救命月餅 + 番茄味薯片 ( OCT-2007 )

尋日頂唔住   終於 3 點鐘請病假走人   好辛苦呢   睇屋企樓下個醫生   好在等 1 個就到我咋   睇完去東海堂買 Muffin   但一見到個 Muffin 突然間好想嘔   放低即刻番屋企算喇 ~

番到屋企即刻沖涼食埋啲昏昏欲睡嘅藥就瞓覺 lu   由 4 點半瞓到 10 點   有啲餓   但無杯麵又唔想開火煮   食咗 1/4 月餅同少少藩茄味薯片   好飽呢   之後 10 點 45 分里奧大人就放學番到屋企 lu   我就更加安心地瞓喇 ~

啲藥真係好勁   瞓極都唔夠   定係我累積嘅疲勞呢 ?!   如果可以瞓夠先番工就好喇 ~

~~~~

今朝有啲胃口   所以食咗腿蛋治 (走牛油) + 熱朱古力 ($14)   今次真係要慢慢食呀   因為之前成晚無食過嘢   好驚一食就頂住個胃呀   其實食完都好辛苦   不過好過唔食囉 ~

番到公司有嘢做呀   平時又唔見咁多野做   人家病先有野做   玩我咩   不過我真係無咩心機做   個人好攰好攰   個胃又頂住頂住搞到我好想嘔   但又唔敢食止嘔藥   因為係會超級眼瞓㗎   一陣都係瞓覺唔食 Lunch 喇   唔係唔知點頂呀 ~

瞓瞓下   有同事喺度大大聲講公事   明知有人瞓覺就細聲啲啦   麻鬼煩   嘈鬼住哂   好在都瞓到 45 分鐘咋   唔係就死啦   之後食咗條 Picnic 就食藥喇   真係好想嘔   所以一定要食止嘔藥   捱多 3 個半鐘啫   捱到嘅捱到嘅 ~