星悅鮮廚 @ 官塘 + Yanomi 卜聚 @ 意粉屋 ( 荃灣 ) ( 20-oct-2011 )

石燒大千雞 - 都幾辣   不過好惹味   我好鍾意食呀


京都沙拉骨 - 其實我幾驚食沙拉骨   因為 d 沙律醬好漏   但呢個又好好味喎   可能有京都汁關係呢

椒鹽鮮魷 - 媽咪想食好耐啦   不過得我同佢兩個人就唔想食囉   因為份量都幾多   兩個人食會覺得好熱氣同超高膽固醇咁呢

芥蘭炒臘味 - 估唔到咁大碟囉   同埋都唔小臘味   正呀 

沙爹金菇肥牛煲 - 呢個唔掂啦   無厘味道   同埋 d 肥牛超鞋囉  

( 20-oct-2011 thu )

今朝 7 點 45 分就醒咗   再懶床到 8 點就起身喇   食埋早餐就開機洗衫   再熨衫   之後就出發去表妹度剪髮喇 ~

約咗 11 點幾去到   好在無人   唔係我又要等架喇   差唔多 12 點半先剪完 ~ 

其實一早約咗 Mimi ( Yamoni ) 12 點 10 分樓下等   點知我望下個電話   原來已經 12 點15 分喇   嚇得我吖   即刻打比 Mimi 叫佢上黎坐   真係唔好意思啦   特登黎接我   我又遲到   仲要第一次見面   唉   自怪自己預時間唔好囉 ~  

噢   第一次見 Yanomi 咋   我叫佢做 Mimi   叫慣叫熟嘛   見到佢真人嘅感覺好得意呀   明明無見過   但見到又好有親切感   可能成日傾計啦 ~

佢帶我去食意粉屋   我對荃灣真係好唔熟   只係識得去我表妹度架咋   所以今次由佢帶路   佢好有滿足感架   仲陰陰咀笑問番我識唔識行番去表妹度添   我真係唔識囉   一路行一路傾   望佢仲多過望馬路   點記得喎 ~

原來 Mimi 好細心架   知道呢間意粉屋好凍   所以帶埋披肩比我呀   好感動呢 ~

一坐低叫埋嘢食就開始傾啦   真係好多嘢傾   個口未停過咁呀   無啦啦又講鬼怪嘢   搞到個人超勁寒   不過我都好鍾意同 Mimi 傾計   因為佢成日幫我分析嘢   所以我有時講小小佢已經明我講咩   好了解我呢   雖然佢成日話我依樣果樣   係咪都鬧   其實佢個人真係好細心呢   好留心人講 d 咩   唔會話求其聽完   敷衍答妳就算   佢真係記得妳所講嘅嘢架   呢一點里奧大人真係要好好向佢學習呀 ~
龍蝦湯 - Mimi 黎親意粉屋飲餐湯都多數轉龍蝦湯   佢覺得好飲   所以叫我轉埋   味道唔錯架   我用苦黎形容   佢話應該係甘呢   比我形容到錯哂添 ~

蒜蓉包 - 林嘅   定係我地掛住影相遲咗食呢   如果熱辣辣肯定好好味呀


龍蝦汁海鮮天使麵 - Mimi 叫架   食嘅時候又唔太熱喎   咁係咪真係我地影得太耐呢   不過味道都唔錯   我都幾鍾意食   同埋天使麵好難整   都係出街食好 d

青香草醬蜆肉長通粉 - 我叫架   我想試下香草醬嘛   Mimi 問我食唔食呢 d 香草醬   我話乜都試下囉   都唔係難入口丫  

 

凍檸檬茶 / 熱檸檬茶

食呀食   傾呀傾   傾到 3 點幾就走人喇   佢帶我行下附近商場   要盡地主之誼喎   之後帶我去買印尼麵同零食呀   好開心呀   因為佢又記得我講過嘅嘢呀   同埋我覺得好似同佢去緊旅行買手信咁呀 ~   

佢送埋我去搭亡命 van 就好唔捨得咁走喇   話有始有終喎   呵呵   今次見面非常之開心呀   把口未停過   居然喺網絡搵到真心朋友   真係好感恩呢 ~

我呀   對鞋爛咗呀   所以去到官塘要即買鞋   唔係一陣甩哂底就麻煩 ~

買完鞋就上媽咪屋企一陣   就出發去星悅喇 ~

里奧大人上咗大陸   所以今晚同媽咪   家姐   糟糟同籮籮一齊食飯   多人食真係開心 d ~ 

食完佢地話探寶寶喎   所以上咗去媽咪屋企坐陣   之後就車埋我番屋企   爽呀   番到屋企又見到里奧大人食黑椒漢堡   話唔好味喎   留番 dd 比我試下係咪唔好食   對我真係好好呀 ~