意㗎   我瞓佢又瞓   我 VV 佢又 VV   佢成晚喺度昅實我㗎   我一郁佢就望   我一落床佢就撲   試過有次我瞓得唔好   每個鐘頭都醒一次去 VV   點知每次朱朱都跟住我呀   妳話幾窩心呢   所以次次我第朝一走佢就會由朝瞓到晚   因為成晚無瞓過呀   次次都係咁㗎   勁搞笑呢 ~

~~~~

今朝好開心呀   因為同深愛嘅朱朱 媽咪同家姐一齊食早餐   同家姐 Share 油占多 + 五香肉丁麵 + 火腿腸仔   今次飲熱咖啡喇   因為早咗起身   好驚無精神番工呀 ~

番到公司有做喎   不過無咩 Mood 做添 ~

晏晝梗係帶飯啦   唔駛自己煮嘅特別好味 ~

好嘆呀   做下嘢   又 MSN 又睇下 Blog 咁囉 ~

黑椒牛仔骨 + 南瓜栗子粟米湯 ( OCT-2007 )

難得星期六   一定要煲湯潤一潤下   今次煲南瓜栗子粟米湯   湯料勁喇   有 1 個中國南瓜 + 4 條粟米 + 20 粒栗子 + 豬𦟌 ($18)   因為誓要煲湯係超甜嘅   再煮多個黑椒牛仔骨   正呀 ~

成日覺得星期六啲時間過得好似特別快   3 點幾食完 Tea   番到屋企煲藥 煲湯   之後煮飯未停過 ~

南瓜栗子粟米湯 - 今次又係續粒續粒拻啲粟米   真係粒粒皆辛苦呢   南瓜就切到細細粒   再加埋豬𦟌出水   拻栗子   整呢幾樣嘢都整咗半個鐘呀 ~

黑椒牛仔骨 - 用韓國醃牛肉醬汁嚟醃   真係好味啲㗎 ~

不得了喇   煲湯真係超甜超好味呀   但杰咗少少   不過都好好味   牛仔骨又係好好味   全靠李錦記黑椒汁同韓國醃牛肉醬汁   所以唔關我事   唔想叨光 ~

洗埋碗抖陣就同里奧大人跑步 lu   因為太想郁下喇 ~

晏晝 3 點幾飲咗杯咖啡   搞到我成 1 點先勉強入睡咋 ~

~~~~

今朝 9 點半要起身喇   因為番自己教會係比較需時   同里奧大人就去教會附近既餐廳食早餐   我食粟米牛肉腸 + 熱華田 ($19) 好好味呀   而里奧大人就食沙爹牛肉炸菜肉絲出前一丁配炒蛋多士 + 熱華田 ($21)   呢期豬肉貴呀   所以呢間餐廳無五香肉丁供應   真係好少見餐廳會咁做

最多係比少啲   唔會唔供應囉 ~

番到自己教會嘅感覺真係好舒服   因為附近左右梗有一個係妳識得嘛 ~

祟拜之後里奧大人就約媚媚食 Lunch   幫好朋友做兄弟呀   赴湯蹈火都要去啦   而我就要繼續做我做不完嘅功課喇 ~

番到屋企成 2 點半先食 Lunch   求其炒碗飯 + 食剩嘅 3 塊牛仔骨咁就 OK 喇   又慳錢又方便   之後坐喺梳化抖下   居然瞓咗呀 ~

梅菜燜雞翼 + 腐乳西生菜 + 炒飯 ( OCT-2007 )

尋日里奧大人成 5 點先番到屋企   悶到我死呀   之後又一齊夾手夾腳煲中藥呀   煲完又要煮飯 lu ~

我一啲功課都無做呀   死喇   好在一早諗定好煮梅菜燜雞翼 + 腐乳西生菜 + 炒飯 ~

梅菜燜雞翼 - 用咗 1 棵大嘅甜梅菜   再加啲蔥   用老抽生抽嚟燜半個鐘 ~

炒飯- 切菜脯粒蔥粒   加一隻蛋炒炒炒   搞掂 ~

腐乳西生菜 - 浸菜   搞爛腐乳   又搞掂 ~

梅菜雞翼燜得唔夠耐   味道唔多夠呀   但里奧大人話好食喎   其他唔駛講啦   無咩特別 ~

~~~~

今朝塞車呀   9 點 10 分先番到公司附近   唔可以去嘆早餐喇   所以就咁買 $10 燒賣粉果番公司食   飲公司供應既 Nestle 咖啡   之後好忙喇   成 12 點先做完所以野咋 ~

晏晝帶飯   啲野全部入哂味   好鹹呀 ~

呢期人生無咩樂趣   因為睇緊中醫唔可以食辣野呀   無得食辣真係少咗好多選擇 ~

又無野做   可以好 Free 喇 ~

打火機燃恤衫 街坊爆匿藏地點 百厭孫燒阿爺 險變火人 - 因為無聊   所以特登燒阿爺見衫   係咪顛㗎   家陣啲細路真係好難教呀 ~

求其西餐 ( OCT-2007 )

尋日 4 點先番香港   番到屋企都 5 點   咁攰又要煲藥   當然唔煮飯啦   但又諗唔到食咩好   所以同里奧大人一路行一路睇有咩好食   落街真係有啲涷   行到有冷氣地方都有啲 涷到頂唔順呀   行下行下搵到間環境唔錯   價錢又抵嘅西餐廳   嗰度啲燈陰陰暗暗咁   令人超級想瞓覺呀   所以即刻同里奧大人睇 Menu   唔係驚瞓着咗呀   食咗煙三文魚凱撒沙律 + 拿破崙意粉 + 野菌牛油蒜蓉包   最正係有杯 Fresh Juice   我飲蕃茄汁   里奧大人想減肥飲西柚汁   估唔到今次求其搵嘢食都有驚喜喎   Overall 都好食   最緊要係抵嘛   $88 點搵呀 ~

之後行陣書局就番屋企 lu   因為手同腳好冤痛   梗係啦   拎 14 包中藥再加 3 包沖劑   唔痛先奇呀   番到屋企突然周身唔舒服   里奧大人要我探熱   99 度添   里奧大人話少少燒喎   其實我不嬲體溫高㗎啦   多時都係呢個數字嘅   但里奧大人係都要迫我食退燒藥   又中藥又西藥   都唔知係咪想我死 ~

之後真係要瞓覺喇   樸咗成日真係好攰好攰 ~

