求其西餐

尋日 4:00 先番香港...番到屋企都 5:00...咁攰...又要煲藥...當然唔煮飯啦...但又諗唔到食 mood 好....所以同里奧大人一路行一路睇有 mood 好食...嘩...落街真係有 d 涷...行到有冷氣地方都有 d 涷到頂唔順呀...行下行下搵到間環境唔錯...價錢又抵既西餐廳...果度 d 燈陰陰暗暗咁...令人超級想瞓覺呀...所以即刻同里奧大人睇 menu...唔係驚瞓着左呀...食左煙三文魚凱撒沙律 + 拿破崙意粉 + 野菌牛油蒜蓉包....最正係有杯 fresh juice...我飲番茄汁...里奧大人想減肥...所以飲西柚汁...估唔到今次求其搵野食都有驚喜喎...overall 都好食...最緊要係抵嘛...$88...點搵呀...
之後行陣書局就番屋企 lu...因為手同腳好冤痛...梗係啦...拎 14 包中藥再加 3 包沖劑...唔痛先奇呀...番到屋企突然周身唔舒服...里奧大人要我探熱...99 度添...里奧大人話有小小燒喎...其實我不嬲體溫高架啦...多時都係呢個數字既...但里奧大人係都要迫我食退燒藥...唉...又中藥又西藥...都唔知係咪想我 c...唔怪之得見我一食藥就 me me 咀笑啦...

之後真係要瞓覺喇...樸左成日真係好攰好攰...

今朝 9:00 要起身呢...因為約左 11:25 body check...求其去大家樂食左炒米粉 + 熱華田...$14...食完拿拿聲去百佳買豬展 ($18) + 牛仔骨 ($33) + 2 包豆豉 ($5)....奇怪咁早就咁多人排隊...原來買滿 $50 有 95 折呀...唔怪之得啦...之後即刻飛奔去街市買 1 個南瓜 ($12) + 4 條粟米 ($10) 就走人 lu...

番到屋企即沖涼洗頭換衫走人...驚遲到呀...好在時間啱啱好咋...不過都要等個半鐘先有得睇...唉...真係要減肥喇...又再一次比人以為我係大肚婆呀...因為有人望完我個肚就讓位比我坐呀...仲係都要我坐添呀...我話唔駛喇妳坐啦唔該...其實真係好想話比佢知我唔係大肚架...check 完行左陣商場就番屋企等里奧大人 lu...唉...里奧大人成 3:00 先番到屋企...所以唔可以食咁飽...唔係夜晚食唔到飯呢...為左慳家...去左茶餐廳食...我食左墨魚丸魚皮餃湯濛 + 熱咖啡...$23...而里奧大人就食左油醬多 + 腸仔午餐肉煎旦飯 + 涷檸茶...$29...之後番屋企喇...