~~~~

今朝 9 點要起身呢   因為約咗 11 點 25 分 Body Check   求其去大家樂食炒米粉 + 熱華田 ($14)   食完拿拿聲去百佳買豬𦟌 ($18) + 牛仔骨 ($33) + 2 包豆豉 ($5)   奇怪咁早就咁多人排隊   原來買滿 $50 有 95 折呀   唔怪之得啦   之後即刻飛奔去街市買 1 個南瓜 ($12) + 4 條粟米 ($10) 就走人 lu ~

番到屋企即沖涼洗頭換衫走人   驚遲到呀   好在時間啱啱好咋   不過都要等個半鐘先有得睇   真係要減肥喇   又再一次比人以為我係大肚婆呀   因為有人望完我個肚就讓位比我坐呀   仲係都要我坐添呀   我話唔駛喇妳坐啦唔該   其實真係好想話比佢知我唔係大肚㗎   Check 完行咗陣商場就番屋企等里奧大人 lu. ~

里奧大人成 3 點先番到屋企   所以唔可以食咁飽   唔係夜晚食唔到飯呢   為咗慳家   去茶餐廳食   我食墨魚丸魚皮餃湯濛 + 熱咖啡 ($23)   而里奧大人就食油醬多 + 腸仔午餐肉煎蛋飯 + 涷檸茶 ($29)   之後番屋企喇 ~

薄皮韭菜豬肉雲吞 + 節瓜大眼雞湯 + 北上睇中醫 + 彩碟軒 ( OCT-2007 )

一早已經諗好煮韭菜豬肉雲吞 + 節瓜大眼雞湯   所以放工只需要買 1 斤雲吞皮 ($10) + 2 條節瓜 ($5) + 1 條大眼雞 ($24)   搞掂 ~

首先又係煎香條魚   之後切節瓜粒滾 45 分鐘   非常簡單   之後就包餃子喇   今次啲皮勁薄   所以包得好辛苦   包左 30 隻左右   今次懶醒用雞蛋埋口   點知埋極都埋唔到   之後問里奧大人點搞好呀   里奧大人話用蛋白得㗎喇   激死我   嘥咗隻蛋添   之後剩用蛋白又真係好黐好多喎   總叫做有番啲心機   但都係包得樣衰衰囉   仲剩番成百塊雲吞皮喺度   咪即係代表仲要包 3 次 ?!   我唔想再包呀 ~

里奧大人一見到餃子仲開心過見銀紙   食到 "殊殊聲"   真係好好味咁喎   講真   又真係幾好味嘅   可能我鍾意食醋同蒜蓉啦   再飲埋碗湯   好鮮甜呀   因為又係滾到奶白色呀 ~

搞掂哂所有野就沖涼   睇下 "味分高下"   想唔睇㗎   但好想睇彭丹呀   覺得佢成日比人整古好頂癮呀   但睇到吐提子嗰 Part 真係睇到我想嘔   好核突呀   之後睇陣書就瞓 lu   因為聽朝要 7 點起身北上睇中醫呀 ~

~~~~

今朝 7 點 Morning Call   之後拿拿聲沖涼洗瞼北上 lu   一出到羅湖已經打蛇餅   不過好在等咗唔係好耐就可以過關   深圳嗰邊無咩人排隊   淨係香港先要排隊咋   梗係啦   又唔開多幾個 Counter   同埋覺得香港個 "e 道" 好慢   所以搞到打蛇餅   唔該香港政府改善一下啦 ~

8 點 50 分到左深圳即打的去醫師度   好在唔多人   好快就到   最開心係醫師肯比多兩星期藥   咁唔駛個個星期都北上嘛   請假好麻煩   差唔多 10 點 45 分就同里奧大人去三島食早餐   食咗餐蛋麵 + 熱華田 (RMB20)   個麵就真係唔多掂   無味嘅   但杯華田有驚喜喎   好重麥芽味   唔通係加咗奶 ?!   真係好正   因為香港飲嗰啲係好淡好淡   嘆完就即去交通樓嘅廣益子按摩   1 個鐘頭做腳 + 2 個鐘頭做身   我同里奧大人都覺得麻麻哋   不過又幾平喎   埋單兩個人合共 RMB285   算啦   心理上真係有啲舒服嘅 ~

諗住同里奧大人去丹桂軒飲茶   但要等 100 個籌呀   兩點幾喇噃   仲咁多人嘅 ?!   100 個點等喎   但好想飲茶呀   所以同里奧大人退而求其次去彩碟軒飲茶   環境 OK  啦   食咗金菇牛肉腸 (無金菇同埋用一大嚿牛肉片一齊蒸   口感唔掂) + 流汁金沙包 (難食   奶皇口感似食沙糖   仲 "益益" 哋味添 + 灌汁小籠包 (難食   肥豬肉一舊   無汁既) + 飄香榴槤酥 (熱辣辣但係榴槤蓉   唔係榴槤肉囉) + 鹵水掌翼 (無咩味) + 鵝片和風拚盤 (鵝片 OK   海哲無味   叉燒無味)   總括嚟講係唔好食   但平囉   百幾蚊   但唔會再有下次 ~

4 點番香港 lu   又過咗一日咁滯 ~

東東水餃米粉 ( OCT-2007 )

悶到爆炸   好在差不多到 5 點老闆請食 Cake   仲要係 ItalianTtomato 呀   食咗半件 Blueberry Cheese Cake   食完又差唔多放工 lu ~

諗極都諗唔到煮咩好   煩死   之後去超市買豬肉 ($11)   再去街市同埋韭菜 ($4) + 3 個木瓜仔 ($10) ~

番到屋企又係煲藥   之後醃韭菜豬肉   留番第晚煮   因為醃一晚會入味啲   但都仲未諗到食咩好喎   又想出街食   但又要睇住煲藥   所以最後我決定淥東東水餃 + 龍蝦丸 + 魚腐 + 蟹子丸 + 雜豆同米粉 ~

校啱時間煮   所以里奧大人一番到屋企就有得食喇   我覺得自己真係一個好老婆呀 ~

最鐘意係淥野   因為一個煲就搞掂   唔駛洗九萬幾樣野咁煩呀 ~

洗洗下碗   個鋅盤塞咗   之後里奧大人全副武裝上陣嚟通水喉   但整極都仲係塞住   之後居然話我 "都叫妳唔好成日倒啲菜渣 藥渣㗎啦   依家塞住去唔到水"   我幾慶呀   我都無咁做到   之後我話 "得啦   第時我唔洗碗   你洗碗啦" ~

真係勁激氣   咁樣屈我   激到心口痛   條氣谷住喺喉嚨   又好想喊   幾辛苦呀   又唔知道自己成日話買個隔渣器番嚟   話買話買   買咗成年都未買   我買又話我唔識買   你話係咪激到我死吖   之後食生果時   我都係用啲 無尾音嘅語調叫佢食咋   切都唔切比佢呀   咁衰 ~

我個人係開心唔開心個樣都會擺喺臉度嘅   比人咁話梗係臉色唔好啦   里奧大人應該 Feel 到   所以佢臨瞓前都同我講 "對唔住   頭先咁惡話妳   I love u"   我條氣先順番咋   唔係肯定嬲瞓唔着呀 ~

~~~~

今朝里奧大人要北上   得我一個人弧零零等車   有啲唔慣添   今朝車程比較快呀   所以可以慢慢食早餐   食腿蛋治 + 熱杏霜 ($14)   今朝一路食一路睇頭條   係就係幾嘆   但我覺得一路食一路睇係會阻慢咗食嘅進度   同埋會睇到唔知時間   所以又遲咗少少番公司喇 ~

今朝又忙喎   好在啲嘢野唔急   可以慢慢嚟做   一路 MSN 一路做野其實幾好喎   個感覺真係好似有朋友喺妳隔離陪妳咁㗎 ~

晏晝同媽咪去美心皇宮飲茶   食咗干蒸牛肉 + 糯米飯 + 魚湯鮮竹卷 + 百花釀魚肚 + 紫米露   勁飽   媽咪又比左 2 磅黑提子我   又請我飲茶   又食又拎添   咁啱老闆又唔喺公司   可以遲啲走仲正 ~

番到公司無咩 Mood   要抖陣先可以做野   諗起聽日放假   星期六 Off 再加埋星期日   好似連續放 3 日咁呀   長短週既星期六放埋今個月咋   真係要好好珍惜   聽朝又要早早起身北上睇中醫   之後應該會去按摩   再去丹桂軒食飯   好開心呀 ~

司機沿途講電話超速衝燈   亡命小巴猛撞情侶變炮彈   真係好憎啲咁無公德嘅司機   大佬   16 條人命嚟家嘛   其實對亡命小巴真係又愛又恨   愛係因為價錢唔貴又快   幾夜都有得坐   係因為惘顧人命安全   其實坐亡命小巴嘅過程真係好驚   因為實係超速   次次都成百米呀   最攞膽係啲司機似 "鏈" 車   見車過車   真係唔敢瞓㗎   試過有次個司機喺度 "中" 眼瞓   我坐喺第二排見到佢咁樣   我即刻打醒十二分精神昅實佢   如果佢真係合埋眼   我會即刻叫佢起身同比幾粒 Extra 佢食   等佢精神啲   好在佢都無瞓到咋   真係坐一坐搞到精神衰弱呀 ~

照燒汁炒洋蔥朱肉 + 炒三色椒 + 粟米湯 ( OCT-2007 )

尋日真係好攰   諗咗好耐都唔知煮咩好...因為前一日醃左啲梅頭   所以一定要煮   但又唔想梅菜炒豬肉   差唔多番到屋企先諗到煮咩   就係照燒汁炒洋蔥朱肉 + 炒三色椒 + 罐頭粟米湯   簡單得嚟又有營養 ~

去到街市都幾徬徨   檔檔都好似作收咁嘅   比平時遲咗 10 分鐘啫   唔係咁呀化 ?!   之後加快腳步買咗 1 個大洋蔥 + 青/黃/紅椒各 1 隻 + 1 個細薯仔 ($15) ~

番到屋企又要機械式工作   就係煲藥   好煩呀   最憎係睇火   同埋霸左一邊爐頭   用一邊爐頭煮野真係好麻煩   有好多限制   最慘係唔可以滾湯   其一係滾得嚟里奧大人都已經番到屋企   其二係又飲湯又飲中藥成肚水   夜晚肯定要成日去洗手間呀 ~

今次都懶喇   淨係切洋蔥絲   三色椒求其斜角切就算喇 ~

由於有時間限制   所以煲咗罐頭粟米湯先...之後炒洋蔥豬肉   加啲燒汁嚟炒呀炒   我第一次咁煮㗎咋   希望食得落口啦   之後再清炒三色椒 (什麼都無加)   因為真係唔知可以用咩嚟炒佢哋   再整多碟薑蓉   其實唔想嘥咗啲蔥尾   所以用嚟整薑蓉就最啱   蔥頭就可以留番後用   好慳家呀 ~

估唔到碟照燒汁洋蔥朱肉既味道又唔錯噃   但碟三色椒真係幾難頂...但唔緊啦...有營養d嘛....

洗完碗就整沙律 (2 個富士蘋果 + 1 罐椰果 + 1 罐頭細雜果)   原因係蘋果放左喺雪櫃好耐   沙律醬 08 年 1 月到期   椰果 12 月到期   再唔食就會唔記得㗎喇   諗住加薯仔   點知煲得唔夠耐   切起嚟 "Shot Shot" 聲點食喎   所以掉咗   嘥哂   咁樣整都係用咗半支細既沙律醬   仲有支本點用好呀   里奧大人又唔食呢啲醬   我唔想食沙律食到驚呀 ~

終於 9 點 30 分搞掂哂所有野   可以沖埋涼   坐定定咁讀書   但讀咗半個鐘都唔係咁入腦   .咁點做個讀書報告呀   9/11 要交㗎喇   點算好呀   可能隔日煮飯係好啲   因為煲藥 煮飯 洗碗真係無哂私人時間呀 ~

~~~~

今朝食芝蛋治 + 熱朱古力 ($14)   又係好好味   因為唔駛趕頭趕命咁 ~

番到公司   睇下 Blog MSN   寫下 Blog   上網睇下報紙   飲下水放下水   睇下 Blog 又 MSN   飲下水放下水   叮飯食飯   我嘅工作就係咁㗎喇 ~

晏晝又係帶飯   之後好勤力用半個鐘頭嚟讀書   因為難得公司咁靜 ~

聯合醫院發生醫療事故   產婦輸血延誤   老翁無端輸血   咁都得嘅 ?!   唔會 Double Check 病人資料既咩 ?!   好恐怖呀   其實可能仲有好多醫院成日有醫療事故   不過唔比揚出去咋 ~

我甲狀腺機能亢進   所以要定期覆診   記得前年喺聖母醫院覆診   醫生要睇驗血報告先可以 Check 到有無問題   點知醫生話我做咩抽兩次血   我話我抽過一次血咋噃   佢再睇   完來係另一個病人既血液報告嚟㗎   好在我清醒咋   如果唔係唔知點算喇   都唔知有無搞錯   咁離譜嘅   之後我要求即刻轉介第間醫院   好在可以轉到咋   唔係真係無病變有病呀   因為次次睇親都好激氣   醫生唔掂   服務又差 ~

叉燒炒飯 + 油麥菜 ( OCT-2007 )

呢排要煲中藥   所以要煮啲簡單餸   仲要係只可以用一邊爐頭   因為一陣要留番嚟煲中藥 ~

是日晚餐係叉燒炒飯 + 油麥菜   所以就去咗超市買叉燒 ($12) + 火腿 ($16.8)   再去街市買 1 斤油麥菜 ($6.5) + 4 隻恐龍蛋 ($13.5)   之後急步番屋企   因為里奧大人已經在途中 ~

番到屋企第一件事係煲中藥   之後浸菜   切叉燒粒   切火腿絲   切蒜頭粒   切蔥粒   切薑粒   咁都搞左成半個鐘呀 ~

叉燒炒飯 - 十分易煮   將啲叉燒粒 火腿絲 蔥粒 薑粒 蛋 冷飯   再加生抽老抽炒埋一齊就搞掂 ~

油麥菜 - 十分易煮   用蒜頭起鑊   炒到熟為止   真係好易呢 ~

由於我驚啲菜無味   所以整多碟薑蔥蓉   可惜食緊中藥唔可以食辣   如果唔係加幾隻指天椒一齊爆仲正 ~

好在我同里奧大人都覺得個炒飯同菜好食咋   唔係真係無咩心機㗎   因為煮餐飯真係好攰   尋晚由 6 點半做到 10 點   仲辛苦過番工呀   又要洗又要煮又要洗碗   又要掃地又要燙衫   攰到我連書到無心機睇呀 ~

之前留肚食 Cheese Cake   驚過期呀   里奧大人無啦啦咁好溫馨咁餵我食   又幾好噃   之但係我都係覺得自己食好過囉   因為里奧大人唔夠 5 秒就第埋嚟   大佬   搞到我成口都係蛋糕   里奧大人自己都忍唔住笑呀   如果我係小朋友就一早啃死喇 ~

實在太攰   所以 11 點就瞓喇 ~

~~~~

今朝食吞拿魚治烘底 + 熱杏霜 ($15)   用一個好 Enjoy 嘅心情去食真係零舍好味   番到公司都有少少嘢做   好過無啦 ~

晏晝帶飯   之後去 Market Place 買冷麵汁   但好鬼大樽   所以唔買 lu   橫掂屋企附近有 Jusco   唔駛山長水遠拎咁重野嘛 ~

又種菇 lu   越無嘢做就越眼瞓   快啲放工啦   快啲星期五啦   快啲星期六啦 ~

酒樓 @ 大埔 ( OCT-2007 )

尋朝同里奧大人去大快活食早餐   食咗牛扒蛋 + 熱好立克 ($18)   之後番自己教會   見番啲弟兄姊妹真係好開心   啲感覺好舒服   最搞笑係詩班啲姊妹   見到我 O 哂咀   以為我有咩事   做咩成半年無番嚟   我話主要係里奧大人要讀書做功課勁忙   所以比較難抽時間番嚟   就去咗屋企附近嘅教會   好在我仲係咁肥肥白白啫   唔係以為我有病添呀 ~

祟拜後同小組弟兄姊妹食飯   好開心呢   因為真係好耐無見佢哋喇   總之就係好開心啦   去咗金加利   食咗豬脾骨沙律 + 肉醬意粉   又幾好味噃   真係好飽   因為早餐仲未落格呀 ~

食完就同里奧大人行咗陣   去 Clinique 買磨砂膏 ($160) 同 Mascara ($145)   再去 J's 買咗對耳環 ($348) 送比家姐既生日禮物   之後約埋其他姑奶去薄扶林拜祭老爺   今次勁樣衰呀   臨走去洗手間   無睇到男定女就行咗入去   VV 下望到隔離格嘅鞋咁似里奧大人嘅   我仲諗女人好心就咪着男裝鞋啦   之後開始標冷汗   唔係入錯男廁嘛   所以拿拿臨 V 完走出嚟   一出嚟見到有個短頭髮嘅人喺度照鏡   佢個樣仲好驚   佢驚我仲驚呀   我心諗係 TB 定真係男仔呀 ?!   嚇到我即刻扮鎮定咁行出嚟   望下個牌   原來真係男廁嚟㗎撞鬼   好在我同里奧大人係着情侶裝咋   俾佢見到都以為頭先見到既係里奧大人嘛   無咁樣衰呀 ~

之後同里奧大人去永安買嘢   目的係想買支 Stick 比媽咪   點知都係失望而回   但今次里奧大人就有收穫喇   就係買咗個 "新秀麗" Backpack ($800)   因為好難搵到啱心水嘅 Backpack   所以買到真係好開心   之後再去食品部   買日本烏冬 + 喬麥麵 + 大咀鳥特濃花生朱古力 + 番石榴乾 + 七味粉   用咗 $88   好意頭 ~

感謝神   因為一出去就有巴士到   如果唔係又要等 20 分鐘喇   之後去咗屋企酒樓食晚飯   食
鹽焗雞 + 京都骨 + 豉汁蒸蒼鯧 + 竹笙津白 + 炒西蘭花 + 燜豆腐 + 芝士焗中蝦   啲嘢食 OK 啦   喺唔同嘅酒樓食係一件好事   因為唔駛年年都食同一間咁悶   但點解又會食番同一樣餸   幾時先唔駛咁悶呀   連我 9 歲兒甥仔都話好悶   食嚟食去都係嗰啲   救命呀 ~

番到屋企開始煲中藥喇   個電子煲無料到嘅   煲成個鐘啲水仲係度   反而個瓦煲又 OK 喎   激死人   之得唔買個電子煲啦   兩個人嘅藥   8 點煲到 11 點   最慘係臨瞓前要飲一碗   咁夜晚實要去廁所啦 ~

~~~~

今朝食咗芝蛋治 + 熱杏霜 ($14)   我真係希望戒到咖啡奶茶同涷飲啦   因為醫師話要戒口   番到公司有啲嘢忙   搞到頭都暈   Lunch 食菜肉雲吞 + 炸菜 + 米粉 ($13)   勁抵又好味   菜肉雲吞又多菜   啱哂我呀 ~

依家同里奧大人每日飲 4 次中藥 + 沖劑 (要空肚) 飲到嘔白泡呀 ~

8:30am 沖劑 9:00am 中藥 / 11:00am 沖劑 11:30am 中藥 / 3:30pm 沖劑 4:00pm 中藥 / 9:00pm 沖劑 9:30pm 中藥)

北上睇中醫師 + 水餃 ( OCT-2007 )

7 點要起身喇   因為 8 點鐘約咗賓姑嘅老爺奶奶一齊食早餐之後北上睇中醫呀   因為中醫果度要經熟人先可以睇㗎   同里奧大人食麥記   我食咗魚柳包   而里奧大人就食咗火腿扒通粉餐   咁就有足夠體力北上喇 ~

去到深圳打的去中醫度   地方簡陋   但尚算乾淨   好多國內嘅高幹子弟都係睇呢位中醫㗎   咁唔會亂診症啩 ~

我又係超緊張   所以打脈嘅時候   醫師同兩個助手都不停講放鬆啲放鬆啲   醫師打脈又好準喎   話我好易攰   脾氣唔好   貧血等等等等   我係無講過出嚟㗎   之後再用儀器 Check 下脈搏   心跳 血液等等   出嚟報導係身體十分差呀   張 List 有 35 點   我 23 點唔合格呀   雖然唔知部儀器堅定流   但都唔係咁好啦   仲話我唔調理身體就 50 歲會仲風添呀   嚇瓜我咩   .我仲有好多野未做㗎   里奧大人好需要我㗎    我唔可以咁快死㗎   本來里奧大人唔睇嘅   但見個醫師都有啲料到   所以睇埋一份   結果係 11 點唔合格   所以只需北上睇 4 次   我要睇 10 次呀   兩個人睇咗 RMB2,400   好貴呀   我仲要睇 10 次添   希望真係有果效啦 ~

執左 2 大包藥   仲送埋 2 個瓦煲仔   好在里奧大人揹 "吉" 嘅背囊   同埋我堅持帶 3 個環保袋   因為咁已經用咗 2 個環保袋喇   仲有 1 個要留番嚟裝書用嘛   之後同爺爺佢哋分道揚鑣   我同里奧大人就打的去深圳書城中心城買書   個的士司機幾衰呀   蝦我呢個淑女呀   當時里奧大人講緊電話   找錢時比張爛既一蚊紙比我   我話爛嘅   佢就話: 用得㗎   我哋都咁用嘅   我咪即刻好惡話咁你用啦   你換過另一張比我啦   之後佢換番比我囉   講真   一蚊唔係多   但我好憎佢啲態度呀   幾大都要佢換呀 ~

去到書城行左陣舖頭就去咗間西餐廳食自助餐 ($58 免加一)   所以去試下   預咗無野食   不過見咁多人食覺得比較乾淨啲咋   食咗粟米 + 咖哩雞 + 炒飯 + 天使麵 + 咕嚕肉 + 肉串 + 炸雞寶 + 雜菜湯 + 橙汁  啲同志真係咩都做得出   侍應拎住盤食物一路行   啲同志就一路夾   真係第一次見咋   笑死   之後就開始行書城喇   買咗唔少書呀 ~

you/身體使用手冊 (RMB29) /家事一點通 1000 例 (RMB29.8)

養健康寫在臉上 (RMB29) / 身體大排查 (RMB28)

做人做事的鐵規矩 (RMB25) / 聖經的智慧 (RMB39)

致命人生的 65 個壞毛病 (RMB26)  / 101 個做人最容易犯的錯誤 (RMB28)

中國智慧謀略全書 (RMB48) / 摺巾 300 例 (RMB14.8)

烚到好處做老公 (RMB28.5) / 做自己的心理按摩師 (RMB28)

買咁多都係用咗 RMB 353.1 咋   我未試過一口氣買咁多書   因為真係好抵   里奧大人都話廿幾蚊咁抵   唔洗諗喇...買啦...咁我當然會十分認同佢既講法啦   不過如果係繁體字仲正   又買咗一大堆書   真係好重   所以唔去按摩即刻番屋企 lu   到火車站見到君蘭餅店   忍唔住買左個蜂蜜芝士蛋糕 ($32)   可以好滿足咁番屋企喇 ~

里奧大人番到屋企第一件事係磅下啲藥.+ 藥煲同啲書有幾重   有 41 磅呀陰公   里奧大人有對強而有力嘅雙臂都話重呀   搞到我好心痛添   明明話唔重家嘛 ~

之後又要再落街買電子煲 ($248)   真係好攰呀   人都顛呀   好在夜晚去賓姑奶屋企食水餃   可以嘆下唔洗煮咋   不過食完之後又要去 Jusco 買 Themos 保溫杯 (特價 $171)   又要買 2 個先得   咩都打孖嚟 ~

番到屋企里奧大人好主動咁洗煲浸煲   洗杯浸杯   見到佢咁勤力真係好感動   因為由朝早 7 點到 11 點都好似未停過咁   真係好辛苦好攰呢 ~

之後就沖涼   食蛋糕就掃下地   執下野又睇下電視   之後瞓覺 lu ~

KFC @ 九龍城廣場 ( OCT-2007 )

又要番學喇   又攰又開心 ~

今次特登先去 $10 店行一陣   買咗個蛋糕模同日本即食紅豆蓉   只係 $20 咋   去 Baking Warehouse 買紅豆蓉都要 $15 啦   所以真係好抵   但要自己拎   無謂買咁多啦   之後再去食神傳說買咗包 Cacao 64% 朱古力 $8.8   用嚟提神呀 ~

之後去 KFC 食照燒雞腿包套餐 ($26)    好難食呀   又話係照燒汁   原來係厚厚既沙律醬   成 2 湯匙咁多呀   最慘係有塊雞皮喺度...好難拻出嚟   所以要一路食一路 "妹" 啲皮出嚟   好核突呀   個薯格都 OK   熱辣辣   但食咗幾塊就唔食 lu   因為唔想生粒粒   嘥哂添   好在杯可樂可以拎走啫 ~

放學就即刻番屋企 lu   里奧大人主動要求喺屋企附近巴士站接我   之後一齊去咗食腸粉同魚蛋 ($10)   啲腸粉好滑呀   之後見到街邊有串燒   又買咗兩串牛肉 ($12)   好好味呀   因為實在太想 BBQ呢 ~

同里奧大人番到屋企要早啲瞓   因為要 7 點起身北上睇中醫 ~

茄汁煎雞柳 + 豆角煎蛋角 + 炒飯 + 節瓜紅衫魚湯 ( OCT-2007 )

忙忙忙   忙到 4 點半先清哂所有嘅嘢   真係好攰呢   好在已經諗好煮咩餸   就係茄汁煎雞柳 + 豆角煎蛋角 + 炒飯 + 節瓜紅衫魚湯 ~

今次放工唔洗咁趕   因為淨係去街市買兩樣嘢   買豆角 1 扎 ($3.5) + 紅衫魚 2 條 ($18)   好貴呀   兩魚仲貴過我成餐晚飯呀   一條又驚唔夠味喎   辦法啦 ~

番到屋企放鬆心情   洗過面先開始整嘢   第一件事係即刻煎香條魚   節瓜粒   水滾就放哂所有嘢   搞掂   .雞扒係之前一晚已經醃好咗   所以淨係切蒜頭 薑絲 蔥粒   再將豆角粒切成 3mm   真係好有心機㗎   因為我覺得一粒粒咁咬落去會有口感   同埋最緊要係用心去整每樣野   係好食啲㗎   切粒粒既時候里奧大人就打嚟話已經上咗車   望廳個鐘 7 點 05 分仲有時間   再係咁切切切   再望下廚房個鐘已經 7 點 10 分   心諗切咁耐都係切咗 5 分鐘 ?!   走出廳睇   原來已經 7 點 20 分喇   嚇死我   好在切哂所有嘢 ~

我成日覺得啲豆角有臭青味   所以求其用蒜頭 + 燒酒 + 麻油 + 鹽 + 糖嚟爆香佢   其實唔知有無用嘅呢   我用左 4 隻蛋嚟煎蛋角   原來都好花時間去煎   仲以為好快可以搞掂添   之後煎雞柳   唔落油嚟煎都煎到啲油 "必" 哂出嚟呀   恐怖   再拿拿聲打個茄汁茨 (有蒜蓉 + 薑絲 + 茄汁 + 喼汁 + 豉油 + 水)   又搞掂   最後就用剩餘物資 (豆角粒) 嚟炒飯   加隻蛋加啲生抽老抽嚟炒   好爽口呢 ~

好好好開心呀   因為今次個湯終於成功呀   係奶白色嘅魚湯呀   而里奧大人又話啲餸好好食   梗係啦   我好有心機   真係切粒粒切到手臂都粗埋呀 ~

之後就洗埋碗...掃下地...燙埋衫就沖涼 lu ~

夜晚睇電視   見到肥肥反白眼喺擔架床度   好慘呀   不過覺得欣宜仲慘   咁細個就要面對媽媽隨時唔喺度嘅   最慶係啲記者阻住哂喺度係咁影相   好心啦   救人真係差一秒就一秒家嘛   之後又問欣宜媽咪既情況點呀 ?!   好心比啲空間人啦   點知啫   咁危急情況唔喺妳面前失控咁喊已經好叻㗎喇   仲喺度問問問   好討厭 ~

突然覺得做人真係好化學   真係要好好珍惜生命   真係要好好珍惜屋企人呀   唔可以用任何籍口做掩飾呀 ~

~~~~

今朝 7 點 15 分 要起身喇...因為要去醫院抽血   雖然 8 點半先開始   但都係早啲好   可以預埋時間食早餐先番公司嘛   7 點 55 分 去度已經有廿幾人排隊   好在早啲到啫   8 點 35 分就到我抽 lu   之後即刻搭車到屋企附近快速咁食埋早餐   丁麵 + 熱鴦 ($17)   超級飽呀   之後拿拿聲搭車番工   差唔多番到公司就落毛毛雨   感覺好淒然呢 ~

晏晝帶飯   可以慳番食飯錢   其實帶飯算唔算係打斧頭既一種呢 ?!

女人真係咩都講一餐   聽到老闆喺洗手間大叫救命阿 xx 無廁紙呀   咁啱成班女同事喺 Pantry 度   所以其中一個同事拎廁紙比老闆   之後老闆出嚟好掹話搞錯   無廁紙嘅 ?!   係咪邊個邊個去完   再同班女同事吱吱喳喳咗成 10 分先出番嚟   洗唔洗呀 ~

今晚要番學呀   希望有精神啦 ~

聽日 Off 北上睇醫師   時間許可既話就希望行書城 按摩同食野呀   諗起都開心呀 ~

將你的事交托耶和華, 並倚靠他, 他就必成全 (詩篇37:5)

豉汁排骨飯 + 馬拉盞炒通菜 + 怪蛋 ( OCT-2007 )

尋日 Yahoo 更新 Blog   無得睇好慘呀   無無聊聊咁睇下報紙   又諗下煮咩餸好  就諗左啲簡單嘅餸   即刻打比里奧大人講晚餐煮豉汁排骨煲仔飯 + 馬拉盞炒通菜   佢幾開心呀   因為整佢嘅至愛煲仔飯呀 ~

尋日喺公司真係由朝忙到晚呀   所以做到 5 點比自己抖抖留番第朝早呀   因為條腰骨實在太痛太痛喇 ~

放工即刻走人   又知道里奧大人差唔多 8 點先番到屋企   所以可以慢慢買野   去咗超市買排骨 ($15) + 煲仔飯豉油   再去街市買通菜 ($6/斤) + 大大梳皇帝蕉 ($12)   其實梳蕉唔想買   太多喇   成 20 幾條   人家拎嚟睇下啫   阿姐就即刻擺落袋隊比我   唔買唔得啦 ~

番到屋企開始洗菜浸菜   醃排骨再切蒜蓉豆豉   好快手呀   望過鐘係 7 點咋   咁之前見唔舒服咗幾日   無人執屋掃地   無人拖地   忍唔住咪做囉   想燙埋衫㗎   不過要 Ready 煮飯先無做咋   仲辛苦過番工呀   如果里奧大人肯自動自覺哀求做家務就好喇 (除洗碗)   難過仲幾億六合彩呀   算吧啦 ~

豉汁排骨飯 - 超易   將啲蒜頭豆豉再加多一湯匙磨豉醬混埋喺排骨度   其實可以用現成醬   不過我覺得自己整碎嘅會有味啲   擺喺飯面度蒸   懶得睇火   之後將啲飯擺落個瓦煲仔度   再舖上排骨   所謂嘅豉汁排骨煲仔飯就搞掂喇 ~

馬拉盞炒通菜 - 喺泰國舖頭買嘅馬拉盞   炒嗰時唔香   我覺得仲有少少壓味咁   所以落咗好多   因為唔想再用   之後再加多 3 隻指天椒   有啲攻鼻   應該夠辣   可以上碟 ~

怪蛋 - 因為覺得只有兩樣餸頗為單調   同埋唔知啲蛋仲等得幾耐   唔想嘥野呀   所以用燒汁同黑椒碎炒咗 3 隻蛋   又搞掂喇 ~

里奧大人一番到屋企見到煲豉汁排骨飯就好開心   因為以為我咁勁呀   食到咁上下我就問里奧大人呀   呢煲飯幾分呀   里奧大人諗左成 10 秒就話 80 分   話係裝假狗   都唔係真嘅煲仔飯嚟嘅   大佬   我已經買埋煲仔飯豉油務求做到足啦   比少少面好喎   又唔知我幾辛苦   特登將啲飯放喺瓦煲仔再舖啲排骨喺面   要洗多樣野㗎   之後再陸陸續續係咁彈   話啲菜太辣   又話啲咩蛋嚟㗎   咁怪嘅   但又係咁食喎   啲蛋係我留番用嚟帶飯家嘛   食哂人哋 ~

好開心呀   因為里奧大人已經完成份功課喇   但依家輪到我做功課呢   到我做完時又到里奧大人忙功課同應付考試   快啲到 2008 年 6 月啦   我就可以自由喇 ~

~~~~

今朝食芝蛋治 + 熱檸茶 ($14)   一食親芝蛋治就會諗起里奧大人   因為我同里奧大人之前番工嘅地方好接近   所以會一齊食完早餐先番工   好懷念呀 ~

番到公司做埋尋日啲手尾   好在 Lunch Time 前做完   咁就可以寫 Blog 同做其他嘢嘛 ~

晏晝帶飯   之後去百住買嘢   因為家姐話收到電話信息   話喺百住買滿 $40 就唔知有幾多積分喎   咁我咪盡下人事囉   買包紅梅乾比媽咪   再買咗黑椒汁 + 咖哩膏同竹籤比自己   咁又用咗 $53 喇 ~

太興 @ 大埔 ( OCT-2007 )

突然好想食乳豬   又突然好想食啲濃味嘅餸   所以去太興   但都係博一博咋   因為太興未必次次都可以食乳豬㗎 ~

好在今次有啫   同里奧大人 Share 食乳豬飯套餐 (菜心 + 涷檸樂) + 蝦醬炒通菜牛肉 ($83)   都抵食   因為環境好靜   好怕啲茶餐廳嘈冤巴閉   真係食到頭都痛埋   太興就好少見係咁   我唔係買廣告㗎 ~

番到屋企開機洗衫...沖涼就瞓覺喇 ~

~~~~

今朝食芝士火腿菠蘿包 + 熱咖啡 ($15)   飽到呢 ~

番到公司勁多嘢做呀   好在 Yahoo 更新 Blog   唔係真係唔知做得邊樣好喇 ~

晏晝無咩胃口   食腸仔通粉算喇    $11 就搞掂   之後諗下煮咩餸   就諗咗豉汁排骨煲仔飯 + 馬拉盞炒通菜喇 ~

救命月餅 + 番茄味薯片 ( OCT-2007 )

尋日頂唔住   終於 3 點鐘請病假走人   好辛苦呢   睇屋企樓下個醫生   好在等 1 個就到我咋   睇完去東海堂買 Muffin   但一見到個 Muffin 突然間好想嘔   放低即刻番屋企算喇 ~

番到屋企即刻沖涼食埋啲昏昏欲睡嘅藥就瞓覺 lu   由 4 點半瞓到 10 點   有啲餓   但無杯麵又唔想開火煮   食咗 1/4 月餅同少少藩茄味薯片   好飽呢   之後 10 點 45 分里奧大人就放學番到屋企 lu   我就更加安心地瞓喇 ~

啲藥真係好勁   瞓極都唔夠   定係我累積嘅疲勞呢 ?!   如果可以瞓夠先番工就好喇 ~

~~~~

今朝有啲胃口   所以食咗腿蛋治 (走牛油) + 熱朱古力 ($14)   今次真係要慢慢食呀   因為之前成晚無食過嘢   好驚一食就頂住個胃呀   其實食完都好辛苦   不過好過唔食囉 ~

番到公司有嘢做呀   平時又唔見咁多野做   人家病先有野做   玩我咩   不過我真係無咩心機做   個人好攰好攰   個胃又頂住頂住搞到我好想嘔   但又唔敢食止嘔藥   因為係會超級眼瞓㗎   一陣都係瞓覺唔食 Lunch 喇   唔係唔知點頂呀 ~

瞓瞓下   有同事喺度大大聲講公事   明知有人瞓覺就細聲啲啦   麻鬼煩   嘈鬼住哂   好在都瞓到 45 分鐘咋   唔係就死啦   之後食咗條 Picnic 就食藥喇   真係好想嘔   所以一定要食止嘔藥   捱多 3 個半鐘啫   捱到嘅捱到嘅 ~

車仔麵 (外賣) ( OCT-2007 )

尋日 10 點起身   食咗五香肉丁麵 + 熱鴦   里奧大人食五香肉丁米粉 + 熱鴦 ($34)   之後打的番祟拜 lu   個人唔係咁舒服   所以都係打的番屋企 ~

番到屋企 Hea 咗陣   之後里奧大人就山長水遠咁買咗粉果 + 燒賣 + 魚蛋 + 生菜魚肉 + 脆辣雞腿包番屋企一齊食   一齊睇下電視咁   之後里奧大人又趕功課 ~

我就瞓一陣 lu   由 4 點瞓到 6 點   係好咗啲   但夜晚肯定瞓唔着呀   之後里奧大人陪我坐一陣睇新聞   再做多陣功課   又要出動買晚餐喇   無咩胃口   所以食車仔麵   我食魚蛋 + 炸菜 + 通菜 + 幼麵    里奧大人就食牛腩 + 雞翼尖 + 生菜 + 米粉   平時我食雞翼尖時就話好肥   見我唔舒服自己就即刻食   肯定知我無氣力話佢呀 ~

睇完亞蘇都無睡意就知道晏晝瞓多咗   但都唔理照瞓喇   瞓到 2 點幾又眼光光   之後係咁瞓下醒下就鬧鐘響喇   好唔想起身呀   因為我覺得好似無瞓過咁囉 ~

~~~~

今朝買奶油多 + 熱朱古力 ($15) 番公司食   個人都無咩心機   晏晝唔想食   淨係想瞓   好在瞓到啫   不過都係好攰 ~

感恩下午茶 + 食棧 ( OCT-2007 )

尋日番到屋企差唔多下午茶時間   見到酒樓外面有 10 幾人排隊   所以我唔蝕底又排埋一份   因為呢間酒樓次次都好多人排隊等位   見條人龍唔係太長   博下運氣啦   等咗 35 分鐘就可以入座喇   仲要係里奧大人一嚟到就有枱嗰隻添呀   梗係我一路等一路祈禱   求神保守里奧大人嚟到嘅時候係有位   等佢可以快啲食完快啲做功課呀   所以呢餐下午茶叫做感恩下午茶呢 ~

同里奧大人合力叫咗鴛鴦雙潮 ($11.8) + 粟米花枝餅 ($11.8) + 蘿蔔糕拚馬啼糕 ($11.8) + 生磨合桃露 ($5) + 上素蒸粉果 ($6.8) + 香茜牛肉腸 ($12.8) + 爽脆海哲 ($20) + 叉燒瀨粉 ($14.8)  + 蟹粉小籠包 x 2 ($36) + 碧綠灌湯餃 x 2 ($23.6) + 支裝可樂 ($5)   我同里奧大人從未試過下午茶食咁多嘢   真係要食下停下食下停下先清哂枱面啲嘢食咋   埋單$188.50   我覺得好貴呀   人哋特登去飲下午茶係因為貪平   點之要成左兩舊水找數   之後里奧大人就話梗係啦   博命剔嘢食   又唔知自己剔親都係啲特點優點 ~

雖然食到成 4 點   因為太飽太飽   所以一定要行一陣先番屋企   我覺得係一個好悠閒嘅下午呀 ~

番到屋企里奧大人當然又係咁趕功課啦   而我就做下家務先   因為大食表妹會上嚟我屋企教我做功課   我唔想比人見到我間屋咁亂呀 ~

7 點 15 分左右表妹打嚟話差唔多到我屋企附近   嚇到我同里奧大人嗌救命   點解 ?!   我哋未肚餓呀   仲要係飽嗰隻添呀   但無理由唔同表妹食晚飯家嘛   我哋去咗食越南菜   事先同表妹講到明唔好預我同里奧大人食咁多嘢   因為啲野真係仲未落格   但表妹話佢好肚餓好肚餓喎   所以叫咗 2人餐 ($168)   有咖哩牛腩煲 + 2 件蒜蓉包 + 生菜包 + 春卷 + 炒粉皮 + 椰汁冰 + 薄荷梳打水   我同里奧大人每樣食少少咋   其他嘅表妹真係掃哂呀   勁呀   里奧大人同我講咗句   之前驚表妹食唔哂既疑慮係多餘既 ~

番到屋企唔理三七廿一擺陣做功課   唔想再拖呀   同埋有啲攰想快啲攪掂   我發覺如果真係要認真做功課一定要出去搵地方做   唔可以喺屋企做   因為太多引誘會唔專心   好似我表妹一路教一路問其他野講下其他野   我真係有啲掹   好認真話快啲啦   唔好講啲無謂嘢啦   我好攰呀   咁佢先無咁多嘢講咋   差唔多做完時   里奧大人又差唔多做完出嚟傾咗陣偈   之後就送表妹走 lu ~

整呢樣嗰樣再沖埋涼   又成 12 點幾先瞓呀 ~

麥當勞 ( OCT-2007 )

尋晚要番學   放工就即刻急步走   因為好想去買下野 Relax下先番學呀   去咗九龍城廣場行一陣   好開心呀   因為比我見到我好恨行嘅 $10 店呀   忍唔住行左陣   都幾大喎   好吸引呀   但我要番學呢   所以就好恨心同自己講 "妳嚟買野定番學㗎 ?!"   即刻走去樓上食麥當勞   食咗脆辣雞腿包套餐配可樂   好熱氣呀   但唔想食粉食到成身汗熱辣辣呢   一路食一路個心仲係 $10 店度   好難平伏咁興奮既心情呀   但都要同自己講 "我嚟番學唔係嚟買嘢"   食完真係差唔多時間番學   落去見到 $10 店真係好唔捨得呀   回頭望多次就算喇   之後打比里奧大人   話做完功課一定要帶 3 個環保袋嚟九龍城廣場 $10 店掃貨   我唔想有遺憾呀   里奧大人話我真係黐黐哋線   咁鐘意買嘢 ~

番到學校好有心機上堂   所以覺得好快就落堂喇   一路行一路諗 Case Study 行錯方向   咁啱見到里奧大人   原來里奧大人嚟咗接我放學呀   比驚喜嗰隻呀   佢仲以為我扮野行去佢嗰邊添呀   係冤枉㗎   我無扮野㗎   不過我真係好開心   因為真係估唔到里奧大人會接我   佢話到班車先趕度蹳接我放學咋   去度拍巴士門嗰隻   如果唔係就要各自番屋企等㗎喇   真係好感謝神嘅保守帶領呀   之後番到屋企附近食辣魚蛋 ($15) + 腸仔 ($2) + 白蘿蔔 ($4) + 燒賣 ($4)   好好好好飽呀   番到屋企要執下嘢先可以瞓   因為大表妹會嚟我屋企教我做功課呢 ~

~~~~

今日係 Off   瞓到 9 點   因為要去銀行搞野呀   又無咩胃口   所有去咗 KFC 食牛角包 + 阿拉伯加咖啡 ($12) ~

之後番屋企沖涼洗頭就出發去表妹度剪頭髮喇   今次係係咁易修下把秀髮   所以 45 分鐘就搞掂   Perfect 啦   仲有時間比我周圍行下   我好少去荃灣   所以覺得好新奇   又見到有 $10 店呀   不過唔行 lu   因為知道九龍城有   行第啲好過啦 ~

行下行下去榮華買咗金華火腿芯 (特價 $30)   南貨舖嘅菜脯 ($6) + 磨豉醬 ($13) + 辣麵豉 ($14) + 花椒八角 ($6)   好開心呀   因為好難有南貨舖頭㗎   咁樣叫唔叫做買到心頭好呢 ~